ନୂଆଦିଲ୍ଲୀ, ୦୫।୦୯: ଚଳିତ ବର୍ଷ ୟୁଏଇରେ ଖେଳାଯିବ ଆଇପିଏଲ-୨୦୨୦ । ତେବେ ଆଇପିଏଲର ଷ୍ଟାର୍ ପ୍ଲେୟାର ସୁରେଶ ରାଅନା, ଲସିଥ ମାଲିଙ୍ଗା ଓ ହରଭଜନ ଆଦି ଖେଳାଳି ଚଳିତ ବର୍ଷ ଆଇପିଏଲ ଖେଳିବେ ନାହିଁ । ବିଭିନ୍ନ ଟିମ୍ ପକ୍ଷରୁ ସେମାନଙ୍କୁ ଦଳରେ ସାମିଲ କରାଯାଇଥିଲେ ମଧ୍ୟ ବ୍ୟକ୍ତିଗତ କାରଣରୁ ଏହି ଖେଳାଳିମାନେ ଆଇପିଏଲଠୁ ଦୂରରେ ରହିଛନ୍ତି । ଆସନ୍ତୁ ନଜର ପକାଇବା କେଉଁ କେଉଁ ଖେଳାଳି ଆଇପିଏଲରୁ ବାହାରି ଆସିଛନ୍ତି ।
ହରଭଜନ ସିଂ
ସିଏସକେରେ ସାମିଲ ହୋଇଥିବା ହରଭଜନ ସିଂ ବ୍ୟକ୍ତିଗତ କାରଣ ଦର୍ଶାଇ ଆଇପିଏଲରୁ ଓହରି ଯାଇଛନ୍ତି । ଏହି ସମୟରେ ସେ ପରିବାର ସହ ସମୟ ବିତାଇବାକୁ ଚାହାଁନ୍ତି । ଏହାସହ ସେ ସିଏସକେ ମ୍ୟାନେଜନମେଣ୍ଟକୁ ମଧ୍ୟ ଧନ୍ୟବାଦ ଜଣାଇଛନ୍ତି ।
ଲସିଥ୍ ମାଲିଙ୍ଗା
ମୁମ୍ବାଇ ଦଳର ପେସର୍ ଲସିଥ ମାଲିଙ୍ଗା ନିଜ ପରିବାର ସହ ସମୟ ବିତାଇବାକୁ ଚାହାଁନ୍ତି । ତେଣୁ ତାଙ୍କୁ ଚଳିତ ବର୍ଷ ଆଇପିଏଲରେ ଦେଖିବାକୁ ମିଳିବ ନାହିଁ ।
ସୁରେଶ ରାଇନା
ଆଇପିଏଲ ଖେଳିବା ପାଇଁ ୟୁଏଇ ଗସ୍ତ କରିଥିଲେ ମଧ୍ୟ ରାଇନା ଭାରତ ଫେରି ଆସିଥିଲେ । ଯାହାକୁ ନେଇ ବିବାଦ ସୃଷ୍ଟି ହୋଇଥିଲା । ସେ ନିଜ କୋଠରୀକୁ ନେଇ ଅସନ୍ତୁଷ୍ଟ ଥିବା ସୂଚନା ମିଳିଥିଲା । କିନ୍ତୁ ସେ ପାରିବାରିକ କାରଣ ଦର୍ଶାଇ ଓହରିଥିବା ଟ୍ୱିଟ୍ ଯୋଗେ ପ୍ରକାଶ କରିଥିଲେ ।
ଜାସନ୍ ରଏ
ଇଂଲଣ୍ଡର ଏହି ଖେଳାଳି ଆହତ ଜନିତ ସମସ୍ୟା ପାଇଁ ଚଳିତ ବର୍ଷ ଆଇପିଏଲରୁ ବାଦ୍ ପଡିଛନ୍ତି । ସେ ଦିଲ୍ଲୀ କ୍ୟାପିଟାଲ୍ସ ତରଫରୁ ଖେଳୁଥିଲେ ।
କ୍ରିସ୍ ଓ୍ୱକେସ୍
ଇଂଲଣ୍ଡ ଅଲରାଉଣ୍ଡର କ୍ରିସ୍ ଓ୍ୱକେସ୍ ମଧ୍ୟ ଦିଲ୍ଲୀ କ୍ୟାପିଟାଲସ ତରଫରୁ ଖେଳିଥାନ୍ତେ । କିନ୍ତୁ ଆହତ ସମସ୍ୟା ପାଇଁ ସେ ଆଇପିଏଲ-୨୦୨୦ ଖେଳିବେ ନାହିଁ ।
କେନ୍ ରିଚାର୍ଡସନ୍
ଅଷ୍ଟ୍ରେଲିଆ ଖେଳାଳି କେନ୍ ରିଚାର୍ଡସନ୍ ମଧ୍ୟ ଆଇପିଏଲ-୨୦୨୦ରୁ ଓହରିବା ପାଇଁ ନିଷ୍ପତ୍ତି ନେଇଛନ୍ତି । ସେ ରୟାଲ ଚାଲେଞ୍ଜର୍ସ ବାଙ୍ଗାଲୋର ପକ୍ଷରୁ ଖେଳିଥାନ୍ତେ । କିନ୍ତୁ ନିକଟରେ ସେ ପିତା ହୋଇଥିଲେ । ତେଣୁ ନବଜନ୍ମିତ ଶିଶୁ ପାଇଁ ସେ ଆଇପିଏଲରୁ ଓହରିଥିବା ଜଣାପଡିଛି । ଏନେଇ ଟିମ୍ ପକ୍ଷରୁ ସୂଚନା ଦିଆଯାଇଛି ।
ହ୍ୟାରୀ ଗୁରନଏ
ଇଂଲଣ୍ଡର ଏହି ବାମହାତୀ ସିମର୍ ଚଳିତ ବର୍ଷ ଆଇପିଏଲ ଖେଳିବେ ନାହିଁ । ସେ କୋଲକାତା ନାଇଟ୍ ରାଇଡର୍ସ ତରଫରୁ ଖେଳିଥାନ୍ତେ । ତାଙ୍କ କାନ୍ଧରେ ଆଘାତ ଲାଗି ଥିବାରୁ ସେ ଟିମ୍ରୁ ବାଦ୍ ପଡିଛନ୍ତି ।