ଜଣେ ଫିଲ୍ମ ମେକର ଏଭେରେଷ୍ଟରେ ଚଢୁଥିବା ବେଳର ଭୟଙ୍କର ଫଟୋ ଉଠାଇଛନ୍ତି । ମୃତଦେହଗୁଡିକୁ ପାର କରି ପର୍ବତାରୋହୀ ଆଗକୁ ବଢୁଥିବା ଫଟୋରେ ଦେଖିବାକୁ ମିଳିଛି । ଦୁନିଆର ସବୁଠାରୁ ଉଚ୍ଚ ପର୍ବତ ଏଭେରେଷ୍ଟ ଏଥର ଭୟଙ୍କର ପ୍ରମାଣିତ ହୋଇଛି । ଗତ ୯ ଦିନ ମଧ୍ୟରେ ୧୧ ଜଣ ପର୍ବତାରୋହୀ ପ୍ରାଣ ହରାଇଛନ୍ତି ।

ପାଗ ଭଲ ନଥିବାରୁ ଏଥର ଏଭେରେଷ୍ଟ ଚଢିବା ପାଇଁ ବହୁତ କମ୍ ଦିନ ସମୟ ମିଳିଥିଲା । ନେପାଳ ଏଥର ୩୮୧ ଜଣଙ୍କୁ ଅନୁମତି ଦେଇଥିଲା । ଏହା ରେକର୍ଡ ସଂଖ୍ୟକ । ଯେଇଁଥିପାଇଁ ପର୍ବତ ଉପରେ ପର୍ବତାରୋହୀଙ୍କୁ ଭିଡ ଜମିଯାଇଥିଲା ।

କାନାଡାର ଫିଲ୍ମ ମେକର ଏଲିଆ ସୈକଲି ପାଖାପାଖି ୩୦ ହଜାର ଫୁଟ ଉଚ୍ଚର ଏକ ଫଟୋ ଇନ୍ସଟାଗ୍ରାମରେ ସେୟାର କରିଥିଲେ । ଏଭେରେଷ୍ଟ ପର୍ବତର ଶିଖରକୁ ଚଢିବା ପାଇଁ ଲୋକେ ଲାଇନରେ ଛିଡା ହୋଇଥିବା ଏଥିରେ ଦେଖିବାକୁ ମିଳିଥିଲା । ସେ ଫଟୋ ମାଧ୍ୟମରେ ପର୍ବତାରୋହୀଙ୍କୁ ଚେତାବନି ଦେବାକୁ ଚେଷ୍ଟା କରିଛନ୍ତି ।

ଫଟୋ ସହ ସେ ଲେଖିଛନ୍ତି ଯେ, “ଆମେମାନେ ଏଠାରେ ଏକ ସ୍ୱପ୍ନକୁ ପିଛା କରି ଆସିଛୁ । କିନ୍ତୁ ଆମ ଗୋଡତଳେ ଜଣେ ପ୍ରାଣ ହରାଇ ସାରିଛି । ଏଭେରେଷ୍ଟ କଣ ହେଇଗଲାଣି” ।

ଏଭେରେଷ୍ଟରେ ଭିଡ କାରଣରୁ ଅଧିକ ଉଚ୍ଚରେ ପର୍ବତାରୋହୀଙ୍କୁ ପର୍ବତ ଉପରେ ଅଧିକ ସମୟ ଅଟକିବାକୁ ପଡୁଛି । ଏହା ଅନେକ ଲୋକଙ୍କ ପାଇଁ ପ୍ରାଣହାନୀ ପ୍ରମାଣିତ ହୋଇଛି । ଅଷ୍ଟ୍ରେଲିଆର ଆଉ ଜଣେ ପର୍ବତାରୋହୀ ୨୪୬୦୦ ଫୁଟ ଉଚ୍ଚରେ ଅଚେତ ହୋଇପଡିଥିଲେ । ବର୍ତ୍ତମାନ ସେ ଜୀବନ ମୃତ୍ୟୁ ସହ ସଂଗ୍ରାମ କରୁଛନ୍ତି ।