ମେଲବର୍ଣ୍ଣ ୨୬/୧୨ : ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୪ ମ୍ୟାଚ୍ ବିଶିଷ୍ଟ ଟେଷ୍ଟ୍ ସିରିଜ୍‌ର ଦ୍ବିତୀୟ ମୁକାବିଲା ଐତିହାସିକ ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ଜାରି ରହିଛି । ଏହି ମ୍ୟାଚ୍‌ରେ ଅଷ୍ଟ୍ରେଲିଆ ଅଧିନାୟକ ଟିମ୍ ପେନ୍‌ଙ୍କ ରନଆଉଟକୁ ନେଇ ବିବାଦ ଦେଖାଦେଇଛି । ପେନ୍‌ଙ୍କ ଆଉଟକୁ ନେଇ ଥାର୍ଡ ଅମ୍ପାୟାରଙ୍କ ନିଷ୍ପତ୍ତିକୁ ନେଇ ସମସ୍ତେ ଆଶ୍ଚର୍ଯ୍ୟ ହୋଇଛନ୍ତି । ପ୍ରଥମେ ବ୍ୟାଟିଂ କରିଥିବା ଅଷ୍ଟ୍ରେଲିଆ ୫୪ତମ ଓଭରରେ ଅଧିନାୟକ ଟିମ୍ ପେନ୍‌ ଆଉଟ ହୋଇଥିଲେ । କିନ୍ତୁ ଥାର୍ଡ୍ ଅମ୍ପାୟାର ପୋଲ ଓ୍ବିଲସନ୍ ତାଙ୍କୁ ନଟଆଉଟ୍ ଘୋଷଣା କରିଥିଲେ ।

ଅମ୍ପାୟାରଙ୍କ ଏହି ନିଷ୍ପତ୍ତିକୁ ନେଇ ପୂର୍ବତନ କ୍ରିକେଟର ଏବଂ ପ୍ରଶଂସକମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ସୋସିଆଲ ମିଡିଆରେ ପ୍ରଶଂସକମାନେ ଏହାକୁ ଜୋରଦାର ସମାଲୋଚନା କରିଛନ୍ତି । ଅଷ୍ଟ୍ରେଲିଆ ଇଂନିସର ୫୪ ତମ ଓଭରରେ ରବିଚନ୍ଦ୍ରନ ଅଶ୍ବିନୀଙ୍କ ବଲରେ ଟିମ୍ ପେନ୍‌ ଏକ ସଟ୍ ଖେଳିଥିଲେ । ତେବେ କ୍ୟାମରେନ୍ ଗ୍ରୀନ ଏବଂ ଟିମ୍ ପେନ୍‌ଙ୍କ ମଧ୍ୟରେ ବୁଝାମଣା ଅଭାବରୁ କ୍ରିଜ୍‌ରେ ପହଞ୍ଚିବା ଆଗରୁ ଓ୍ବିକେଟ୍‌କିପର ଋଷଭ ପନ୍ତ ତାଙ୍କୁ ରନ୍‌ଆଉଟ କରିଦେଇଥିଲେ ।

ଭାରତୀୟ ଖେଳାଳିମା​‌ନେ ଅପିଲ କରିବା ପରେ ପଡିଆ ଅମ୍ପାୟାର ଥାର୍ଡ ଅମ୍ପାୟାରଙ୍କୁ ରିଭ୍ୟୁ ପାଇଁ ଇସାରା କରିଥିଲେ । ଭିଡିଓକୁ ଦେଖିସାରିବା ପରେ ଥାର୍ଡ୍ ଅମ୍ପାୟାର ଓ୍ବିଲସନ୍‌ ନଟଆଉଟ୍ ଘୋଷଣା କରିଥିଲେ । ଏହା ପରେ ସୋସିଆଲ ମିଡିଆରେ ଜୋରଦାର ସମାଲୋଚନା ହେଉଛି । ଅଷ୍ଟ୍ରେଲିଆର ମହାନ କ୍ରିକେଟର ସେନ୍ ଓ୍ବାର୍ଣ୍ଣ୍ ଟ୍ବିଟ୍ କରି କହିଛନ୍ତି ଯେ, ଏହା ଆଉଟ ଥିଲା । ଆଶ୍ଚର୍ଯ୍ୟର କଥା ହେଉଛି ଥାର୍ଡ ଅମ୍ପାୟାର ଏହାକୁ ନଟଆଉଟ୍ ଘୋଷଣା କରିଥିଲେ’ ।