ଭଦ୍ରକ ୦୭/୧୨: ଜୋର ଜବରଦସ୍ତ ଭାବେ ଗାଁରେ ପଶି ଦୁଇ ଆଦିବାସୀ ଯୁବକଙ୍କୁ ଅପହରଣ ଅଭିଯୋଗ । ଥାନାରେ ଅଭିଯୋଗ ପରେ ମଧ୍ୟ ପୋଲିସ ନଶୁଣିବାରୁ ଏସପି ଙ୍କ ଦ୍ୱାରସ୍ଥ ହୋଇଛନ୍ତି ଗ୍ରାମବାସୀ ଓ ଅପହରଣ ହୋଇଥିବା ଯୁବକଙ୍କ ପରିବାର । ଭଦ୍ରକ ଜିଲା ବନ୍ତ ଥାନା ଅଧୀନ ପଧାନପଡ଼ା ପଞ୍ଚାୟତର ଆଦିବାସୀ ସାହି ଓ ନିମପଲ୍ଲୀ ଗ୍ରାମର ୨ ଅପହୃତ ଯୁବକଙ୍କ ପରିବାର ଲୋକେ ଏସ୍ପିଙ୍କୁ ଭେଟି ନ୍ୟାୟ ଭିକ୍ଷା କରିଛନ୍ତି ।
ଗତ ୧ ତାରିଖ ରାତି ପ୍ରାୟ ୧୦ଟା ବେଳେ ବନ୍ତ ଓ ପଧାନପଡ଼ା ଅଞ୍ଚଳରୁ ୪୦ରୁ ଉର୍ଦ୍ଧ୍ୱ ଯୁବକ ସଂଘବଦ୍ଧ ଭାବେ ଠେଙ୍ଗାବାଡ଼ି ଓ ବିଭିନ୍ନ ମାରଣାସ୍ତ୍ର ଧରି ଉକ୍ତ ଗ୍ରାମରେ ପଶିଥିଲେ । ଗ୍ରାମର ବଟ ମୁଣ୍ଡାଙ୍କ ପୁଅ ଗୋପାଳ ଓ ଗୋଲକ ଜେନାଙ୍କ ପୁଅ ସୁରେନ୍ଦ୍ରଙ୍କୁ ସେମାନେ ମାଡ଼ ମାରିବା ସହ ଅପହରଣ କରି ନେଇଯାଇଥିବା ଉଭୟଙ୍କ ପରିବାର ପକ୍ଷରୁ ବନ୍ତ ଥାନାରେ ଅଭିଯୋଗ କରାଯାଇଥିଲା । ବନ୍ତ ପୋଲିସ ମାମଲା ରୁଜୁ କରିଥିଲେ ହେଁ ଏପର୍ଯ୍ୟନ୍ତ କାହାକୁ ଗିରଫ କରି ନ ଥିବାବେଳେ ଅପହୃତ ଦୁଇ ଯୁବକଙ୍କ ସନ୍ଧାନ ପାଇପାରି ନାହିଁ ଅଭିଯୁକ୍ତମାନଙ୍କୁ ଧରିବା ବଦଳରେ ପୋଲିସ ଆମ ନାଁରେ ମିଛ କେସ୍ କରି ହଇରାଣ କରୁଛି ବୋଲି ସେମାନେ ଏସ୍ପିଙ୍କ ନିକଟରେ ଅଭିଯୋଗ କରିଛନ୍ତି ।
ଧାମନଗର ଏସ୍ଡିପିଓ ଏବଂ ବନ୍ତ ଥାନାଧିକାରୀଙ୍କୁ ବଦଳି କରିବା ସହ ଅଭିଯୁକ୍ତମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ବଟ ମୁଣ୍ଡା କମଳାକାନ୍ତ ଜେନା ସମେତ ଗ୍ରାମବାସୀ ଏସ୍ପି ଦାବି ଜଣାଇଛନ୍ତି । ବନ୍ତ ଥାନାଧିକାର ଓ ଧାମନଗର ଏସ୍ଡିପିଓଙ୍କୁ ଡକା ଘଟଣାର ଅନୁସନ୍ଧାନ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସ୍ପି ଚରଣ ସିଂ ମୀନା ସେମାନଙ୍କୁ ପ୍ରତିଶ୍ରୁତି ଦେଇଛନ୍ତି।
