ଗଜପତି ୨୧/୧୦ : ତିତିଲି ପଲିଟିକ୍ସର ଏପିସେଣ୍ଟର ପାଲଟିଛି ଜିରୋ କାଜୁଆଲିଟି କଣ୍ଟ୍ରୋଭର୍ସି । ଲ୍ୟାଣ୍ଡ ସ୍ଲାଇଡ୍ ରେ ମୃତ୍ୟୁସଂଖ୍ୟା ଚିନ୍ତାର ବାହାରକୁ ଯିବା ଦେଖି ପାହାଡରେ ବସବାସ କରୁଥିବା ଆଦିବାସୀଙ୍କୁ ସମତଳ ସ୍ଥାନରେ ଥଇଥାନ ପାଇଁ ସରକାର ଯେଉଁ ଘୋଷଣା କରିଛନ୍ତି ତାକୁ ଏବେ ବିରୋଧ ଆରମ୍ଭ କଲେଣି କଂଗ୍ରେସ ଓ ବିଜେପି । ଏହା ଏକ ଅବାସ୍ତବ ଚିନ୍ତା ବୋଲି ବିରୋଧି ବିଜେପି ଓ କଂଗ୍ରେସର ମତ । ବିଜେଡି କିନ୍ତୁ କହୁଛି ଏହା ଭଲ ପଦକ୍ଷେପ ହେବ । ବାତ୍ୟାରେ ଜିରୋ କାଜୁଆଲିଟି ଥିଲା କିନ୍ତୁ ବର୍ଷାରେ ହିଁ ଯାହା ଜୀବନ ଗଲା । ତେଣୁ ଏଣିକି ପାହାଡ ଉପରେ ରହୁଥିବା ଗାଁ ଲୋକଙ୍କୁ ସମତଳ ଅଂଚଳକୁ ଆଣିବାକୁ ବ୍ୟବସ୍ଥା ହେବ । ସରକାରଙ୍କ ଏଭଳି ଚିନ୍ତାଧାରାକୁ ନେଇ ବିରୋଧି କଂଗ୍ରେସ ଓ ବିଜେପି ଖପ୍ପା । ବିଶେଷକରି ଗଜପତି ଜିଲ୍ଲା ଗସ୍ତ ବେଳେ ମୁଖ୍ୟମନ୍ତ୍ରୀ ନବୀନ ପଟନାୟକଙ୍କ ଏଭଳି ଘୋଷଣାକୁ ଅବାସ୍ତବ ଚିନ୍ତାଧାରା ବୋଲି କହିଛନ୍ତି ବିରୋଧି । ନଗଡାରେ ଅପପୁଷ୍ଟି ମୃତ୍ୟୁ ପରେ ସରକାର ସେଠିକା ଅଧିବାସୀଙ୍କୁ ପାହାଡରୁ ତଳକୁ ଆଣିବାକୁ ଯେଉଁ ଘୋଷଣା କରିଥିଲେ ତାହା ଫ୍ଲପ ମାରିଲା । ଏବେ ପୁଣି ସରକାରଙ୍କ ଏହି ଘୋଷଣା ଏକ ପ୍ରହେଳିକା ବୋଲି ବିରୋଧି କହିଛନ୍ତି । ତେବେ ବିଜେଡିର ଯୁକ୍ତି ବାତ୍ୟା ପର ବର୍ଷାରେ ଯେଉଁ ଭୂସ୍ଖଳନ ହେଲା ତାହା ହିଁ ଅଧିକ ଧନ ଜୀବନ ନଷ୍ଟ କଲା । ତେଣୁ ପାହାଡରେ ରହୁଥିବା ପାଖାପାଖି ୩୦୦ ଗାଁର ଲୋକଙ୍କୁ ତଳକୁ ଆଣି ଥଇଥାନ କରିବା ପାଇଁ ସରକାର ଯେଉଁ ଚିନ୍ତା କରୁଛନ୍ତି ତାହା ସ୍ବାଗତ ଯୋଗ୍ୟ । ବାସ୍ତବରେ ପାହଡରେ ବସବାସ କରୁଥିବା ଆଦିବାସୀଙ୍କୁ ତଳକୁ ଆଣିବା ସରକାରଙ୍କ ପାଇଁ ବଡ଼ ଚ୍ୟାଲେଂଜ ହେବ। ତେଣୁ ଏହାର କାର୍ଯ୍ୟକାରିତା ମାଧ୍ୟମରେ ବିରୋଧୀଙ୍କୁ ଜବାବ ଦେଇପାରିବେ ସରକାର।