ରାଇରଙ୍ଗପୁର ୨୨।୫: ସୋମବାର ୧୨ ଘଣ୍ଟିଆ ମୟୂରଭଞ୍ଜ ବନ୍ଦ । ରାଷ୍ଟ୍ରପତିଙ୍କ କାର୍ଯ୍ୟକ୍ରମ ସମୟରେ ବିଦ୍ୟୁତ ବିଭ୍ରାଟ ଘଟଣା ପ୍ରତିବାଦରେ ୧୨ ଘଣ୍ଟିଆ ମୟୂରଭଞ୍ଜ ବନ୍ଦ ପାଳନ କରାଯାଉଛି । ଏହି ଘଟଣାରେ କାର୍ଯ୍ୟାନୁଷ୍ଠାନ ଦାବି କରି ବିଜେପି ଓ ମୟୂରଭଞ୍ଜ ନାଗରିକ ମଞ୍ଚ ବନ୍ଦ ଡାକରା ଦେଇଛି । ଜିଲ୍ଲାର ବିଭିନ୍ନ ସ୍ଥାନରେ ବନ୍ଦ ପାଳନ କରାଯାଉଛି ।

ମୟୂରଭଞ୍ଜ ଜିଲ୍ଲା ପ୍ରଭାବ ସକାଳ ୬ରୁ ଦ୍ୱିପ୍ରହର ୧୨ ଘଟିକା ପର୍ଯ୍ୟନ୍ତ । ୬ଘଣ୍ଟିଆ ବନ୍ଦ ଡାକରା ରାଇରଙ୍ଗପୁରରେ ଦେଖିବାକୁ ମିଳିଛି । ବନ୍ଦର ପ୍ରଭାବରେ ରାଇରଙ୍ଗପୁର ମ୍ୟୁନିସିପାଲିଟି ସମେତ ୭ଟି ବ୍ଲକରେ ବନ୍ଦର ପ୍ରଭାବ ଦେଖିବାକୁ ମିଳିଛି । ସମସ୍ତ ସରକାରୀ ଓ ବେସରକାରୀ ପ୍ରତିଷ୍ଠାନ ବନ୍ଦ ସହ ଗାଡିମଟର ଚଳାଚଳ ବନ୍ଦ ରହିଛି । ବାମନଘାଟି ଉପଖଣ୍ଡ ଦେଇଯାଇଥିବା ୪୯ ନମ୍ବର ଜାତୟ ରାଜପଥ  ଓ ୨୨୦ ନମ୍ବର ଜାତୀୟ ରାଜପଥରେ ମଧ୍ୟ ଗାଡି ଚଳାଚଳ ବନ୍ଦ ରହିଛି । 

ଉଲ୍ଲେଖଯୋଗ୍ୟ ଯେ, ଗତ ମେ’ ମାସ ୬ ତାରିଖରେ ବାରିପଦା ସହରରେ ରାଷ୍ଟ୍ରପତି ଅଭିଭାଷଣ ଦେଉଥିବା ସମୟରେ ବିଦ୍ୟୁତ ବିଭ୍ରାଟ ଦେଖିବାକୁ ମିଳିଥିଲା । ତେବେ ରାଷ୍ଟ୍ରପତିଙ୍କ ସୁରକ୍ଷାରେ ଥିବା ପ୍ରଶାସନିକ କର୍ମଚାରୀମାନଙ୍କ ବିରୁଦ୍ଧରେ ଏପର୍ଯ୍ୟନ୍ତ ରାଜ୍ୟ ସରକାର କୌଣସି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିନାହାଁନ୍ତି । ଯଦି ଆଗାମୀ ଦିନରେ ପ୍ରଶାସନିକ କର୍ମଚାରୀମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ନ କରନ୍ତି, ତେବେ ଆନ୍ଦୋଳକୁ ଅହୁରି ଜୋରଦାର କରିବାକୁ ଚେତାବନୀ ଦେଇଛନ୍ତି ମୟୂରଭଞ୍ଜ ଜିଲ୍ଲାର ବିଜେପି କର୍ମକର୍ତ୍ତା ।

ରାଷ୍ଟ୍ରପତି ଭାଷଣ ସମୟରେ ବିଦ୍ୟୁତ ବିଭ୍ରାଟ ଘଟଣା : ବାରିପଦାରେ ୧୨ ଘଣ୍ଟିଆ ମୟୂରଭଞ୍ଜ ବନ୍ଦ ପ୍ରଭାବ

