ନୂଆଦିଲ୍ଲୀ, ୧୭/୧୨ : ସୀମା ସୁରକ୍ଷା ବଳ ବା ବିଏସଏଫ ଗୁରୁବାର ରାତ୍ରିରେ ଅନୁପ୍ରବେଶ ଉଦ୍ୟମ କରୁଥିବା ୨ ପାକିସ୍ତାନୀଙ୍କୁ ନିପାତ କରିଛି । ଅମୃତସରର ଅଟାରୀ ସୀମା ନିକଟରେ ଏହି ଗୁଳି ବିନିମୟ ଘଟିଛି । ଅନୁପ୍ରବେଶ ପାଇଁ ଉଦ୍ୟମ କରୁଥିବା ବେଳେ ୨ ପାକିସ୍ତାନୀଙ୍କୁ ପ୍ରଥମେ ବିଏସଏଫ ଚେତାବନୀ ଦେଇଥିଲା । ପରେ ସେମାନେ ଗୁଳିମାଡ କରିଥିଲେ । ଏହାର ପାଲଟା ଜବାବ ଦେଇଥିଲା ବିଏସଏଫ ।
ଏହି ଘଟଣା ପରେ ଗୁରୁବାର ସକାଳେ ବିଏସଏଫର ବରିଷ୍ଠ ଅଧିକାରୀ ପହଁଚିଛନ୍ତି । ୨ ଅନୁପ୍ରବେଶକାରୀଙ୍କ ନିକଟରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ ହୋଇଛି । ଏଠାରେ କହି ରଖୁଛୁ ଯେ, ଗତ କିଛି ଦିନ ଧରି ଅନ୍ତରାଷ୍ଚ୍ରୀୟ ସୀମାରେ ଅନୁପ୍ରବେଶ ଉଦ୍ୟମ ଜୋର୍ ଧରିଛି ।ଏହାପୂର୍ବରୁ ନଭେମ୍ବର ୨୩ରେ ସାମ୍ବା ସେକ୍ଟରରେ କିଛି ପାକିସ୍ତାନୀ ଅନୁପ୍ରବେଶ ଉଦ୍ୟମ କରିଥିଲେ । ଏଥିରେ ୨ଜଣ ପାକିସ୍ତାନୀ ନିହତ ହୋଇଥିଲେ ।
ସେହିପରି ନଭେମ୍ବର ୮ ତାରିଖରେ ମଧ୍ୟ ଏକ ବଡ ଧରଣର ଅନୁପ୍ରବେଶ ଉଦ୍ୟମକୁ ଭାରତୀୟ ଯବାନମାନେ ପଣ୍ଡ କରିଥିଲେ । ବିଏସଏଫ ପ୍ରଥମେ ଅନୁପ୍ରବେଶକାରୀଙ୍କୁ ଚେତାବନୀ ଦେଇଥିଲେ । କିନ୍ତୁ ସେମାନେ ନଶୁଣି ଗୁଳିମାଡ କରିଥିଲେ । ଯାହାର ଯବାନମାନେ ମୁହଁତୋଡ ଜବାବ ଦେଇଥିଲେ । ଏହି ଅପରେସନରେ ସେନାର ୩ ଯବାନ ସହିଦ ହୋଇଥିଲେ ।
ଅଗଷ୍ଟ ମାସରେ ଗୁଜୁରାଟ-ରାଜସ୍ଥାନ ସୀମାରେ ପ୍ରଥମ ଥର ପାଇଁ ଅନୁପ୍ରବେଶ ଘଟଣା ସାମ୍ନାକୁ ଆସିଥିଲା । ଏଥିରେ ମଧ୍ୟ ଜଣେ ଅନୁପ୍ରବେଶକାରୀ ନିହତ ହୋଇଥିଲେ ।