ଝାରଖଣ୍ଡ 28/01: ଧାନବାଦ ଅନ୍ତର୍ଗତ ପୁରୁଣା ବଜାରସ୍ଥିତ ହଜ୍‌ରା ଡାକ୍ତରଖାନାରେ ଭୟାବହ ଅଗ୍ନିକାଣ୍ଡ। ଶୁକ୍ରବାର ରାତିରେ  ହଠାତ୍ ନିଆଁ ଲାଗିଯିବାରୁ ଶ୍ବାସରୁଦ୍ଧ ହୋଇ ଡାକ୍ତର ଦମ୍ପତିଙ୍କ ସମେତ ଅନ୍ୟ ୬ଜଣଙ୍କର ମୃତ୍ୟୁ ହୋଇଛି। ମୃତ ବ୍ୟକ୍ତିମାନଙ୍କ ମଧ୍ୟରେ ଅଛନ୍ତି, ଡାକ୍ତର ବିକାଶ ହଜ୍‌ରା ଓ ତାଙ୍କ ପତ୍ନୀ ଡାକ୍ତର ପ୍ରେମା ହଜ୍‌ରା ଏବଂ ଡାକ୍ତରଖାନାର ଅନ୍ୟାନ୍ୟ କର୍ମଚାରୀ।

ସ୍ୱଚନାନୁସାରେ, ରାତିରେ ଡାକ୍ତର ବିକାଶ ହାଜରା ସହିତ ଅନ୍ୟମାନେ ନିଜ ନିଜ ରୁମରେ ଶୋଇଥିଲେ। ହଠାତ୍  ସର୍ଟସର୍କିଟ୍‌ ଯୋଗୁଁ କ୍ଲିନିକର ଦ୍ୱିତୀୟ ତାଲାରେ ନିଆଁ ଲାଗିଯାଇଥିଲା।  ଏହାପରେ, ନିଆଁ କ୍ରମଶଃ ପ୍ରଥମ ତାଲାକୁ ବ୍ୟାପିଥିଲା। ଘଟଣାଟି ରାତି 2 ଟାରେ ଘଟିଥିବାରୁ ନିଆଁ ଲିଭାଇବାର ବ୍ୟବସ୍ଥା ନଥିଲା। ତେଣୁ କୋଠରିରେ ଧୂଆଁ ଭରି ଯିବାରୁ ଶ୍ବାସରୁଦ୍ଧ ହୋଇ ଡାକ୍ତର ଦମ୍ପତିଙ୍କ ସମେତ ୬ଜଣଙ୍କର ମୃତ୍ୟୁ ହୋଇଥିଲା ।

ସୂଚନା ପାଇ ଅଗ୍ନିଶମ କର୍ମଚାରୀ ଡାକ୍ତରଖାନାରେ ପହଞ୍ଚି ୯ଜଣଙ୍କୁ ଉଦ୍ଧାର କରିଥିଲେ। ଚିକିତ୍ସା ନିମନ୍ତେ ସେମାନଙ୍କୁ ନିକଟରେ ଥିବା ପାଟଳିପୁତ୍ର ନର୍ସିଂହୋମ୍‌ରେ ଭର୍ତ୍ତି କରାଯାଇଛି। ଅଗ୍ନିଶମ ବିଭାଗ କର୍ମଚାରୀମାନଙ୍କ କହିବା ଅନୁସାରେ, ନିଆଁ ପ୍ରତିରୋଧ ନିମନ୍ତେ ଡାକ୍ତରଖାନାରେ ବିଶେଷ ସୁରକ୍ଷା ବ୍ୟବସ୍ଥା ନ ଥିଲା। ‘ଆଣ୍ଟିଫାୟାର୍‌ ମେସିନ୍’ ବି ସକ୍ରିୟ କରାଯାଇ ନ ଥିଲା।

ଏହି ଘଟଣାକୁ ନେଇ ଝାରଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ଶୋରେ ଟ୍ୱିଟ୍ କରି ଶୋକ ବ୍ୟକ୍ତ କରିଛନ୍ତି। ସେ ଲେଖିଛନ୍ତି ”ଧାନବାଦ ସ୍ଥିତ ହାଜରା ମେମୋରିଆଲ୍  ହସ୍ପିଟାଲରେ ଲାଗିଥିବା ନିଆଁ ଯୋଗୁ ପ୍ରସିଦ୍ଧ ଡାକ୍ତର ଦମ୍ପତିଙ୍କ ସମେତ ଅନ୍ୟମାନଙ୍କ ମୃତ୍ୟୁ ଖବର ମନକୁ ବ୍ୟଥିତ କରିଛି।  ଭଗବାନ ସେମାନଙ୍କ ଆତ୍ମାକୁ ଶାନ୍ତି ଦିଅନ୍ତୁ। ଏହି ଦୁଃଖର ସମୟରେ ନିଜକୁ ସମ୍ଭାଳିବାକୁ ଭଗବାନ ସେମାନଙ୍କୁ ପରିବାକୁ ଶକ୍ତି ଦିଅନ୍ତୁ।”