ଓ୍ବାଶିଂଟନ୍ ୧୬।୮: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସାନ ଭାଇ ରବର୍ଟ ଟ୍ରମ୍ପଙ୍କ ପରଲୋକ । ମୃତ୍ୟୁ ବେଳକୁ ତାଙ୍କୁ ୭୧ ବର୍ଷ ବୟସ ହୋଇଥିଲା । ସେ ନ୍ୟୁୟର୍କର ଏକ ଡାକ୍ତରଖାନାରେ ଚିକିତ୍ସିତ ହେଉଥିଲେ । ହ୍ବାଇଟ୍ ହାଉସ ଦ୍ବାରା ଜାରି କରାଯାଇଥିବା ଏକ ବିବୃତ୍ତି ଅନୁଯାୟୀ ଶନିବାର ଦିନ ରବର୍ଟଙ୍କ ଦେହାନ୍ତ ହୋଇଛି । ରାଷ୍ଟ୍ରପତି ଟ୍ରମ୍ପ ତାଙ୍କ ଭାଇଙ୍କୁ ଶୁକ୍ରବାର ଦିନ ନ୍ୟୁୟର୍କ ସିଟି ହସ୍ପିଟାଲରେ ଭେଟିଥିଲେ ।
ଡୋନାଲ୍ଡ ଟ୍ରମ୍ପ ଏକ ବିବୃତ୍ତିରେ କହିଛନ୍ତି, ‘ମୋତେ ଦୁଃଖ ମନରେ କହିବାକୁ ପଡୁଛି ଯେ ମୋ ଭାଇ ମୋର ଅତି ନିକଟତର ଥିଲେ । ସେ କେବଳ ମୋର ଭାଇ ନୁହଁନ୍ତି ବରଂ ସବୁଠୁ ଭଲ ବନ୍ଧୁ ମଧ୍ୟ ଥିଲେ । ସେ ସବୁବେଳେ ମୋ ହୃଦୟରେ ବଞ୍ଚି ରହିବେ । ରବର୍ଟ, ମୁଁ ତୁମକୁ ଭଲ ପାଏ।’
ଏଭଳି ଦୁଃଖଦ ଘଟଣା ସେହି ସମୟରେ ଘଟିଛି ଯେତେବେଳେ ଡୋନାଲ୍ଡ ଟ୍ରମ୍ପ କ୍ରମାଗତ ଭାବେ ଦ୍ବିତୀୟ ଥର ପାଇଁ ଆମେରିକାର ରାଷ୍ଟ୍ରପତି ହେବାକୁ ଉଦ୍ୟମ ଜାରି ରଖିଛନ୍ତି । କୁହାଯାଉଛି ଯେ ଟ୍ରମ୍ପଙ୍କ ନିର୍ବାଚନ ଅଭିଯାନ ଟିମ୍ ଭାରତୀୟ-ଆମେରିକୀୟ, ଶିଖ୍, ମୁସଲମାନ ଏବଂ ଅନ୍ୟ ଦକ୍ଷିଣ ଏସୀୟ ସମ୍ପ୍ରଦାୟର ଭୋଟରଙ୍କୁ ଆକର୍ଷିତ କରିବା ପାଇଁ ୪ଟି ନୂଆ ସଂଗଠନ ଗଠନ କରିଛନ୍ତି।
