ଲଣ୍ଡନ ୧୪।୫: ଭାରତକୁ ତାଙ୍କ ପ୍ରତ୍ୟର୍ପଣ ପାଇଁ ଲଢୁଥିବା ମଦ ବ୍ୟବସାୟୀ ବିଜୟ ମାଲ୍ୟା ଗୁରୁବାର ଦିନ ୧୦୦ ପ୍ରତିଶତ ଋଣ ପରିଶୋଧ କରିବାକୁ ତାଙ୍କ ପ୍ରସ୍ତାବକୁ ସ୍ବୀକାର କରିବାକୁ ସରକାର କହିଛନ୍ତି । ଏହାସହ ତାଙ୍କ ବିରୋଧରେ ମାମଲା ବନ୍ଦ କରିବାକୁ ସେ ସରକାରଙ୍କୁ ଅପିଲ୍ କରିଛନ୍ତି । ମାଲ୍ୟା ନିକଟରେ ଘୋଷିତ ୨୦ ଲକ୍ଷ କୋଟି ଟଙ୍କାର ଆର୍ଥିକ ପ୍ୟାକେଜ୍ ପାଇଁ ଭାରତ ସରକାରଙ୍କୁ ଅଭିନନ୍ଦନ ଜଣାଇଛନ୍ତି ଏବଂ ତାଙ୍କ ଦେୟ ଫେରସ୍ତ ପ୍ରସ୍ତାବକୁ ବାରମ୍ବାର ଅଣଦେଖା କରାଯାଉଥିବାରୁ ଦୁଃଖ ପ୍ରକାଶ କରିଛନ୍ତି।
ମାଲ୍ୟା ଟ୍ବିଟ୍ କରିଛନ୍ତି ଯେ, କୋଭିଡ-୧୯ ରିଲିଫ ପ୍ୟାକେଜ ପାଇଁ ସରକାରଙ୍କୁ ଅଭିନନ୍ଦନ । ସେ ଯେତେ ଚାହିଁବେ ନୋଟ୍ ଛପାଇ ପାରିବେ । କିନ୍ତୁ ମୁଁ ମୋ ପରି ଜଣେ ଛୋଟ ସହଯୋଗୀଙ୍କୁ ଅଣଦେଖା କରିବା କଣ ଉଚିତ୍ । ଯିଏ ସରକାରୀ ବ୍ୟାଙ୍କରୁ ନିଆଯାଇଥିବା ୧୦୦% ଋଣ ଫେରସ୍ତ କରିବାକୁ ଚାହୁଁଛି ।
ମାଲ୍ୟା ହେଉଛନ୍ତି ବନ୍ଦ ହୋଇଥିବା ଏୟାରଲାଇନ୍ସ କିଙ୍ଗଫିସର ଏୟାରଲାଇନ୍ସର ପ୍ରମୋଟର । ୯୦୦୦ କୋଟି ଟଙ୍କା ଠକେଇ ଏବଂ ମନି ଲଣ୍ଡରିଂ ମାମଲାରେ ତାଙ୍କ ତଲାସ ଜାରି ରହିଛି । ମାଲ୍ୟା କହିଛନ୍ତି ଯେ, ଦୟାକରି ମୋ ଠାରୁ ବିନା ସର୍ତ୍ତରେ ଟଙ୍କା ନେଇ ମାମଲା ବନ୍ଦ କରନ୍ତୁ। ଏହି ମାସର ଆରମ୍ଭରେ ମାଲ୍ୟା ଭାରତକୁ ପ୍ରତ୍ୟର୍ପଣ ପାଇଁ ଲଣ୍ଡନ ହାଇକୋର୍ଟଙ୍କ ଆଦେଶ ବିରୋଧରେ ବ୍ରିଟେନ ସୁପ୍ରିମକୋର୍ଟରେ ଆବେଦନ କରିଥିଲେ।
