ଏଥର କଟକ ବାଲିଯାତ୍ରାରେ ଦୋଳି ଲାଗିବା ନେଇ ସନ୍ଦେହ, ଯାତ୍ରାକୁ ଡଷ୍ଟ ଫ୍ରି କରିବା ପାଇଁ ଯୋଜନା
Published By : Prameya-News7 Bureau | November 13, 2018 IST
କଟକ୧୩|୧୧: ବାଲିଯାତ୍ରାକୁ ନେଇ ଉପୁଯିଥିବା ବିବାଦ କେତେକାଂଶରେ ଥମିଛି । କିନ୍ତୁ ଦୋଳିର ଟେଣ୍ଡର କରିବାଲାଗି ପ୍ରଶାସନ ଯେଉଁ ନିଷ୍ପତ୍ତି ନେଇଛି , ତାକୁ ଏବେବି ବିରୋଧ କରୁଛି ବାଲିଯାତ୍ରା ବ୍ୟବସାୟୀ ସଂଘ । ଏଭଳି ହେଲେ ଯାତ୍ରାରେ ବିଶୃଂଖଳା ହେବ । ସାଧାରଣ ଲୋକ ମହଙ୍ଗାମାଡର ଶୀକାର ହେବେ ବୋଲି କହିଛି ସଂଘ । ସେପଟେ ଯାତ୍ରାର ସୁପରିଚାଳନା ପାଇଁ ଅଣ୍ଟା ଭିଡିଛି ସି ଏମ୍ ସି । ଚଳିତ ବର୍ଷ ବାଲିଯାତ୍ରାକୁ ଡଷ୍ଟ ଫ୍ରି ବା ଧୁଳିମୁକ୍ତ କରିବାଲାଗି ଏକ ନୂଆ ପଦକ୍ଷେପ ନେବାକୁ ଯୋଜନା କରିଛି କଟକ ମହାନଗର ନିଗମ ।
ବାଲିଯାତ୍ରାରେ ବ୍ୟବସାୟ କରିବାକୁ ଜିଲ୍ଲା ପ୍ରଶାସନର ଅସ୍ଥାୟୀ କାର୍ଯ୍ୟାଳୟ ଆଗରେ ବ୍ୟବସାୟୀଙ୍କ ଭିଡ ଜମିଲାଣି । ଷ୍ଟଲ ବୁକିଂକୁ ନେଇ ଯେଉଁ ବିବାଦ ଦେଖାଦେଇଥିଲା, ତାର ସମାଧାନ ପରେ ଏବେ ଯାତ୍ରାପଡିଆ ଚଳଚଞ୍ଚଳ ହୋଇଉଠିଛି । ସେପଟେ କିନ୍ତୁ ବାଲିଯାତ୍ରାରେ ଚଳିତ ବର୍ଷ ଦୋଳି ଲାଗିବକି ନାହିଁ, ତାକୁ ନେଇ ଏକ ପ୍ରକାର ଅନିଶ୍ଚିତା ଲାଗି ରହିଛି । କାରଣ ଦୋଳିର ଟେଣ୍ଡର କରିବାକୁ ପ୍ରଶାସନ ନିଷ୍ପତ୍ତି ନେଇଛି । ସେଥିଲାଗି ଯାହାବି କିଛି ଓୌପଚାରିକତା ପୂରଣ କରାଯିବା କଥା ତାହା ମଧ୍ୟ ଶେଷ ହୋଇଛି । ହେଲେ ପ୍ରଶାସନର ଏଭଳି ନିଷ୍ପତ୍ତିକୁ ବିରୋଧ କରୁଛି ବାଲିଯାତ୍ରା ବ୍ୟବସାୟୀ ସଂଘ । ଏଭଳି ହେଲେ ଯାତ୍ରାରେ ବିଶୃଂଖଳା ହେବା ସହ ସାଧାରଣ ଲୋକ ମହଙ୍ଗା ମାଡର ଶୀକାର ହେବେ ବୋଲି ଅଭିଯୋଗ କରିଛି ସଂଘ ।
ତେବେ ବାଲିଯାତ୍ରାର ସଫଳ କରିବାକୁ ପ୍ରଶାସନିକ ସ୍ତରରେ ତତ୍ପରତା ବଢିବାରେ ଲାଗିଛି । ମଙ୍ଗଳବାର ଜିଲ୍ଲାପାଳ, ଡି ସି ପି, ସି ଏମ୍ ସି କମିଶନରଙ୍କ ସମେତ ପ୍ରାୟ ସମସ୍ତ ବିଭାଗର ଅଧିକାରୀ ମାନେ କ୍ଷେତ୍ର ପରିବର୍ଶନ କରିଛନ୍ତି । ଯାତ୍ରା ସମୟରେ ଟ୍ରାଫିକ ମ୍ୟାନେଜମେଣ୍ଟ କିପରି ହେବ, ଭିଡ ନିୟନ୍ତ୍ରଣ ପାଇଁ କି ପ୍ରକାର ପଦକ୍ଷେପ ନିଆଯାଇପାରିବ, ତା ଉପରେ ଗୁରୁତ୍ବ ଦେଇଛି ପ୍ରଶାସନ । ଏହା ଛଡା ଚଳିତ ବର୍ଷ ବାଲିଯାତ୍ରାକୁ ଡଷ୍ଟ ଫ୍ରି ବା ଧୁଳିମୁକ୍ତ କରିବା ଲାଗି ଏକ ନୂଆ ପଦକ୍ଷେପ ନେବାକୁ ଯୋଜନା କରିଛି କଟକ ମହାନଗର ନିଗମ ।
ତେବେ ବାଲିଯାତ୍ରାରେ ସବୁ ବିଭାଗର କିପରି ସମ୍ପୃକ୍ତି ରହିପାରିବ, ଏବଂ ବ୍ୟବସାୟୀଙ୍କ ସହ କିଭଳି ଉତ୍ତମ ସମନ୍ବୟ ରକ୍ଷା କରାଯାଇପାରିବ, ତାକୁ ଲକ୍ଷରେ ରଖି ମଙ୍ଗଳବାର ଜିଲ୍ଲା ପ୍ରଶାସନ ଦ୍ବୁତୀୟ ସମନ୍ବୟ ବୈଠକ କରିଛି ।