ଲକ୍ଷ୍ନୌ ୨୩/୧୦ : ଦେଶର ବିଭିନ୍ନ ସ୍ଥାନରେ ଜାରି ରହିଥିବା ଚାଷୀ ଆନ୍ଦୋଳନ ଧିରେ ଧିରେ ଶିଥିଳ ପଡିବାରେ ଲାଗିଛି । ୟୁପି ସୀମାରେ କୃଷକମାନଙ୍କ ମାନେ କୁଡିଆ କରି ରହୁଥିବା ବେଳେ ସେଗୁଡିକୁ ପ୍ରଶାସନ ପକ୍ଷରୁ ହଟାଇଦିଆଯାଇଛି । କିନ୍ତୁ ଏବେବି ସେଠାରେ ରାସ୍ତା ଖୋଲିନାହିଁ । ଲୋକମାନଙ୍କ ଚଳପ୍ରଚଳ ମଧ୍ୟ ସ୍ବାଭାବିକ ହୋଇନାହିଁ । ଏବେବି ୨୪ ନମ୍ବର ଜାତୀୟ ରାଜପଥ ବନ୍ଦ ହୋଇ ରହିଛି। ଗାଜିଆବାଦରୁ ଦିଲ୍ଲୀ ଓ ନୋଏଡ଼ା ଯିବାପାଇଁ ଲୋକଙ୍କୁ ପ୍ରତିଦିନ ବହୁ ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି । ୟୁପି ସୀମାରେ ଏବେବି ତ୍ରୀସ୍ତରୀୟ ବ୍ୟାରିକେଡ୍ ରହିଛି । ବ୍ୟାରିକେଡ୍କୁ ଲାଗି ଚାଷୀ ରହୁଥିବା କୁଡିଆଗୁଡିକ ମଧ୍ୟ ରହିଥିଲା । ଯାହାକୁକି ଏବେ ହଟାଇଦିଆଯାଇଛି । ଗତବର୍ଷ ନଭେମ୍ବର ୨୬ ତାରିଖରୁ ଚାଷୀମାନେ ସେଠାରେ ଧାରଣାରେ ବସିରହିଛନ୍ତି । ଏହାଦ୍ୱାରା ସର୍ବସାଧରଣ ହିଁ ଅସୁବିଧାର ସମ୍ମୁଖୀନ ହେଉଛନ୍ତି । ଜରୁରୀ କାମରେ ଯାଉଥିବା ବ୍ୟକ୍ତି ଅନ୍ୟ ରାସ୍ତା ଦେଇ ଯାଆସ କରୁଛନ୍ତି ।
ଗାଜିଆବାଦ ନୋଏଡ଼ା ଆଦି ଅଞ୍ଚଳରୁ ପ୍ରତିଦିନ ବହୁ ଲୋକ ବିଭିନ୍ନ କାମରେ ଦିଲ୍ଲୀ ଆସୁଛନ୍ତି ଏବଂ ଦିଲ୍ଲୀରୁ ବିଭିନ୍ନ ସ୍ଥାନରୁ ଫେରନ୍ତି । କିନ୍ତୁ ଦିଲ୍ଲୀ, ନୋଏଡ଼ାକୁ ଆସୁଥିବା ଲୋକମାନେ ଏବେ ଅତିଷ୍ଟ ହୋଇଗଲେଣି । ରାସ୍ତା ବନ୍ଦ ଥିବାରୁ ବାଧ୍ୟ ହୋଇ ଅନ୍ୟ ପଟେ ଯିବା ଆସିବା କରୁଛନ୍ତି । ପୂର୍ବରୁ ନୋଏଡ଼ା ରୁ ଦିଲ୍ଲୀ ଯିବା ପାଇଁ ଯେଉଁଠି ମାତ୍ର ୨୦ ମିନିଟ ସମୟ ଲାଗୁଥିବା ଏବେ ଘଣ୍ଟା ଘଣ୍ଟା ଧରି ଲୋକମାନେ ଅନ୍ୟ ରାସ୍ତାଦେଇ ବୁଲିବୁଲି ଆସିବାକୁ ପଡୁଛି । ସେପଟେ ରାସ୍ତା ଆଦୌ ଅବରୋଧ ହୋଇନଥିବା କହିଛନ୍ତି କୃଷକ ନେତା । ସର୍ବସାଧାରଣ ଯାଆସ ପାଇଁ ରାସ୍ତା ସମ୍ପୂର୍ଣ୍ଣ ଭାବେ ଖୋଲା ଅଛି ବୋଲି ଚାଷୀ ସ୍ପଷ୍ଟୋକ୍ତି ଦେଇଛନ୍ତି ।
ୟୁପି ପ୍ରବେଶ ପଥରେ ଲଗାଯାଇଥିବା ବ୍ୟାରିକେଡ୍ ପାଇଁ ରାଜ୍ୟ ସରକାରଙ୍କୁ ସିଧାସଳଖ ଦୋଷ ଦେଇଛନ୍ତି ଚାଷୀ । କୃଷକ ନେତାଙ୍କ କହିବା କଥା ବ୍ୟାରିକେଡ୍ର ଆଦୌ ଆବଶ୍ୟକତା ନଥିଲା । ଚାଷୀମାନେ କୌଣସି ପ୍ରକାର ଅପ୍ରୀତିକର ପରିସ୍ଥିତି ସୃଷ୍ଟି କରୁନଥିଲେ । କିନ୍ତୁ ରାଜ୍ୟ ସରକାର ଜାଣିଶୁଣି ଲୋକଙ୍କୁ ଭଡକାଇବା ପାଇଁ ବ୍ୟାରିକେଡ୍ ତିଆରି କରିଥିଲା ।
ଏଠାରେ ସର୍ଭିସ ରୋଡ଼ ଏବଂ ଯାଆସ କରିବା ପାଇଁ ରାସ୍ତା ନଖୋଲିବାରୁ ଲୋକଙ୍କର ସମସ୍ୟା ବଢ଼ିଯାଇଛି । ଭାରତୀୟ କୃଷକ ୟୁନିଅନର ରାଷ୍ଟ୍ରୀୟ ପ୍ରବକ୍ତା ରାକେଶ ଟିକାୟତ କହିଛନ୍ତି, ''ଆମ ହାତରେ କିଛି ନାହିଁ। ଚାଷୀଙ୍କ ପକ୍ଷରୁ କୌଣସି ରାସ୍ତା ବନ୍ଦ କରାଯାଇନାହିଁ। ଜାଣିଶୁଣୀ ଚାଷୀଙ୍କ ମୁଣ୍ଡର ଦୋଷ ଲଦାଯାଉଛି ।''
