ଚଣ୍ଡିଗଡ ୧୩।୧: ସଂଶୋଧିତ କୃଷି ଆଇନ ବିରୋଧ କରି ଦିଲ୍ଲୀ ସୀମାରେ ଚାଷୀଙ୍କ ଆନ୍ଦୋଳନ ଲଗାତାର ୫୦ ଦିନ ଜାରି ରହିଛି। ସରକାର ଓ ଚାଷୀଙ୍କ ମଧ୍ୟରେ ବାରମ୍ବାର ଆଲୋଚନା ହେଉଥିଲେ ହେଁ ଏପର୍ଯ୍ୟନ୍ତ କୌଣସି ନିଷ୍ପତି ହୋଇପାରୁନି। ଫଳରେ ଚାଷୀଙ୍କ ମଧ୍ୟରେ ନୈରାଶ୍ୟ ଦେଖାଦେଇଥିବା ବେଳେ ଏହାର ପ୍ରଭାବ ରାଜ୍ୟମାନଙ୍କ ଉପରେ ପଡିବାର ଲାଗିଲାଣି। ଏହି କ୍ରମରେ ହରିୟାଣାର ୬୦ରୁ ଅଧିକ ଗାଁ ବିଜେପି ଓ ସହଯୋଗୀ ଜେଜେପିକୁ ସାମାଜିକ ବହିଷ୍କାର କରାଯାଇଥିବା ଜଣାପଡିଛି।
ଏହି ସବୁ ଗାଁକୁ ବିଜେପି ଓ ଜେଜେପିର ନେତା,କର୍ମୀଙ୍କ ପ୍ରବେଶ ନିଷେଧ ଘୋଷଣା କରାଯାଇଛି। କେନ୍ଦ୍ର ସରକାରଙ୍କ ସଂଶୋଧିତ କୃଷି ଆଇନକୁ ରାଜ୍ୟର ବିଜେପି ଓ ଜେଜେପି ସମର୍ଥନ କରୁଛନ୍ତି। ଏଣୁ ଦଳର ମନ୍ତ୍ରୀ, ବିଧାୟକ ଓ ଦଳୀୟ କର୍ମୀଙ୍କୁ ହରିୟାଣାର ଗାଁ ଗାଁରେ ବିରୋଧର ସମ୍ମୁଖୀନ ହେବାକୁ ପଡୁଛି। ଦିଲ୍ଲୀରେ ଚାଷୀଙ୍କ ଆନ୍ଦୋଳନ ଚାଲିଥିବା ବେଳେ ଗାଁ ଗାଁରେ ଖାପ୍ ପଞ୍ଚାୟତ ଅନୁଷ୍ଠିତ ହେଉଛି। ଶୀତ କାକରରେ ଚାଷୀଙ୍କ କଷ୍ଟ ଓ ଆଇନପ୍ରତି ସରକାରଙ୍କ ମନବୃତ୍ତିକୁ ନେଇ ଆଲୋଚନା ହେଉଥିବା ବେଳେ ଏପରି ପଞ୍ଚାୟତମାନେ ଗାଁ ଗାଁରେ ବିଜେପି ଓ ଜେଜପି ନେତା କର୍ମୀଙ୍କୁ ବହିଷ୍କାର କରିବାକୁ ଆହ୍ୱାନ ଦେଉଛନ୍ତି।
ପଞ୍ଚାୟତଙ୍କ ଆହ୍ୱାନ କ୍ରମେ ଅନୁନ୍ୟ ୬୦ଟି ଗାଁରେ ବିଜେପି-ଜେଜେପି ବିରୋଧ ଆରମ୍ଭ ହୋଇଯାଇଥିବା ବେଳେ ନେତା ଓ କର୍ମୀମାନେ ଏବେ ଗାଁ ଛାଡିବାରେ ଲାଗିଛନ୍ତି। ଗାଁ ଗାଁରେ ବିଜେପି ଓ ସରକାରକୁ ସହଯୋଗ କରୁଥିବା ଜେଜେପିକୁ ଲୋକେ ବାସନ୍ଦ କରୁଥିବାରୁ ଦଳୀୟ ସମର୍ଥକମାନେ ବିଶେଷ ଅସୁବିଧାର ସମ୍ମୁଖୀନ ହେଉଛନ୍ତି। ଗାଁରେ ଲୋକେ ସେମାନଙ୍କ ସହ କଥାବାର୍ତ୍ତା କରୁନଥବା ବେଳେ ପରିବାର ଲୋକଙ୍କ ସହ ମିଳାମିଶା ବନ୍ଦ କରିଦେଇଛନ୍ତି। ସେମାନଙ୍କ ଚାଷବାସ ଓ ଘର କାମରେ ସହଯୋଗ ଲାଗି ଗାଁ ଲୋକେ ଯାଉନାହାନ୍ତି ଓସାମାଜିକ ସେବା ବନ୍ଦ ହୋଇଛି। ଏଣୁ ଦଳୀୟ କୁଜିନେତା ଏବେ ଗାଁ ଛାଡିବେ ନଚେତ ଦଳ ଛାଡିବା ଅବସ୍ଥାକୁ ଆସିଯିବା ଉଭୟ ଦଳଙ୍କ ଲାଗି ନୂଆ ସମସ୍ୟା ସୃଷ୍ଟି କରିଛି।
