ଭୁବନେଶ୍ବର ୧୫।୧୧: ଭୁବନେଶ୍ବର ଉଦୟଗିରି ପର୍ଯ୍ୟଟନସ୍ଥଳୀରେ ଟିକେଟ୍ କଳାବଜାରୀ ପ୍ରସଙ୍ଗରେ ପ୍ରତିକ୍ରିୟା ରଖିଲେ ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ । ନ୍ୟୁଜ୍ ସେଭେନର ଷ୍ଟିଙ୍ଗ୍ ଅପରେସନର ଭିଜୁଆଲର ଅନୁଧ୍ୟାନ କରାଯିବ। ଏଥିରେ ସତ୍ୟତା ଥିଲେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ।
ଗତକାଲି ନ୍ୟୁଜ୍ ସେଭେନ୍ ଏହି ଖବର ପ୍ରସାରଣ କରିଥିଲା । ଜୈନ କିର୍ତ୍ତୀରାଜି ସଂପନ୍ନ ଉଦୟଗିରିରେ ପର୍ଯ୍ୟଟକଙ୍କ ପାଇଁ ଥିବା ଟିକେଟ ବ୍ୟବସ୍ଥାରେ ଚାଲିଥିବା କେଳେଙ୍କାରୀର ପର୍ଦ୍ଦାଫାସ କରିଥିଲା । କିଛି କର୍ମଚାରୀ, ସିକ୍ୟୁରିଟି ଗାର୍ଡ ଓ ଗାଇଡଙ୍କ ମିଲି ଭଗତରେ ଗ୍ରୁପ୍ ଟିକେଟ୍ ରିସାଇକ୍ଲିଂ କରାଯାଇ ଦୈନିକ ହଜାର ହଜାର ଟଙ୍କା କିଛି ଲୋକ ହଜମ୍ କରୁଥିବାର ଷ୍ଟିଙ୍ଗ୍ ଭିଡିଓ ଆମେ ଦେଖାଇଥିଲୁ । ଏହାପରେ ପରେ ଉଦୟଗିରିରେ ଟିକେଟ୍ ବ୍ୟବସ୍ଥାକୁ କଡାକଡି କରାଯାଇଥିଲା । ତେବେ ଯେଉଁମାନେ ଏମିତି କେଳେଙ୍କାରୀ କରୁଥିଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ବିଭିନ୍ନ ମହଲରୁ ଦାବି ହେଉଥିଲା। ଆଉ ଆଜି ମନ୍ତ୍ରୀ ଏନେଇ ପ୍ରତିକ୍ରିୟା ରଖି କାର୍ଯ୍ୟାନୁଷ୍ଠାନର ଆଭାସ ଦେଇଛନ୍ତି।