Prameya News7

Prameya News7, News7 Odia, Odisha Latest News, Odisha Current Headlines, Odisha News Online

କରୋନା ସଂପର୍କରେ ଟିକ୍‌ନିଖ୍ ଅପଡେଟ୍‌…

25/03/2020 at 9:46 PM

ଭୁବନେଶ୍ବର୨୫/୩: ବୁଧବାର ଭାରତରେ କରୋନା ନେଇଛି ଆଉ ଏକ ମୁଣ୍ଡ ।  ଯେଉଁ ବ୍ୟକ୍ତିଙ୍କ ମୃତ୍ୟୁ ଘଟିଛି ତାଙ୍କର କୌଣସି ବିଦେଶ ଭ୍ରମଣର ହିଷ୍ଟ୍ରି ନାହିଁ ।  କିନ୍ତୁ ସେ କରୋନା ପଜିଟିଭ୍ ବ୍ୟକ୍ତିଙ୍କ ସଂସ୍ପର୍ଶରେ ଆସି ଆକ୍ରାନ୍ତ ହୋଇଥିଲେ । ଚେନ୍ନାଇର ଏହି ବ୍ୟକ୍ତିଙ୍କ ବୟସ ୫୪ ବର୍ଷ । 

ତେବେ ସେ ପୂର୍ବରୁ ବିଭିନ୍ନ ରୋଗରେ ଆକ୍ରାନ୍ତ ଥିଲେ ବୋଲି ଜଣାପଡିଛି। ଏହାକୁ ମିଶାଇ ଦେଶରେ କରୋନା ମୃତ୍ୟୁ ସଂଖ୍ୟା ୧୧ ଛୁଇଁଛି। ସାରା ଦେଶରେ ଏଯାଏ କରୋନା ପଜିଟିଭ୍ ସଂଖ୍ୟା ୫୬୨ ରେ ପହଞ୍ଚିଛି । ଆଜି ତାମିଲନାଡୁରେ ୫ ଜଣ ପଜିଟିଭ୍ ଚିହ୍ନଟ ହୋଇଛନ୍ତି। ସେପଟେ ମହାରାଷ୍ଟ୍ର ପୁଣେରେ ସର୍ବପ୍ରଥମ କରୋନା ଆକ୍ରାନ୍ତ ଦୁଇଜଣ ସଂପୂର୍ଣ୍ଣ ଆରୋଗ୍ୟ ହୋଇ ଘରକୁ ଫେରିଛନ୍ତି । ଦେଶରେ କରୋନା ମୁକାବିଲା ପାଇଁ କେନ୍ଦ୍ର ସରକାର ଏକ ବଡ ପ୍ୟାକେଜ ଘୋଷଣା କରିପାରନ୍ତି । ଏନେଇ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସହ ଅର୍ଥମନ୍ତ୍ରାଳୟ ଏବଂ RBI ର ଆଲୋଚନା ଚାଲିଛି । ଆଜି ପ୍ରଧାନମନ୍ତ୍ରୀ କରୋନା ସଂପର୍କରେ ଆଲୋଚନା ପାଇଁ କ୍ୟାବିନେଟ ବୈଠକ ଡାକିବା ସହ ସାମାଜିକ ଦୂରତ୍ବ ଉପରେ ଗୁରୁତ୍ବ ଦେଇଛନ୍ତି ।

ସେପଟେ ଓଡ଼ିଶାରେ କରୋନା ଆକ୍ରାନ୍ତଙ୍କ ସଂଧ୍ୟା ସେଇ ୨ ରହିଛି । ଦୁଇ ଆକ୍ରାନ୍ତଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି । ଆଜି ସୁଦ୍ଧା ୧୩୩ ଜଣଙ୍କ ସାମ୍ପଲ ଟେଷ୍ଟ କରାଯାଇଛି । ୧୨୯ ଜଣଙ୍କ ରିପୋର୍ଟ ଆସିଥିବା ବେଳେ ୪ ଜଣଙ୍କ ରିପୋର୍ଟକୁ ଅପେକ୍ଷା କରାଯାଇଛି । ପଂଜିକରଣ କରିଥିବା ୪୦୧୫ ଜଣ ବିଦେଶ ଫେରନ୍ତାଙ୍କ ଉପରେ ନଜର ରଖାଯାଇଛି । ସେମାନଙ୍କ ମଧ୍ୟରୁ ୩୬ ଜଣ ହସ୍ପିଟାଲ ଆଇସୋଲେସନରେ ଅଛନ୍ତି । ୭୮ ହଜାର ୨୩୩ ଜଣ ବିଭିନ୍ନ ରାଜ୍ୟରୁ ଓଡ଼ିଶା ଆସିଛନ୍ତି । ସେମାନଙ୍କ ମଧ୍ୟରୁ ଯେ କେହି କରୋନାରେ ଆକ୍ରାନ୍ତ ହୋଇନାହାନ୍ତି ସେ କଥା ଭାବିବା ଭୁଲ ବୋଲି କହିଛନ୍ତି ରାଜ୍ୟ ସରକାରଙ୍କ କରୋନା ସଂପର୍କୀତ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ।  

କରୋନା ମୁକାବିଲା ନେଇ ବୁଧବାର ଏକ ବଡ଼ ଘେ‌ାଷଣା କରିଛନ୍ତି ମୁଖ୍ୟମନ୍ତ୍ରୀ ।ସରକାରୀ ଡାକ୍ତରଖାନାରେ ନିୟୋଜିତ ଡାକ୍ତର ଓ ସ୍ୱାସ୍ଥ୍ୟକର୍ମୀଙ୍କୁ ଉତ୍ସାହିତ କରିବା ଲାଗି ସେମାନଙ୍କୁ ୪ ମାସର ଆଗୁଆ ଦରମା ଦେବାକୁ ଘୋଷଣା କରିଛନ୍ତି। ଏପ୍ରିଲ, ମେ, ଜୁନ୍ ଓ ଜୁଲାଇ ମାସର ଦରମା ଏପ୍ରିଲ ମାସରେ ମିଳିବ। ପ୍ରତିକୂଳ ପରିସ୍ଥିତିରେ ରୋଗୀଙ୍କୁ ସେବା ଯୋଗାଉଥିବା ହେତୁ ସମସ୍ତ ସ୍ୱାସ୍ଥ୍ୟକର୍ମୀଙ୍କୁ ମଧ୍ୟ ପ୍ରଶଂସା କରିଛନ୍ତି ମୁଖ୍ୟମନ୍ତ୍ରୀ। ଏହାସହ ମୁଖ୍ୟମନ୍ତ୍ରୀ ଚେତେଇ ଦେଇଛନ୍ତି ଯେ ଯେଉଁମାନେ ଡାକ୍ତର ଓ ସ୍ୱାସ୍ଥ୍ୟକର୍ମୀଙ୍କ କାର୍ଯ୍ୟରେ ଅଯଥା ଦଖଲ ଦେବେ ଓ ସେମାନଙ୍କୁ ଦୁର୍ବବ୍ୟବହାର କରିବେ, ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। କରୋନ ଭାଇରସ ସହ ମୁକାବିଲା ପାଇଁ ମୁଖ୍ୟମନ୍ତ୍ରୀ ୩ ସ ଉପରେ ଗୁରୁତ୍ବ ଦେଇଛନ୍ତି । ସେଗୁଡିକ ହେଲା ସମ୍ବନ୍ଧନ, ସଂଗରୋଧ ଏବଂ ସମ୍ମାନ ।

   Related Posts