ପୁରୀ ୨୦|୪: ଶ୍ରୀମନ୍ଦିରରେ ସବୁ ସୁରକ୍ଷା ବ୍ୟବସ୍ଥାକୁ ଭାଙ୍ଗି ନୀଳଚକ୍ର ଉପରେ ଜଣେ ଯୁବକ ଚଢ଼ିଯାଇଥିଲା । ଓହ୍ଲାଇବା ପରେ ଉକ୍ତ ଯୁବକକୁ ଶ୍ରୀମନ୍ଦିର ସିଂହଦ୍ବାର ଥାନା ପୋଲିସ ଅଟକ ରଖି ପଚରାଉଚୁରା କରୁଛି । ଯୁବକ ଜଣଙ୍କ ଭଦ୍ରକର ହାତିଆ ମହନ୍ତ ବୋଲି ପରିଚୟ ମିଳିଛି ।
ସୂଚନାଯୋଗ୍ୟ ଯେ, ଆଜି ସକାଳେ ନୀଳଚକ୍ର ଉପରେ ଯୁବକ ଚଢ଼ିଯାଇଥିବା ଦେଖି ତାଗିଦ୍ କରିବା ପରେ ସେବାୟତମାନେ ତାକୁ ଧରି ପୋଲିସର ଜିମା ଦେଇଥିଲେ । କେଉଁ ଉଦ୍ଦେଶ୍ୟରେ ଓ କିଭଳି ସେ ଶ୍ରୀମନ୍ଦିର ନୀଳଚକ୍ର ଉପରକୁ ଚଢ଼ିଲା ସେ ନେଇ ପୋଲିସ ତଦନ୍ତ ଆରମ୍ଭ କରିଛି ।
ନିକଟରେ ଶ୍ରୀମନ୍ଦିର ଦକ୍ଷିଣ ଦ୍ବାର ରାମ ମନ୍ଦିର ଓ ସୁଆର ମହାସୁଆର ନିଯୋଗ କାର୍ଯ୍ୟାଳୟରୁ ଚୋରୀ ହୋଇଥିଲା । ଶ୍ରୀମନ୍ଦିର ଭିତରେ ଓ ବାହାରେ କଡ଼ା ସୁରକ୍ଷା ବ୍ୟବସ୍ଥା ଥିବା ସତ୍ତ୍ବେ ଯୁବକ ଜଣକ ନୀଳଚକ୍ର ଉପରେ ଚଢ଼ିବା ସୁରକ୍ଷା ବ୍ୟବସ୍ଥା ନେଇ ପ୍ରଶ୍ନବାଚୀ ସୃଷ୍ଟି କରିଛି।
