ଯାଜପୁର୨୪|୪ (ସୁରେନ୍ଦ୍ର ସାମଲ): ଯାଜପୁର ବିଧାନସଭା ଆସନରେ ପ୍ରଚାର ଶିଖର ଛୁଇଁଛି । ଶେଷ ପର୍ଯ୍ୟାୟ ମତଦାନରେ ଆସୁଥିବା ଏହି ବିଧାନସଭା ଆସନରେ ରୋଚକ ସ୍ଥିତିରେ ରାଜନୈତିକ ପାଣିପାଗ । ଜିତିବାକୁ ତିନି ପ୍ରମୁଖ ଦଳ ବିଜେଡ଼ି , ବିଜେପି ଏବଂ କଂଗ୍ରେସ ଆଣ୍ଟାଭିଡିଛନ୍ତି । ତେବେ ବିଧାନସଭା ଲଢେଇରେ ସମତାକ୍ରାନ୍ତୀ ଦଳ , କଳିଙ୍ଗସେନା ସହ ସ୍ବାଧୀନ ପ୍ରାର୍ଥୀ ବି ଅଛନ୍ତି । କିଏ ପୁରୁଣା ପ୍ରାର୍ଥୀକୁ ପୁଣି ଭରସା କରି ଟିକେଟ ଦେଇଛି ତ ଆଉ କିଏ ନୂଆ ମୁହଁ ଉପରେ ଆସ୍ଥା ପ୍ରକଟ କରିଛି । ହାର ଜିତ୍ର ଅଙ୍କ କଷା ଜାରି ଥିବା ବେଳେ, ମତଦାନର ଦିନକୁ ଅପେକ୍ଷା ।
{"id":106922}ପ୍ରାର୍ଥୀ ଅନେକ, କିନ୍ତୁ ଲଢେଇ ତ୍ରିକୋଣୀୟ । ଯାଜପୁର ବିଧାନସଭା ଆସନରେ ଏଥର ଭୋଟ ଲଢେଇରେ ତିନି ପ୍ରମୂଖ ଦଳଙ୍କ ପ୍ରାର୍ଥୀ ହିଁ ପ୍ରମୂଖ ପ୍ରତିଦ୍ବନ୍ଦ୍ବି । ଲଗାତର ଭାବେ ଏହି ଆସନ ଜିତିଆସୁଥିବା ବିଜୁ ଜନତା ଦଳ ଏହି ଆସନରେ ପୁଣି ବିଧାୟକ ପ୍ରଣବ ପ୍ରକାଶ ଦାସଙ୍କୁ ପ୍ରାର୍ଥୀ କରିଛି । ଜିତିଲେ ସେ କରିବେ ହ୍ୟାଟ୍ରିକ୍ ।
{"id":106924}ତେବେ ୨୦୦୯ ଏବଂ ୨୦୧୪ ଠାରୁ ଭିନ୍ନ ୨୦୧୯ । ଏଥର ମୁକାବିଲା କଡା ହେବା ଆଶଙ୍କା ବେଶି । ସେପଟେ ୨୦୧୪ର ପ୍ରାର୍ଥୀଙ୍କୁ ଏବେ ରିପିଟ କରିନି ବିଜେପି । ଜଗନ୍ନାଥ ପ୍ରସାଦ ସାମଲଙ୍କ ବଦଳରେ ବିଜେପିର ପ୍ରାର୍ଥୀ ହୋଇଛନ୍ତି, ଯାଜପୁର ବିଜେପି ଜିଲ୍ଲା ସଭାପତି ଗୌତମ ରାୟ । ଗୋତମ ରାୟ ୨୦୦୯ରେ ବିଜେପି ପ୍ରାର୍ଥୀ ହୋଇ ହାରିଥିଲେ । ତେବେ ଗୌତମଙ୍କ ସାଂଗଠନିକ ଦକ୍ଷତାକୁ ନେଇ ପୁଣି ତାଙ୍କୁ ଭରସା କରିଛି ଭାରତୀୟ ଜନତା ପାର୍ଟି । ନିର୍ବାଚନ ମଣ୍ଡଳୀର ବିକାଶ ସହ ରାଜ୍ୟ ସରକାରଙ୍କ ଯୋଜନା ସବୁ ପ୍ରଣବଙ୍କୁ ପୁଣି ବିଜୟ ଆଶାବାଦୀ କରିଛି । ସେପଟେ ମୋଦୀଙ୍କର ଲୋକପ୍ରିୟତା ଓ ବିକାଶ ମୁଖୀ କାର୍ଯ୍ୟକୁ ଆଧାର କରି ବିଜୟ ଲକ୍ଷ୍ୟ ରଖିଛନ୍ତି ଗୌତମ ।
{"id":106923}ସେପଟରେ ଗତ ଦୁଇ ନିର୍ବାଚନରେ ହାରି ଥିଲେ ବି ଦୁଇ ନମ୍ବରରେ ରହିଥିବା କଂଗ୍ରେସ ପ୍ରାର୍ଥୀ ସନ୍ତୋଷ ନନ୍ଦଙ୍କୁ ଦଳ ଏଥର ବି ପ୍ରାର୍ଥୀ କରିଛି । ପ୍ରଚାରରେ ଉଭୟ ବିଜେଡି ଏବଂ ବିଜେପିକୁ ତୀବ୍ର ଆକ୍ଷେପ କରୁଛନ୍ତି କଂଗ୍ରେସ ପ୍ରାର୍ଥୀ । ବିଜେଡ଼ି - ବିଜେପି ଭାଇ- ଭାଇ ଓ ସେମାନେ ଅନ୍ୟାୟ ଏବଂ ଦୁର୍ନୀତି ର ଚରମସୀମାରେ ପହଞ୍ଚିଥିବା ଆକ୍ଷେପ କରୁଛନ୍ତି ସନ୍ତୋଷ । ସେହି ଆଧାରରେ ଏଥର ସେ ସଫଳତା ନେଇ ଆଶାବାଦୀ ।
{"id":106925}ଯାଜପୁରରେ ଚତୁର୍ଥ ପର୍ଯ୍ୟାୟରେ , ଏପ୍ରିଲ ୨୯ ରେ ହେବ ମତଦାନ । ମୋଟ ୨ ଲକ୍ଷ ୨୩ ହଜାର ୨୩୦ ମତଦାତା ୨୬୩ ବୁଥ୍ରେ ସେମାନଙ୍କ ମତାଧିକାର ସାବ୍ୟସ୍ତ କରିବେ । ସେମାନେ ହିଁ ବାଛିବେ କିଏ ୨୦୧୯ ର ଯାଜପୁର ବିଧାନସଭା ପ୍ରତିନିଧି ।