ନୂଆଦିଲ୍ଲୀ୧୨.୧୨- ନୂଆ ପାସପୋର୍ଟରେ ପଦ୍ମ ଚିହ୍ନକୁ ନେଇ ବିରୋଧି ଲୋକସଭାରେ ହଙ୍ଗାମା କରିବାର ଦିନକ ପରେ ଜବାବ ରଖିଛି ବୈଦେଶିକ ବ୍ୟାପାର ମନ୍ତ୍ରଣାଳୟ । ବିଭାଗ ପକ୍ଷରୁ ଏଥିଲାଗି ସୁରକ୍ଷା କାରଣର ଯୁକ୍ତି ରଖାଯାଇଛି । କେରଳର କୋଝିକୋଡେରେ ଏହି ନୂଆ ପାସପୋର୍ଟ ବଣ୍ଟାଯିବା ଲାଗି ଅଣାଯାଇଥିବା ବେଳେ ବିବାଦ ହୋଇଥିଲା । ବୁଧବାର ଶୂନ୍ୟକାଳରେ କଂଗ୍ରେସ ସାଂସଦ ଏମ୍ କେ ରାଘବନ ଏହି ପ୍ରସଙ୍ଗ ଉଠାଇଥିଲେ ।
ପଦ୍ମ ବିଜେପିର ନିର୍ବାଚନୀ ସଂକେତ ହୋଇଥିବା ବେଳେ , ପୁଣି ଏକ ସରକାରୀ ସଂସ୍ଥାନର ଗୌରିକରଣ କରାଯିବାକୁ ଉଦ୍ୟମ ହେଉଥିବା ଅଭିଯୋଗ କରିଥିଲେ କଂଗ୍ରେସ ସାଂସଦ ।ତେବେ ଗୁରୁବାର ଏ ନେଇ ସ୍ପଷ୍ଟିକରଣ ରଖିଛି ଏମ୍ଇଏ । ବୈଦେଶିକ ମନ୍ତ୍ରଣାଳୟ ମୁଖପାତ୍ର ରବିଶ କୁମାର କହିଛନ୍ତି , ପଦ୍ମ ଆମ ଜାତୀୟ ପୁଷ୍ପ । ସୁରକ୍ଷା କାରଣରୁ ତାହାକୁ ଏବେ ପାସ୍ପୋର୍ଟ ଉପରେ ନିଆଯାଇଛି ।
ତେବେ ଆଗକୁ ଅନ୍ୟ ଜାତୀୟ ସଂକେତ ଗୁଡିକୁ ପର୍ଯାୟ କ୍ରମେ ପାସ୍ପୋର୍ଟ ରେ ନିଆଯିବ । ଜାଲି ପାସପୋର୍ଟ ଗୁଡିକୁ ଧରିବା ଲାଗି ପ୍ରକୃତ ପାସ୍ପୋର୍ଟରେ ଏହି ସୁରକ୍ଷା ଫିଚର ରହିଛି ବୋଲି ସେ ସ୍ପଷ୍ଟ ମଧ୍ୟ କରିଛନ୍ତି ।ଏହା ଇଣ୍ଟର ନ୍ୟାସନାଲ ସିଭିଲ୍ ଆଭିଏସନ ଅର୍ଗାନାଇଜେସନ ନିର୍ଦ୍ଦେଶାବଳୀ ମୁତାବକ ଗ୍ରହଣ କରାଯାଇଥିବା ମଧ୍ୟ କହିଛନ୍ତି ରବିଶ କୁମାର।
