ଢେଙ୍କାନାଳ ୧୬।୪: ଶ୍ବଶୁର ଘର ପଛ ପଟୁ ଜ୍ବାଇଁର ମୃତଦେହ ଠାବ ହୋଇଛି । ଏକ ଗଛରେ ବେକରେ ରଶି ଲଗାଇ ଝୁଲନ୍ତା ଅବସ୍ଥାରେ ଏହି ଯୁବକରଙ୍କ ମୃତଦେହକୁ ପୋଲିସ ଜବତ କରିଛି । ଢେଙ୍କାନାଳ ଜିଲ୍ଲା ଗଁନ୍ଦିଆ ଥାନା ଅନ୍ତର୍ଗତ ରାଇତୈଳା ଗ୍ରାମରେ ଏପରି ଅଭାବନୀୟ ଘଟଣା ଦେଖିବାକୁ ମିଳିଛି । ଖବର ପାଇ ଗଁନ୍ଦିଆ ପୋଲିସ ଏହି ଗ୍ରାମର ଅର୍ଜୁନ ଜେନାଙ୍କ ଘର ବାଡିର ଏକ ଗଛରେ ଝୁଲନ୍ତା ଅବସ୍ଥାରେ ମୃତଦେହକୁ ଉଦ୍ଧାର କରି ତଦନ୍ତ ଆରମ୍ଭ କରିଛି । ମୃତ ଯୁବକ ଜଣଙ୍କ ଯାଜପୁର ଜିଲ୍ଲା ସୁକିନ୍ଦା ଥାନା ଅନ୍ତର୍ଗତ ହାତା ଗ୍ରାମର ସନ୍ତୋଷ ବେଉରା ବୋଲି ଜଣାପଡିଛି ।
ମୃତ୍ୟୁର ସଠିକ କାରଣ କଣ ଜଣା ପଡ଼ିନାହିଁ । ତେବେ ମୃତ ସନ୍ତୋଷ ରାଇତୈଳା ଗ୍ରାମର ଅର୍ଜୁନ ଜେନାଙ୍କ ଝିଅଙ୍କୁ ବିବାହ କରିଥିଲେ । ସନ୍ତୋଷ ମଦ୍ୟପାନ କରି ପତ୍ନୀଙ୍କୁ ନିର୍ଯାତନା ଦେଉଥିବା ନେଇ ଥାନାରେ ମଧ୍ୟ ମାମଲା ରହିଛି । ଫଳରେ ପତ୍ନୀ ଶାଶୁଘର ଛାଡି ନିଜ ବାପା ଘର ରାଇତୈଳାକୁ ପଳାଇ ଆସିଥିବାରୁ ସନ୍ତୋଷ ଡାକିବାକୁ ଆସିଥିଲେ । ମାତ୍ର ସେ ଯିବାକୁ ମନା କରିବା ସହ ପୋଲିସରେ ଅଭିଯୋଗ କରିବା ଧମକ ପାଇ ନିରାଶ ହୋଇଥିଲେ ବୋଲି ଜଣାପଡିଛି । ଫଳରେ ସନ୍ତୋଷ ହତାସ ହୋଇ ଏପରି ଆତ୍ମହତ୍ୟା କରିଥିବା ସନ୍ଦେହ କରାଯାଇଛି ।
