ବ୍ରହ୍ମପୁର୨/୩: ବ୍ରହ୍ମପୁରଠାରେ ଥିବା ରାଜ୍ୟର ଏକମାତ୍ର ଜେଲ୍ ଟ୍ରେନିଂ ସ୍କୁଲକୁ ଅନ୍ୟତ୍ର ସ୍ଥାନାନ୍ତର କରିବାକୁ ଯୋଜନା ହେଉଥିବା ଅଭିଯୋଗ ହୋଇଛି । ଏହାକୁ ନେଇ ସହରବାସୀଙ୍କ ଭିତରେ ଅସନ୍ତୋଷ ଦେଖାଦେଇଛି । କାରଣ ପୂର୍ବରୁ ଓଆରଟି, ଇଣ୍ଡିଆନ୍ ଅଏଲ, ଷ୍ଟେଟ୍ ଫାଇନାନ୍ସ କମ୍ପାନୀ ଭଳି ସଂସ୍ଥାଗୁଡ଼ିକୁ ପ୍ରର୍ଯ୍ୟାୟକ୍ରମେ ବ୍ରହ୍ମପୁରରୁ ଉଠାଇ ନିଆଯାଇଥିବା ବେଳେ ଏବେ ଜେଲ୍ ଟ୍ରେନିଂ ସ୍କୁଲ ସ୍ଥାନାନ୍ତର ଆଶଙ୍କାରେ ତେଜ୍ ହୋଇଛି ବିରୋଧର ସ୍ବର ।
୧୯୮୪ରେ ବ୍ରହ୍ମପୁରରେ ପ୍ରତିଷ୍ଠା ହୋଇଥିଲା ରାଜ୍ୟର ଏକମାତ୍ର ଓଡ଼ିଶା କାରା ପ୍ରଶିକ୍ଷଣ ବିଦ୍ୟାଳୟ । ଆଙ୍କୁଲି ନିକଟରେ ପ୍ରାୟ ୨୦ଏକର ଜମିରେ ଏହାର ନିର୍ମାଣ କରାଯାଇଥିଲା । ଏଠାରୁ ଏପର୍ଯ୍ୟନ୍ତ ୫୦ ବ୍ୟାଚ୍ରୁ ଅ୍ରଧିକ ପ୍ରଶିକ୍ଷକ ପାସ୍ ଆଉଟ୍ ହୋଇଛନ୍ତି । ଏହି କାରାପ୍ରଶିକ୍ଷଣ ବିଦ୍ୟାଳୟରେ ଓ୍ବାର୍ଡ଼ର, ସବ୍ ଆସିଷ୍ଟାଣ୍ଟ୍ ଜେଲରଙ୍କୁ ତାଲିମ ଦିଆଯାଉଥିବା ବେଳେ ଯୋଗ୍ୟତା ସମ୍ପନ୍ନ ଶିକ୍ଷକଙ୍କୁ ନିଯୁକ୍ତି ଦିଆଯାଇଛି ।
ଏହାର ଭିତ୍ତିଭୂମି ମଧ୍ୟ ଖୁବ୍ ସୁଦୃଢ଼ ରହଛି । ତଥାପି ଏବେ ଯେତେବେଳେ ଏହି ଜେଲ୍ ଟ୍ରେନିଂ ସ୍କୁଲକୁ ବ୍ରହ୍ମପୁରରୁ ଖୋର୍ଦ୍ଧା ଜାମୁଝରୀକୁ ସ୍ଥାନାନ୍ତର କରିବାକୁ ସରକାରୀ ସ୍ତରରେ ମସୁଧା ଚାଲିଛି ସେତେବେଳେ ଏହାକୁ ନେଇ ସହରବାସୀଙ୍କ ଭିତରେ ତେଜ୍ ହୋଇଛି ବିରୋଧର ସ୍ବର। ଦକ୍ଷିଣାଞ୍ଚଳ ରାଜସ୍ବ କମିଶନରଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କୁ ସ୍ମାରକପତ୍ର ପ୍ରଦାନ କରିଛି ଗଞ୍ଜାମଜିଲ୍ଲା ବିକାଶ ମଞ୍ଚ ।
ବ୍ରହ୍ମପୁରରୁ ଜେଲ୍ ଟ୍ରେନିଂ ସ୍କୁଲକୁ ସ୍ଥାନାନ୍ତର କରାଗଲେ ଜୋର୍ଦାର ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛି ଗଞ୍ଜାମ ଜିଲ୍ଲା ବିକାଶ ମଞ୍ଚ । ସେପଟେ ଏ ବାବଦରେ ସରକାରଙ୍କ ସହ ଆଲୋଚନା କରି ସମସ୍ୟାର ସମାଧାନ କରାଯିବ ବୋଲି କହିଛନ୍ତି ସ୍ଥାନୀୟ ବିଧାୟକ ଓ ସାଂସଦ ।
