ଭୁବନେଶ୍ବର ୧୧|୪: ଆଜି ଓଡ଼ିଶାରେ ପ୍ରଥମ ପର୍ଯ୍ୟାୟ ମତଦାନ । ସକାଳ ୭ଟାରୁ ଆରମ୍ଭ ହେବ ମତଦାନ । କଳାହାଣ୍ଡି, ନବରଙ୍ଗପୁର, ବ୍ରହ୍ମପୁର, କୋରାପୁଟ ଭଳି ୪ଟି ଲୋକସଭା ଏବଂ ଏହା ଅନ୍ତର୍ଗତ ୨୮ ବିଧାନସଭା ଆସନରେ ମତଦାନ । ଏଥିପାଇଁ ବୁଥ୍ ରେ ମତଦାନ ପାଇଁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ମାଓ ପ୍ରବଣ ଅଂଚଳରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି ।
କଳାହାଣ୍ଡି ଲୋକସଭା ସହ ୭ଟି ବିଧାନସଭା ଭବାନୀପାଟଣା , ଧର୍ମଗଡ , ଜୁନାଗଡ , ନର୍ଲ।, ଲାଞ୍ଜିଗଡ, ନୂଆପଡା ଏବଂ ଖରିଆରରେ ଆଜି ଭୋଟିଂ ହେବ । ଜିଲ୍ଲାରେ ମୋଟ୍ ୧୪୦୫ ବୁଥରୁ ୨୨୬ ବୁଥକୁ ଅତି ସମ୍ବେଦନଶୀଳ ଭାବେ ଚିହ୍ନଟ କରାଯାଇଛି । ଏହା ମଧ୍ୟରେ ୧୭୪ ବୁଥ୍ ମାଓ ପ୍ରବଣ ଆଚଂଳରେ ରହିଛି । ମତଦାନ ପାଇଁ ମୋଟ୍ ଜିଲ୍ଲାରେ ୯ହଜାର ୨ଶହ ୭୮ ପ୍ରିଜାଡିଙ୍ଗ ଅଫିସର ନିୟୋଜିତ ହୋଇଛନ୍ତି ।
ସେହିପିର ବ୍ରହ୍ମପୁର ଲୋକସଭା ଆସନ ସମେତ ୭ଟି ବିଧାନସଭାରେ ଭୋଟିଂ ହେବ । ଏହି ୭ଟି ବିଧାନସଭା ଆସନ ହେଲା ବ୍ରହ୍ମପୁର, ଗୋପାଳପୁର, ଛତ୍ରପୁର, ଦିଗପହଣ୍ଡି, ମୋହନ, ଚିକିଟି ଓ ପାରଳାଖେମୁଣ୍ଡି । ଗଞ୍ଜାମ ଜିଲ୍ଲାରେ ମୋଟ୍ ୧ହଜାର ୧୧୭ ବୁଥରେ ୬ହଜାର ୯୭୩ ପୋଲିଙ୍ଗ୍ ଅଫିସରଙ୍କୁ ନିଯୁକ୍ତି କରାଯାଇଛି । ୧୪୪ଟି ବୁଥକୁ ଅତି ସମ୍ବେଦନଶୀଳ ବୁଥ୍ ଭାବେ ଚିହ୍ନଟ କରାଯାଇଛି । ଅତି ସମ୍ବେଦନଶୀଳ ବୁଥ୍ ଗୁଡିକରେ ସିସିଟିଭି ବ୍ୟବସ୍ଥା କରାଯାଇଥିବା ବେଳେ ସବୁ ବୁଥରେ ଭିନ୍ନକ୍ଷମ ଭୋଟରଙ୍କ ପାଇଁ ହ୍ବିଲ୍ ଚେୟାର୍ ବ୍ୟବସ୍ଥା ହୋଇଛି ।
ସେହିଭଳି ନବରଂଗପୁର ଲୋକସଭା ଆସନର ନବରଙ୍ଗପୁର, ମାଲକାନଗିରି, ଚିତ୍ରକୋଣ୍ଡା, ଝରିଗାଁ, ଡାବୁଗାଁ, ଉମରକୋଟ ଏବଂ କୋଟପାଡରେ ନିର୍ବାଚନ ଅନୁଷ୍ଠିତ ହେଉଛି ।
କୋରାପୁଟ ଲୋକସଭା ଅନ୍ତର୍ଗତ କୋରାପୁଟ, ଗୁଣୁପୁର, ବିଷମକଟକ, ରାୟଗଡା, ଲକ୍ଷ୍ମୀପୁର, ଜୟପୁର ଏବଂ ପଟ୍ଟାଙ୍ଗି ବିଧାନସଭା ନିର୍ବାଚନମଣ୍ଡଳିରେ ଭୋଟଗ୍ରହଣ ହେବ ।
ପ୍ରଥମ ପର୍ଯ୍ୟାୟ ମତଦାନ ପାଇଁ ଯେଉଁ ଅଂଚଳରେ ମତଦାନ ରହିଛି ସେ ଅଞ୍ଚଳରେ ସରକାର ସରକାରୀ ଛୁଟି ଘୋଷଣା କରିଛନ୍ତି ।
