ଭୁବନେଶ୍ବର୨/୧୨: ପାଠକ ବାପ-ପୁଅଙ୍କ କୋଟି କୋଟି ଟଙ୍କାର ଆକଳନ କରିବାକୁ ଇଡି ଏବଂ ଆଇଟିକୁ ଚିଠି ଲେଖିଲା ଭିଜିଲାନ୍ସ। ନିଲମ୍ବିତ ଏଇଏଫଏସ୍ ଅଫିସର ଅଭୟକାନ୍ତ ପାଠକଙ୍କ ପୁଅ ଆକାଶ ପାଠକଙ୍କ ତିନୋଟି ବ୍ୟାଙ୍କ ଆକାଉଣ୍ଟରେ ୧୪ କୋଟି ୭୭ ଲକ୍ଷ ଟଙ୍କା ଜମା ହୋଇଛି । ଏହାକୁ ନେଇ ଭିଜିଲାନ୍ସ ସନ୍ଦେହ କରିବା ସହ ଏଥିରେ ସନ୍ଦିଗ୍ଧ ଓ ବେନାମୀ କାରବାର ହୋଇଥିବା ଅନୁମାନ କରିଛି । ଏଭଳି କ୍ଷେତ୍ରରେ ଇନକମ ଟ୍ୟାକ୍ସ ବା ଆୟକର ଓ ପ୍ରବର୍ତ୍ତନ ନିର୍ଦ୍ଦେଶାଳୟ ବା ଇଡି ତଦନ୍ତ କରିବାର ଆବଶ୍ୟକତା ରହିଛି। ତେଣୁ ଆୟ ନଥାଇ ଏତେ ଟଙ୍କା କୁଆଡୁ ଆସିଲା, ତାହାର ସଠିକ ତଦନ୍ତ ହେଉ, ସେଥିପାଇଁ ଭିଜିଲାନ୍ସ ଚିଠି ଲେଖିଛି।
ଭିଜିଲାନ୍ସ ଏହି ମାମଲାରେ ମନି ଲଣ୍ଡରିଂ ଓ ଆୟକର ଦାଖଲର ତଦନ୍ତ ଲାଗି ଇନକମ୍ ଟ୍ୟାକ୍ସ ଓ ଇଡିକୁ ସୁପାରିସ୍ କରିଛି। ଘରୋଇ ବ୍ୟାଙ୍କରେ ବିପୁଳ ଅର୍ଥ ଜମା ନେଇ ୩ ବ୍ୟାଙ୍କର ଅଧିକାରୀଙ୍କୁ ଏସଆଇଟି ପଚରାଉଚରା କରୁଛି ।
