ନୁଆଦିଲ୍ଲୀ ୧୪/୦୯ : ସୋସିଆଲ ମିଡିଆରେ ଏକ ଭିଡ଼ିଓ ଗତ ଗୁରୁବାରଠାରୁ ଭାଇରାଲ ହୋଇଥିଲା । ଏହି ଭିଡ଼ିଓରେ ଜଣେ ଯୁବତୀଙ୍କୁ ଜଣେ ଯୁବକ ଅତି ନିର୍ଦ୍ଦୟଭାବେ ମାଡ଼ ମାରୁଥିଲେ । ଯୁବତୀଙ୍କ ପେଟକୁ ଗୋଇଠା ମାରିବା ଏବଂ ଗାଲକୁ ଚାପଡ଼ ମାରିବା ସହ ଶେଷରେ ନିଜ ବାହୁରେ ଯୁବତୀଙ୍କ ପିଠିକୁ ନିର୍ଘାତ ପ୍ରହାର କରୁଥିଲେ । ଏହି ଭିଡ଼ିଓ ଭାଇରାଲ ହେବାପରେ ଗୃହମନ୍ତ୍ରୀ ରାଜନାଥ ସିଂ ଏଥିରେ ହସ୍ତକ୍ଷେପ କରିଛନ୍ତି । ଯୁବତୀଙ୍କୁ ମାଡ଼ ମାରୁଥିବା ଯୁବକକୁ ଦିଲ୍ଲୀ ପୋଲିସ ଗିରଫ କରିଛି । ଗିରଫ ଯୁବକ ଜଣେ ପୋଲିସ ଅଧିକାରୀଙ୍କ ପୁଅ ବୋଲି ଜଣାପଡ଼ିଛି ।
ଗତକାଲି ଭିଡ଼ିଓ ଭାଇରାଲ ହେବାପରେ ଦିଲ୍ଲୀ ପୋଲିସ ଅମୂଲ୍ୟ ପଟ୍ଟନାୟକଙ୍କୁ କାର୍ଯ୍ୟାନୁଷ୍ଠାନ ପାଇଁ ରାଜନାଥ ସିଂ ନିର୍ଦ୍ଦେଶ ଦେଇଥିଲେ । ଦିଲ୍ଲୀ ପୋଲିସ କମିଶନରଙ୍କୁ ନିର୍ଦ୍ଦେଶ ଦେବା ସମ୍ପର୍କରେ ରାଜନାଥ ସିଂ ଟ୍ୱିଟ୍ ମଧ୍ୟ କରିଥିଲେ । ଦକ୍ଷିଣ-ପୂର୍ବ ଦିଲ୍ଲୀ ପୋଲିସ ଏକ ମାମଲା ନିଜଆଡୁ ରୁଜୁ କରି ଭିଡ଼ିଓରେ ଥିବା ଯୁବତୀଙ୍କୁ ଠାବ କରିବା ପାଇଁ ଉଦ୍ୟମ ଚଳାଇଥିଲା । କିନ୍ତୁ ଶୁକ୍ରବାର ଦିନ ସଂପୃକ୍ତ ଯୁବତୀ ନିଜେ ଆସି ପୋଲିସ ଥାନାରେ ଲିଖିତ ଅଭିଯୋଗ କରିଥିଲେ । ଯୁବତୀ ଅଭିଯୋଗ କରିଥିଲେ ଯେ, ଭିଡ଼ିଓରେ ଥିବା ଯୁବକ ତାଙ୍କର ଜଣେ ବନ୍ଧୁ । ଗତ ଗୁରୁବାର ଦିନ ଏହି ଯୁବକ ତାଙ୍କୁ ଦକ୍ଷିଣ-ପୂର୍ବ ଦିଲ୍ଲୀ ଅଞ୍ଚଳରେ ଥିବା ତାଙ୍କର
ବନ୍ଧୁଙ୍କ କାର୍ଯ୍ୟାଳୟକୁ ଡାକିଥିଲେ । ସେଠାରେ ତାଙ୍କ ସହ ଏହି ଯୁବକ ଅସହମତି ସତ୍ୱେ ଶାରିରୀକ ସମ୍ପର୍କ ସ୍ଥାପନ କରିଥିଲେ । ଏ ସମ୍ପର୍କରେ ପୋଲିସ ନିକଟରେ ଏ ନେଇ ଅଭିଯୋଗ କରିବେ ବୋଲି ଯୁବତୀ କହିବା ଯୋଗୁଁ ତାଙ୍କୁ ଅତି ନିର୍ମମଭାବେ ଯୁବକ ମାଡ଼ ମାରିଥିଲେ ବୋଲି ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି ।
ଅଭିଯୋଗ ପାଇବାପରେ ପୋଲିସ ଭାରତୀୟ ଦଣ୍ଡବିଧି ଆଇନ ଅନୁଯାୟୀ ୩୭୬/୩୨୩/୩୫୪ ଧାରାରେ ଯୁବକଙ୍କୁ ଆଜି ଗିରଫ କରିଛି ।