ନୂଆଦିଲ୍ଲୀ ୦୫/୧୨ : କରୋନାର ନୂଆ ଭ୍ୟାରିଆଣ୍ଟ ଏବେ ସାରା ବିଶ୍ବକୁ ଆତଙ୍କିତ କରି ରଖିଛି । ଓମିକ୍ରନ୍ ଭ୍ୟାରିଆଣ୍ଟ ଏବେ ଗୋଟିଏ ଦେଶରୁ ଅନ୍ୟ ଦେଶଗୁଡିକୁ ବ୍ୟାପିବାରେ ଲାଗିଛି । ବର୍ତ୍ତମାନ ଭାରତରେ ମଧ୍ୟ ଓମିକ୍ରନ୍ ଭ୍ୟାରିଆଣ୍ଟ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧିପାଇବାରେ ଲାଗିଛି । ତେଣୁ ଏଥିରୁ ଜଣାପଡୁଛି ଯେ ଦେଶରେ ତୃତୀୟ ଲହର ଆସିବା ଆପାତତ୍ ଥୟ ।
ବର୍ତ୍ତମାନ ସୁଦ୍ଧା ଭାରତରେ ମୋଟ ୫ ଜଣ ଓମିକ୍ରନ ଭ୍ୟାରିଆଣ୍ଟ କରୋନା ଆକ୍ରାନ୍ତ ଚିହ୍ନଟ ହୋଇସାରିଲେଣି । ବିଶେଷଜ୍ଞଙ୍କ କହିବା କଥା ଯେ, ଆସନ୍ତା ବର୍ଷ ଜାନୁଆରୀ ଶେଷ ସପ୍ତାହ କିମ୍ବା ଫେବୃଆରୀ ପ୍ରଥମ ସପ୍ତାହରେ ଦେଶରେ ଓମିକ୍ରନ୍ ଭ୍ୟାରିଆଣ୍ଟ ପିକ୍ରେ ରହିପାରେ । ଅର୍ଥାତ ଏହା ହେଲେ ଭାରତରେ କରୋନା ସଂକ୍ରମଣ ତୀବ୍ର ମାତ୍ରାରେ ବୃଦ୍ଧି ପାଇବ । IITର ବରିଷ୍ଠ ବୈଜ୍ଞାନିକ ପଦ୍ମଶ୍ରୀ ପ୍ରଫେସର ମଣୀନ୍ଦ୍ର ଅଗ୍ରଓ୍ବାଲ ତାଙ୍କର ନୂଆ ଅଧ୍ୟୟନରେ ଏହି ଦାବି କରିଛନ୍ତି ।
ବିଶ୍ବର ଅନେକ ବଡ ବଡ ବୈଜ୍ଞାନିକଙ୍କ ମତରେ ଆସନ୍ତା ଜାନୁଆରୀ ମାସ ଶେଷ ସୁଦ୍ଧା ଭାରତରେ କରୋନା ପୁଣି ଥରେ କାୟା ବିସ୍ତାର କରିବ । ଅବଶ୍ୟ ଦ୍ବିତୀୟ ଲହର ଅପେକ୍ଷା ତୃତୀୟ ଲହର ଏତେଟା ଘାତକ ହେବ ନାହିଁ ତଥାପି ଓମିକ୍ରନ୍ ଭ୍ୟାରିଆଣ୍ଟ ଯୋଗୁଁ ଏହା ବିପଦପୂର୍ଣ୍ଣ ହୋଇପାରେ । ପ୍ରଫେସର ମଣୀନ୍ଦ୍ର ଅଗ୍ରଓ୍ବାଲ ନିଜ ଅଧ୍ୟୟନରୁ ଦାବି କରିଛନ୍ତି ଯେ, ଦ୍ବିତୀୟ ଲହର ତୁଳନାରେ ତୃତୀୟ ଲହର କମ ଘାତକ ହେବ । ନିଜ ଗାଣିତିକ ମଡେଲ ସୂତ୍ର ଆଧାରରେ ଏପରି ଦାବି କରିଛନ୍ତି ପ୍ରଫେସର ଅଗ୍ରଓ୍ବାଲ । ପୂର୍ବରୁ ପ୍ରଫେସର ମଣୀନ୍ଦ୍ର ଅଗ୍ରଓ୍ବାଲ ହିଁ ନିଜ ଅଧ୍ୟୟନ ବଳରେ କହିଥିଲେ ଯେ, ଦ୍ବିତୀୟ ଲହର ପରେ ତୃତୀୟ ଲହର ଆସିବ ।
ତୃତୀୟ ଲହର ଆସିବା ନେଇ ପ୍ରଫେସୀ ଅଗଓ୍ବାଲ ଯେଉଁ ଆକଳନ କରିଥିଲେ ତାହା ସତ ହେବାକୁ ଯାଉଛି । ଦକ୍ଷିଣ ଆଫ୍ରିକାରୁ ବ୍ୟାପୁଥିବା ଓମିକ୍ରନ୍ ଭ୍ୟାରିଆଣ୍ଟ ହିଁ ତୃତୀୟ ଲହରର ମୁଖ୍ୟ କାରଣ ହେବ ବୋଲି ସେ କହିଛନ୍ତି । ଏହା ସହିତ ତୃତୀୟ ଲହର ଯେତେବେଳେ ପିକ୍ରେ ରହିବ ସେତେବେଳେ ଭାରତରେ ଦୈନିକ ଆକ୍ରାନ୍ତଙ୍କ ସଂଖ୍ୟା ଲକ୍ଷେରୁ ଦେଢ ଲକ୍ଷ ଯାଏଁ ରହିବାର ସମ୍ଭାବନା ରହିଛି ।
ତେବେ ଆଶ୍ବସ୍ତୀକର ତଥ୍ୟ ଯାହାକି ପ୍ରଫେସର ଅଗ୍ରଓ୍ବାଲଙ୍କ ଅଧ୍ୟୟନରୁ ଜଣାପଡିଛି ତାହା ହେଉଛି ତୃତୀୟ ଲହର ଛୋଟ ଛୋଟ ପିଲାମାନଙ୍କ ଉପରେ କମ ପ୍ରଭାବ ପକାଇବ । ଶିଶୁଙ୍କ ଶରୀରରେ ଲକ୍ଷଣ ମଧ୍ୟ କମ ଦେଖାଯିବ । ଯଦି ବି ଶିଶୁ କରୋନାରେ ସଂକ୍ରମିତ ହୁଅନ୍ତି ତେବେ ସେମାନେ ଖୁବଶୀଘ୍ର ଏହାକୁ ମାତ୍ ଦେବେ । ଏହା ସହିତ ସେ ଆଉ ଏକ ଆଶ୍ବସ୍ତୀକର ତଥ୍ୟ ଦେଇଛନ୍ତି । ଓମିକ୍ରନ୍ ଭ୍ୟାରିଆଣ୍ଟରେ ଆକ୍ରାନ୍ତ ହେଉଥିବା ବ୍ୟକ୍ତିମାନେ ଶୀଘ୍ର ସୁସ୍ଥ ମଧ୍ୟ ହେବେ । ସେମାନଙ୍କ ଶରୀରରେ କମ ଲକ୍ଷଣ ଦେଖାଯିବ । ଦ୍ବିତୀୟ ଲହର ଅପେକ୍ଷା ଅଧିକ ଚିନ୍ତାଜନକ ହେବ ନାହିଁ । ଏହା ସହିତ ତୃତୀୟ ଲହର ଆସିଲେ ଦେଶରେ ସମ୍ପୂର୍ଣ୍ଣ ଲକଡାଉନ୍ କରିବାର ଆବଶ୍ୟକତା ପଡିବନି ।
