scan steel
web-baneer-728x90
WhatsApp Image 2023-12-06 at 12.52.17
728x90-banner-17.2.24jpg
Untitled-1 copy (1)
previous arrow
next arrow

Prameya News7

Prameya News7, News7 Odia, Odisha Latest News, Odisha Current Headlines, Odisha News Online, Odisha News, khabar odisha,news in oriya

ମହାବାତ୍ୟାକୁ ପୂରିଲା ୧୯ ବର୍ଷ : କାଲିଭଳି ଲାଗୁଛି କେମିତି ଭାସିଗଲେ ଆତ୍ମୀୟ ସ୍ବଜନ, ଚାରିଆଡେ ଖାଲି ଖୁଢ କୁଢ ଶବ…

29/10/2018 at 5:59 PM

ଜଗତସିଂହପୁର୨୯|୧୦: ମହାବାତ୍ୟାକୁ ପୂରିଲା ୧୯ ବର୍ଷ । ୧୯୯୯ ଆଜିର ଦିନରେ ଏତେ ବେଳକୁ ଧ୍ବସ୍ତବିଧ୍ୱସ୍ତ ହୋଇ ସାରିଥିଲା, ଉପକୂଳ ଓଡ଼ିଶା । ପବନର ବେଗ ଠାରୁ ଭୟଙ୍କର ଥିଲା ସମୁଦ୍ର । କାଲି ଭଳି ଲାଗୁଥିବା ସେହି ଦୁର୍ଦ୍ଦିନକୁ ଏଯାଏଁ ଭୁଲିପାରୁ ନାହାନ୍ତି ପ୍ରପୀଡ଼ିତ ।

୧୯ ବର୍ଷ ପୂରିଲା । ହେଲେ କାଲି ଭଳି ଲାଗୁଛି । ୧୯୯୯ ମହାବାତ୍ୟାକୁ ଅନୁଭବ କରିଥିବା ଲୋକେ ଏବେ ବି ଭୁଲିପାରି ନାହାନ୍ତି ସେଦିନର ସେ କରାଳ ରୂପ । କେଉଁଠି ମାଆ କୋଳରୁ ଛୁଆକୁ ଛଡ଼ାଇ ନେଲା ତ କେଉଁଠି ସ୍ତ୍ରୀ ପାଖରୁ ସ୍ବାମୀ । ପୁଣି କେଉଁଠୁ ପିଲାଙ୍କ ପାଖରୁ ସେମାନଙ୍କ ବାପା-ମାଆଙ୍କୁ ଛଡ଼ାଇ ନେଲା ମହାବାତ୍ୟା । ଏ ହେଉଛନ୍ତି ପଦ୍ମପୁର ପଞ୍ଚାୟତର ଅକ୍ଷୟ ଭୋଳ । ମହାବାତ୍ୟାରେ ଏକ ଡ୍ରମକୁ ଧରି ସେ ଭାସି ଯାଇଥିଲେ ୧୩ କିଲୋମିଟର । ଆଉ ୫ ଦିନ ପରେ ଫେରିଥିଲେ ଘରକୁ ।

ଅକ୍ଷୟଙ୍କ ଭଳି ଶଙ୍କା ଗାଁର ଅଶୋକ ମଙ୍ଗଳ ଏବଂ ରାହାସ ବିହାରୀ ମଣ୍ଡଳଙ୍କ କାହାଣୀ ମଧ୍ୟ ଥିଲା ହୃଦୟ ବିଦାରକ । ଗୋଟେ ବାଉଁଶକୁ ଧରି ୩୦ କିଲୋମିଟର ଭାସିଯିବା ପରେ ଗୋଟେ ଟାପୁରେ ଲାଗିଥିଲେ । ଆଉ ୭ ଦିନ ପରେ ଘରକୁ ଫେରିଥିଲେ । ସେହିଭଳି ରାହାସ ବିହାରୀ ଓ ତାଙ୍କ ସ୍ତ୍ରୀ ଏକ ଗଛ ଡାଳକୁ ଧରି ବଞ୍ଚିଗଲେ ସିନା, କିନ୍ତୁ ଆଖି ଆଗରେ ଭାସିଗଲେ ବାପା, ମାଆ, ଭଉଣୀ ଓ ପୁଅ-ଝିଅ … ମିଶି ୯ ଜଣ ।

ମହାବାତ୍ୟାରେ ପବନର ବେଗ ଯେତିକି ଭୟଙ୍କର ନଥିଲା, ତା ଠାରୁ ଅଧିକ ଭୟଙ୍କର ଥିଲା ସମୁଦ୍ର । ଦୁଇ କିଲୋମିଟର ପର୍ଯ୍ୟନ୍ତ ଗାଁ ଭିତରକୁ ମାଡ଼ି ଆସିଥିଲା ସମୁଦ୍ର । ୧୦ ହଜାରରୁ ଅଧିକ ଜୀବନ ଚାଲିଗଲା । ଅନେକ ଗାଁ ନିଶ୍ଚିହ୍ନ ହୋଇଗଲା । ହେନ୍ତାଳ ବଣ ଅବକ୍ଷୟ ଯୋଗୁଁ ହିଁ ଏତେ ବଡ଼ ବ୍ୟାପକ କ୍ଷତି ଘଟିଲା । ତେବେ ମହାବାତ୍ୟା ପରେ ସରକାର ଅନେକ ଯୋଜନାର ପ୍ରତିଶ୍ରୁତି ଦେଲେ । କିନ୍ତୁ ୧୯ ବର୍ଷ ପରେ ମଧ୍ୟ ମୁକୁଳା ପଡ଼ିଛି ଜଗତସିଂହପୁର ଜିଲ୍ଲାର ଜଟାଧାରୀ ମୁହାଁରୁ ଦେବୀ ମୁହାଁଣ ପର୍ଯ୍ୟନ୍ତ ୪୦ କିଲୋମିଟର ବେଳାଭୂମି । ପୁଣି ସ୍ଥାନେ ସ୍ଥାନେ ଥିବା ଜଙ୍ଗଲକୁ ମାଫିଆମାନେ ସଫା କରିବାରେ ଲାଗିଛନ୍ତି । ଏବେ ବି ବେଳେ ସମୁଦ୍ରର ଭୟଙ୍କର ରୂପ ଦେଖି ଉପକୂଳିଆ ଲୋକେ ଭୟଭୀତ ହୋଇ ପଡୁଛନ୍ତି ।

ମହାବାତ୍ୟାର ତାଣ୍ଡବ ଏବେ ବି ତାଜା ହୋଇ ରହିଛି । ଜଗତସିଂହପୁରର ଏରସମା ଅଞ୍ଚଳ ସବୁଠାରୁ ବେଶୀ ପ୍ରଭାବିତ ହୋଇଥିଲା । କିନ୍ତୁ ୧୯ ବର୍ଷ ପରେ ଏବେ ବି ସେଠାରେ ଚିହ୍ନ ରହିଯାଇଛି ।

   Related Posts