ନୂଆଦିଲ୍ଲୀ ୨୩।୦୯: ଆରମ୍ଭ ହୋଇଗଲାଣି ଭାରତରେ ହେବାକୁ ଥିବା ଦିନିକିଆ ବିଶ୍ୱକପ ପାଇଁ କାଉଣ୍ଟଡାଉନ୍ । ୫ ଅକ୍ଟୋବରରେ ଆରମ୍ଭ ହେବ ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍ । ଏଥିପାଇଁ ଶେଷ ପର୍ଯ୍ୟାୟରେ ପହଞ୍ଚିଛି ସମସ୍ତ ପ୍ରସ୍ତୁତି । ଆଇସିସି ଓ୍ବାର୍ଲକପ୍‌ ୨୦୨୩ ପାଇଁ ଘୋଷଣା କରିଛି ପୁରସ୍କାର ରାଶି । ଚାମ୍ପିଅନ୍‌ ଦଳକୁ ଟ୍ରଫି ସହ ୩୩ କୋଟି ୧୮ ଲକ୍ଷ ଏବଂ ରନର୍ସ ଅପ୍‌ ଟିମ୍‌କୁ ୧୬ କୋଟି ୫୯ ଲକ୍ଷ ଟଙ୍କାର ଦିଆଯିବ ପୁରସ୍କାର ରାଶି ।

ସେହିପରି ସେମି ଫାଇନାଲରେ ପରାଜିତ ୨ ଟିମ୍‌କୁ ମିଳିବ ୬ କୋଟି ୬୩ ଲକ୍ଷ ଟଙ୍କା ଲେଖାଏଁ ଆର୍ଥିକ ରାଶି । ଅନ୍ୟପଟେ ଗ୍ରୁପ ପର୍ଯ୍ୟାୟରୁ ଅଭିଯାନ ଶେଷ କରୁଥିବା ବାକି ୬ଟି ଦଳକୁ ୮୨ ଲକ୍ଷ ୯୪ ହଜାର ଟଙ୍କାର ଆର୍ଥିକ ରାଶି ମିଳିବ । ଏହାବାଦ୍‌ ଗ୍ରୁପ ପର୍ଯ୍ୟାୟରେ ପ୍ରତି ମ୍ୟାଚ୍‌ରେ ବିଜୟ ପିଛା ୩୩ ଲକ୍ଷ ୧୭ ହଜାର ଟଙ୍କା ଲେଖାଏଁ ପ୍ରଦାନ କରାଯିବ ।

କିନ୍ତୁ ଜାଣନ୍ତି କି ୧୯୮୩ରେ ପ୍ରଥମ ଥର ବିଶ୍ୱକପ ଟ୍ରଫି ଜିତିବା ପରେ ଭାରତୀୟ ଟିମ୍‌ଙ୍କୁ କେତେ ଟଙ୍କା ମିଳିଥିଲା ? ବାସ୍ତବରେ କପିଲ ଦେବଙ୍କ ନେତୃତ୍ୱରେ ଟିମ୍‌ ଇଣ୍ଡିଆ ଯେତେବେଳେ ବିଶ୍ୱକପ ଜିତିଲା, ସେତେବେଳେ ଟୁର୍ଣ୍ଣାମେଣ୍ଟ ପାଇଁ ଆଇସିସି ପକ୍ଷରୁ କୌଣସି ପୁରସ୍କାର ରାଶି ପ୍ରଦାନ କରାଯାଇ ନଥିଲା । କିନ୍ତୁ ବିସିସିଆଇ ଖେଳାଳିଙ୍କୁ ପ୍ରତି ମ୍ୟାଚରେ ପ୍ରାୟ ୨୧୦୦ ଟଙ୍କା ଫି ଦେଉଥିଲା ।

 ଯେତେବେଳେ ଭାରତୀୟ ଟିମ୍‌ ଓ୍ବାର୍ଲକପ୍‌ ଜିତିଲା, ବୋର୍ଡ ପ୍ରତ୍ୟେକ ଖେଳାଳିଙ୍କୁ ୨୫ ହଜାର ଟଙ୍କା ଦେବାକୁ ଘୋଷଣା କରିଥିଲା । କିନ୍ତୁ ସେତେବେଳେ ଏତେ କମ୍ ଟଙ୍କାକୁ ନେଇ ବିରୋଧ କରାଯାଇଥିଲା । ପରେ ବୋର୍ଡ ଦିଲ୍ଲୀରେ ଲତା ମଙ୍ଗେଶକରଙ୍କ ଏକ କନ୍ସର୍ଟ ଆୟୋଜନ କରିଥିଲା ​​। ଯେଉଁଥିରେ ପ୍ରାୟ ୨୦ ଲକ୍ଷ ଟଙ୍କା ରୋଜଗାର ହୋଇଥିଲା । ଆଉ ଖେଳାଳିଙ୍କୁ ଏହି ଟଙ୍କା ଦିଆଯାଇଥିଲା ।  

You Can Read: