ପାଟନା ୨୮/୧୦ : ବିହାରର ସିୱାନ ଅନ୍ତର୍ଗତ ସାଦର ହସ୍ପିଟାଲରେ ଏକ ଅଜବ ଘଟଣା ଘଟିଛି । ଜଣେ ମହିଳା ଏକାଥରେ ପାଞ୍ଚଟି ସନ୍ତାନ ଜନ୍ମ ଦେଇଛନ୍ତି । ଜନ୍ମ ନେଇଥିବା ଶିଶୁଙ୍କ ମଧ୍ୟରୁ ୩ ଜଣ ଝିଅ ଥିବା ବେଳେ ୨ ଜଣ ପୁତ୍ର ସନ୍ତାନ ରହିଛନ୍ତି । ମା’ ଏବଂ ୫ ସନ୍ତାନ ବର୍ତ୍ତମାନ ସୁସ୍ଥ ଥିଲେ ସୁଦ୍ଧା ଡାକ୍ତରଙ୍କ ତତ୍ତ୍ବାବଧାନରେ ରହିଛନ୍ତି । ଏକ ସ୍ବତନ୍ତ୍ର ଡାକ୍ତରୀ ଟିମ ତାଙ୍କ ଉପରେ ନଜର ରଖିଛନ୍ତି ।
ସୂଚନାନୁସାରେ, ଗୁରୁବାର ଦିନ ଜଣେ ମହିଳା ସିୱାନର ସାଦର ଡାକ୍ତରଖାନାରେ ଭର୍ତ୍ତି ହୋଇଥିଲେ। ଯାଞ୍ଚ ବେଳେ ଜଣାପଡିଥିଲା ଯେ ମହିଳାଙ୍କ ଗର୍ଭରେ ପାଞ୍ଚଟି ସନ୍ତାନ ଅଛନ୍ତି । ଡାକ୍ତରମାନେ ଖୁବ ସତର୍କତାର ସହ ଡେଲିଭରୀ କରିବାକୁ ନିଷ୍ପତ୍ତି ନେଇଥିଲେ । ସାଦର ହସ୍ପିଟାଲର ଡେପୁଟି ସୁପରିଟେଣ୍ଡେଣ୍ଟ ଡାକ୍ତର ରୀତା ସିଂହ କହିଛନ୍ତି ଯେ, ୫ଟି ଶିଶୁ ଜନ୍ମ ନେଇଥିବା ମହିଳା ହେଉଛନ୍ତି ଇସମାଇଲ ତାକିଆ ନିବାସୀ ମହମ୍ମଦ ଝୁନାଙ୍କ ପତ୍ନୀ ଫୁଲଜହାଁ ଖାତୁନ୍ । ଯାଞ୍ଚ ବେଳେ ଜଣାପଡିଥିଲା ଯେ, ଫୁଲଜହାଁଙ୍କ ପେଟରେ ୫ଟି ଶିଶୁ ରହିଛନ୍ତି । ତେଣୁ ଅପରେସନ କରି ପିଲାଙ୍କୁ ବାହାର କରିବା ପାଇଁ ମେଡିକାଲ ପକ୍ଷରୁ ଏକ ସ୍ବତନ୍ତ୍ର ଟିମ ଗଠନ କରାଯାଇଥିଲା ।
ଏହାପୂର୍ବରୁ ଜୁଲାଇ ମାସରେ, ଉତ୍ତରପ୍ରଦେଶର ବାରବାଙ୍କି ଜିଲ୍ଲାରେ ୨୨ ବର୍ଷ ବୟସ୍କା ଜଣେ ମହିଳା ୪ଯି ସନ୍ତାନ ଜନ୍ମ ଦେଇଥିଲେ। ସେ ମହିଳା ଜଣକ ୟୁପର ଅଜନ୍ତା ହସ୍ପିଟାଲରେ ଭର୍ତ୍ତି ହୋଇଥିଲେ । ସେଠାରେ ତାଙ୍କର ୩ଟି ଝିଅ ଏବଂ ଗୋଟିଏ ପୁଅ ଜନ୍ମ ହୋଇଥିଲା ଜନ୍ମ ହବା ପରେ ସମସ୍ତେ ସୁସ୍ଥ ଥିଲେ।