ବାରିପଦା ୨୨।୫: ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟରେ ରାଷ୍ଟ୍ରପତି ଭାଷଣ ସମୟରେ ବିଦ୍ୟୁତ ବିଭ୍ରାଟ ଘଟିବା ଏକ ଲଜ୍ଜାଜନକ ଘଟଣା । ଉକ୍ତ ଘଟଣାରେ ରାଜ୍ୟ ସରକାର ବିହିତ କାର୍ଯ୍ୟାନୁଷ୍ଠାନ ଗ୍ରହଣ ନକରିବାରୁ ସୋମବାର ବିଜେପି ଓ ମୟୂରଭଞ୍ଜ ନାଗରିକ ମଞ୍ଚ ପକ୍ଷରୁ ମୟୁରଭଞ୍ଜ ଜିଲ୍ଲାରେ ୧୨ ଘଣ୍ଟିଆ ବନ୍ଦ କରିଛି । ଯାହାକୁ ନେଇ ବିଜେପି ଓ ମୟୂରଭଞ୍ଜ ନାଗରିକ ମଞ୍ଚ ପକ୍ଷରୁ ଜିଲ୍ଲାର ବିଭିନ୍ନ ସ୍ଥାନରେ କାର୍ଯ୍ୟାଳୟର ବନ୍ଦ କରାଯାଇଛି ।

ଶନିବାର ବାରିପଦା ସ୍ଥିତ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର ୧୨ତମ ସମାବର୍ତ୍ତନ ଦିବସ ଯୋଗ ଦେଇଥିଲେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଉକ୍ତ କାର୍ଯ୍ୟକ୍ରମ ପରିଚାଳନାରେ ଅନେକ ମାତ୍ରାରେ ଅବହେଳା ହୋଇଥିବାର ବିଜେପି ଜିଲ୍ଲା ସଭାପତି କାନ୍ଦ୍ରା ସରେନ ଅଭିଯୋଗ କରିଛନ୍ତି । ଉକ୍ତ ଘଟଣା ସାରା ଦେଶରେ ମୟୁରଭଞ୍ଜ ଜିଲ୍ଲାକୁ ଲଜ୍ଜିତ କଲା ଭଳି ଘଟଣା ଘଟିଛି । ଏହିଭଳି ଅବହେଳା ପ୍ରଦର୍ଶନ କରି ମୟୁରଭଞ୍ଜ ଜିଲ୍ଲାରେ ସୋମବାର ୧୨ ଘଣ୍ଟିଆ ବନ୍ଦ ହରତାଳ କରାଯାଉଛି ।

ଉଦଳାରେ ମୟୁରଭଞ୍ଜ ବନ୍ଦର ପ୍ରଭାବ, ଦୋକାନ ବଜାର ସହ ସରକାରୀ କାର୍ଯ୍ୟାଳୟ ବନ୍ଦ

ଉଦଳା ୨୨।୫: ୧୨ ଘଣ୍ଟିଆ ମୟୁରଭଞ୍ଜ ବନ୍ଦ । ବିଜେପି ପକ୍ଷରୁ ମୟୁରଭଞ୍ଜ ବନ୍ଦ ଡାକରା ଦିଆଯାଇଥିବା ବେଳେ ଉଦଳାଠାରେ ନାଗରିକ ମଞ୍ଚ ପକ୍ଷରୁ ୬ ଘଣ୍ଟା ବନ୍ଦ ଡାକରା ଦିଆଯାଇଛି । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ମୟୁରଭଞ୍ଜ ଗସ୍ତ ବେଳେ ବାରିପଦାଠାରେ ଅଭିଭାଷଣ ଦେବା ସମୟରେ ବିଦ୍ୟୁତ କାଟକୁ ନେଇ ଏହି ଆନ୍ଦୋଳନ କରାଯାଇଛି । ଏହି ବନ୍ଦରେ ଉଦଳାରେ ଦୋକାନ ବଜାର ବନ୍ଦ ରହିବା ସହିତ ସରକାରୀ କାର୍ଯ୍ୟାଳୟ ମଧ୍ୟ ବନ୍ଦ ରହିଛି । ନାଗରିକ ମଞ୍ଚ ପକ୍ଷରୁ ଏହି ବନ୍ଦ ଡାକରା ଦିଆଯାଇଥିବା ବେଳେ ବିଜେପିର କର୍ମୀ ଏବଂ ନାଗରିକ ମଞ୍ଚ ସଦସ୍ୟମାନେ ପିକେଟିଂ କରି ଦୋକାନ ବଜାର ବନ୍ଦ କରୁଥିବା ଦେଖିବାକୁ ମିଳିଛି ।