ମୁମ୍ବାଇ ୨୭।୧: ଆସନ୍ତା ଫେବୃଆରୀ ୧ ତାରିଖରେ ଅର୍ଥମନ୍ତ୍ରୀ ସଂସଦରେ ୨୦୨୩-୨୪ ବର୍ଷ ଲାଗି ବଜେଟ୍ ଉପସ୍ଥାପନ କରିବେ। ଦେଶରେ ବଜେଟ୍ ପୂର୍ବରୁ ସେୟାର ବଜାରରେ ହାହାକାର ପଡିଯାଇଛି। ମାତ୍ର ୨ଟି ବ୍ୟବସାୟୀକ ଦିନରେ ସେୟାର ବଜାରରେ ସେନସେକ୍ସ ୧୫ଶହ ପଏଣ୍ଟ ଖସିଯାଇଛି। ଫଳରେ ନିବେଶକଙ୍କୁ ଗୁରୁତର କ୍ଷତିର ସମ୍ମୁଖୀନ ହେବାକୁ ପଡିଛି। ଗତ ବୁଧବାରଠାରୁ ସେୟାର ବଜାର ଚାପରେ ରହିଛି।

ବୁଧବାର ଦିନ ସେନସେକ୍ସ ୭୭୪ ପଏଣ୍ଟ ଅର୍ଥାତ ୧.୨୭ ପ୍ରତିଶତ ଖସିଯାଇଥିଲା। ସେହିପରି ନିଫ୍ଟି ମଧ୍ୟ ୨୨୬.୩୫ ପଏଣ୍ଟ ଅର୍ଥାତ ୧.୨୫ପ୍ରତିଶତ ହ୍ରାସ ସହ ବନ୍ଦ ହୋଇଥିଲା। ତେବେ ତା ପରଦିନ ସାଧାରଣତନ୍ତ୍ର ଦିବସ ଲାଗି ବଜାର ବନ୍ଦ ଥିଲା।  ହେଲେ  ଶୁକ୍ରବାର ସକାଳେ ବଜାର ହ୍ରାସ ସହ ଆରମ୍ଭ ହୋଇଥିବା ବେଳେ କାରବାର ଶେଷ ବେଳକୁ ସେନସେକ୍ସ ୮୭୪.୧୬ ପଏଣ୍ଟ ଅର୍ଥାତ ୧.୪୫ ପ୍ରତିଶତ ହ୍ରାସ ହୋଇ ୫୯,୩୩୧ ପଏଣ୍ଟରେ ଅଟକିଛି। ଦିନରେ କାରବାର କାଳରେ ସେନସେକ୍ସ ହ୍ରାସ ହୋଇ ୫୮,୯୭୪.୭୦ ପଏଣ୍ଟ ପର୍ଯ୍ୟନ୍ତ ଆସିଯାଇଥିଲା।

ସେହିପରି ନିଫ୍ଟି ୨୮୮ ପଏଣ୍ଟ ହ୍ରାସ ହୋଇ ୧୭,୬୦୪ ପଏଣ୍ଟରେ ବନ୍ଦ ହୋଇଛି। ବୁଧବାର ଓ ଶୁକ୍ରବାର ୨ଟି ବ୍ୟବସାୟୀକ ଦିବସରେ ନିବେଶକଙ୍କର ପ୍ରାୟ ୧୧ ଲକ୍ଷ କୋଟି ଟଙ୍କା ବୁଡି ଯାଇଛି। ତେବେ ଅଚାନକ ଏପରି ହ୍ରାସ ଲାଗି ବିଶେଷଜ୍ଞ ହିଣ୍ଡେନବର୍ଗ ରିପୋର୍ଟକୁ ଦାୟି କରିଛନ୍ତି। ଏହି ରିପୋର୍ଟରେ ଆଦାନୀ ଗ୍ରୁପ ଉପରେ ଅନେକ ଗୁରୁତର ଅଭିଯୋଗ କରାଯାଇଛି। ଏହା ସହ ରିପୋର୍ଟରେ ବ୍ୟାଙ୍କମାନଙ୍କ ଦ୍ୱାରା ଆଦାନୀ ଗ୍ରୁପକୁ ଦିଆଯାଇଥିବା ଋଣର ମଧ୍ୟ ଉଲ୍ଲେଖ ରହିଛି। ଖାସ ଏହି କାରଣ ଯୋଗୁ ଗତ ୨ଟି ବ୍ୟବସାୟୀକ ଦିନରେ ଆଦାନୀ ଗ୍ରୁପ ଓ ବ୍ୟାଙ୍କିଙ୍ଗ ସମ୍ପର୍କିତ ଷ୍ଟକ୍ସ ଭୀଷଣ ଚାପରେ ଅଛନ୍ତି।

ତେବେ ବୈଶ୍ୱିକ ବ୍ରୋକରେଜ ଫାର୍ମ ସିଏଲଏସଏ ଆଦାନୀ ସମୂହକୁ ଦିଆଯାଇଥିବା ଲୋନ କାରଣରୁ ବ୍ୟାଙ୍କମାନଙ୍କ ରିସ୍କ ଲିମିଟେଡ୍ ଥିବା କହିଛନ୍ତି। ଅର୍ଥାତ ଏଥିରେ ବ୍ୟାଙ୍କମାନଙ୍କ ଲାଗି ସେପରି କୌଣସି ବିପଦ ଆଶଙ୍କା କରାଯାଉନି। ତେବେ ଏହି ୨ ଦିନରେ ଆଦାନୀ ସମୂହର କମ୍ପାନୀମାନଙ୍କୁ ୪ ଲକ୍ଷ କୋଟିରୁ ଅଧିକ କ୍ଷତି ସହିବାକୁ ପଡିଛି। ରିପୋର୍ଟ ପରେ ବିଦେଶୀ ସଂସ୍ଥାଗତ ନିବେଶକ (ଏଫଆଇଆଇ)ମାନେ ବ୍ୟାପକ ବିକାବିକି ଚଳାଇଛନ୍ତି। ତେବେ ଦେଶର ସାଧାରଣ ବଜେଟ୍ ପୂର୍ବରୁ ଦଲାଲ ଷ୍ଟ୍ରିଟ୍‌ରେ ନିବେଶକଙ୍କ ଠାରେ ହାତାସା ଦେଖାଯାଇଛି। ଏଥିରେ ବିଶେଷଜ୍ଞମାନେ ଦୀର୍ଘ ଅବଧି ପୁଞ୍ଜିଗତ ଲାଭ ହାର ବୃଦ୍ଧି ଅଥବା କର୍ପୋରେଟ ଟ୍ୟାକ୍ସରେ ବୃଦ୍ଧି ଭଳି ପ୍ରସ୍ତାବ ଯୋଗୁ ବଜାରରେ ମାନ୍ଦାବସ୍ଥା ସମ୍ଭାବନା ବୃଦ୍ଧି ପାଇପାରେ ବୋଲି କହିଛନ୍ତି।