ଅନୁଗୁଳ ୨୩/୧୦ : ଖୁବ ହଲାପଟା କଲାଣି ସୁନ୍ଦରୀ । ସୁନ୍ଦରୀକୁ କାବୁ କରିବା ଲାଗି ଜୋରଦାର ପ୍ରୟାସ ଜାରି ରହିଛି । ବିଶେଷଜ୍ଞଙ୍କ ସହ ଟ୍ରାଙ୍କୁଲାଇଜ୍ ଟିମ୍ , ବନ ବିଭାଗର ଟିମ୍ ସୁନ୍ଦରୀ ଉପରେ ଲଗାତର ନଜର ରଖିଛନ୍ତି ।
ଟ୍ରାଙ୍କୁଲାଇଜିଂ ଟିମ୍ ଛକିକି ରହିଛନ୍ତି। ସମୟ ଦେଖି କାବୁ କରାଯିବ। କୋଠଭୂଇଁ ପଞ୍ଚାୟତ କୁମୁରି ଗାଁ ନିକଟରେ ଚାଲିଛି ଅପରେସନ । ଓୟୁଏଟିର ଗୋଟିଏ ଓ ନନ୍ଦନକାନନର ୩ ଟି ଟିମ୍ କୁମୁରୀ ଗାଁରେ ଡେରା ପକାଇ ବାଘର ଗତିବିଧି ଉପରେ ନଜର ରଖିଛନ୍ତି ଟିମ୍ ରେ ୬ ଜଣିଆ ସଦସ୍ୟ। ସୁନ୍ଦରୀକୁ ଟ୍ରେସ୍ କରାଯାଇଛି । ସୁବିଧା ଦେଖି ଟ୍ରାଙ୍କୁଲାଇଜ୍ କରାଯିବ । ଏଥିପାଇଁ କୁମୁରି ଗାଁରେ ବ୍ୟାପକ ପୋଲିସ ଫୋର୍ସ ମୁତୟନ ବି କରାଯାଇଛି । ଲୋକଙ୍କୁ ବାହାରକୁ ନବାହାରିବା କୁହାଯାଇଥିବା ବେଳେ ଗାଁ ଲୋକଙ୍କ ସହାୟତା ବି ନେଉଛି ବନ ବିଭାଗ ।
ସୁନ୍ଦରୀକୁ ଟ୍ରାଙ୍କୁଲାଇଜିଂ କରାଯାଇ ରାଇଗଡ଼ ଏନକ୍ଲୋଜରକୁ ଆଣାଯିବ । ସେଠାରେ ତା ଗତିବିଧି ଅନୁଧ୍ୟାନ କରାଯିବ । ଜାତୀୟ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଓ ଜାତୀୟ ବନ୍ୟପ୍ରାଣୀ ସଂସ୍ଥାନ ସହ ପରାମର୍ଶ ପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ ବୋଲି ପିସିସିଏଫ୍ କହିଛନ୍ତି ।
ବାଘୁଣୀ ସୁନ୍ଦରୀକୁ ଟ୍ରାଙ୍କୁଲାଇଜ୍ କରି ସାତକୋଶିଆ ବାହାରକୁ ନେବାକୁ ଅନୁଗୋଳ ଜିଲ୍ଲାପାଳ ଜଙ୍ଗଲ ଓ ପରିବେଶ ବିଭାଗକୁ ଚିଠି ଲେଖିଥିଲେ । ତେଣୁ ସେହି ଅନୁସାରେ ଜଙ୍ଗଲ ବିଭାଗ କାମ କରୁଛି । ସଂଧ୍ୟା ସୁଦ୍ଧା ସୁନ୍ଦରୀକୁ କାବୁ କରିବାକୁ ଯୋଜନା ରହିଛି ।