Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ସୀମାରେ ପାକ୍‌ର ଆଉ ଏକ ଉଦ୍ୟମ ଭଣ୍ଡୁର, ମିଳିଲା ଦେଢଶହ ମିଟର ଦୀର୍ଘ ଭୂତଳ ସୁଡ଼ଙ୍ଗ

29/08/2020 at 6:06 PM

ସାମ୍ବା ୨୯।୮:  ଜମ୍ମୁ-କାଶ୍ମୀର ଶାମ୍ବା ସେକ୍ଟରରେ ସୀମା ସୁରକ୍ଷା ବଳ (ବିଏସଏଫ) ପାକିସ୍ତାନର ଆଉ ଏକ ଆତଙ୍କବାଦୀ ଅନୁପ୍ରବେଶ ଚାଲକୁ ବିଫଳ କରିଦେଇଛନ୍ତି। ଅନ୍ତର୍ଜାତୀୟ ସୀମାରୁ କାଶ୍ମୀର ଭିତରକୁ ୧୫୦ ମିଟର ଦୀର୍ଘ ଏକ ଭୂତଳ ସୁଡ଼ଙ୍ଗକୁ ଶୁକ୍ରବାର ଖୋଜି କାଢିଛନ୍ତି ଯାହାକୁ ପାକିସ୍ତାନ ପଟରୁ ଭାରତ ଭିତରକୁ ଖୋଳାଯାଇଥିଲା। ଏହି ରାସ୍ତାରେ ଆତଙ୍କବାଦୀଙ୍କୁ ଭାରତ ଭିତରକୁ ପଠାଇବାର ଉଦ୍ୟମ ପୂର୍ବରୁ ବିଏସଏଫ ଏହାକୁ ପୋତିଛି।

ବେଶ୍ ସତର୍କତାର ସହ ଏହି ସୁଡ଼ଙ୍ଗ ଖୋଳାଯାଇଥିଲା। ଯାହାକୁ ବାଲି ବସ୍ତାରେ ଘୋଡାଇ ରଖାଯାଇଥିବା ଦେଖାଯାଇଛି।  ଏଥିଲାଗି ଯେଉଁ ବସ୍ତା ବ୍ୟବହାର କରାଯାଇଛି ସେଥିରେ ପାକିସ୍ତାନୀ କମ୍ପାନୀର ନାଁ ରହିଛି। ଟନେଲ ମାଟିରୁ ୨୫ ଫୁଟ ତଳେ ଖୋଳାଯାଇଥିବା ବେଳେ ଥରକେ ୩ରୁ ୪ ଜଣ ଲୋକଙ୍କୁ ପଠାଇପାରିବା ଭଳି ହୋଇଛି।

ତେବେ ସୀମାରେ ଏତେବଡ ଟନେଲ ପାକିସ୍ତାନୀ ରେଞ୍ଜର୍ସ ଓ ଅନ୍ୟ ଏଜେନ୍ସୀଙ୍କ ବିନା ଅନୁମତିରେ ଖୋଳିବା ସମ୍ଭବ ନୁହେଁ ବୋଲି ବିଏସଏଫ ଅଧିକାରୀ ଅନୁମାନ କରୁଛନ୍ତି। ଏବେ ସୁଡଙ୍ଗକୁ ବିଏସଏଫ ଜେସିବି ଲଗାଇ ଖୋଳାତଡା କରୁଛନ୍ତି। ଏହାକୁ ବିଏସଏଫ ଗୁରୁତ୍ୱର ସହ ଗ୍ରହଣ କରିଥିବା ବେଳେ ଆଖପାଖ ଅଞ୍ଚଳରେ କୁମ୍ବିଂ ଅପରେସନ ଚଳାଯାଇଛି।

ବିଏସଏଫ ପକ୍ଷରୁ ମିଳୁଥିବା ସୂଚନା ଅନୁସାରେ ଏହି ସୁଡ଼ଙ୍ଗ ପାକିସ୍ତାନ ଚେକ ପୋଷ୍ଟରୁ ୪୦୦ ମିଟର ଦୂରରେ ଭାରତ ଭିତରକୁ ପ୍ରାୟ ୪୫୦ ଫୁଟ ଖୋଳାଯାଇଛି। ଏହାର ଚୌଡା ୩ରୁ ୪ଫୁଟ ରହିଛି। ଯେଉଁ ବାଲି ବସ୍ତା ରଖି ସୁଡଙ୍ଗର ମୁହଁ ଢଙ୍କା ଯାଇଥିଲା ସେହି ବ୍ୟାଗ୍‌ରେ ଏସଏବିଜେଡ୍ ଛପା ରହିଛି। ଯାହା ପାକିସ୍ତାନ କରାଚୀର ଏକ ସରକାରଖାନା ଆଗ୍ରୋ ପଲିମରର ବୋଲି ଦେଖାଯାଇଛି। ବିଏସ୍ଏଫ ଆଇଜି ଏନ.ଏସ୍.ନରୱାଲଜୋ ଏହାକୁ ପୁରା ଇଞ୍ଜିନିୟରିଂରେ ଖୋଳାଯାଇଥିବାର କହିଛନ୍ତି। ତେବେ କେବଳ ଏଠାରେ ନୁହେଁ ସୀମାର ଅନ୍ୟ ସ୍ଥାନରେ ବି ପାକିସ୍ତାନୀ ଏପରି ସୁଡ଼ଙ୍ଗ କରିଥାଇ ପାରନ୍ତି ବୋଲି ଏବେ ଆଶଙ୍କା ବଳବତ୍ତର ହୋଇଛି ଏଣୁ ସାରା ସୀମାରେ କଡାକଡି ଯାଞ୍ଚ ଚାଲିଛି।

   Related Posts