ନୀଳଗିରି୧୨/୦୬: ବାଲେଶ୍ୱର ଜିଲ୍ଲା ନୀଳଗିରି ଅଞ୍ଚଳରେ ଜଣେ ଯୁବକ ଟିକ୍ଟକ୍ ଭିଡିଓ ତିଆରି କରି ଗିରଫ ହେବା ଚର୍ଚ୍ଚାର ବିଷୟ ହୋଇଛି । ନୀଳଗିରି ଆମ୍ବୁଡିହା ଅଞ୍ଚଳର କ୍ୟାପଟେନ ରାଜପୁତ୍ ଓରଫ ଅର୍ଦ୍ଧେନ୍ଦୁ ସହ କଟକ ଦରଘାସାହି ସୂତାହାଟ ଅଞ୍ଚଳର ଆରତି ସାହୁ ନାମକ ଯୁବତୀଙ୍କର ପରିଚୟ ହୋଇଥିଲା । ଏହାପରେ ଉକ୍ତ ଯୁବତୀ ସହ ଅର୍ଦ୍ଧେନ୍ଦୁ ଟିକ୍ଟକ୍ ଭିଡିଓ ତିଆରି କରି ଆସୁଥିଲେ । କୌଶଳ କ୍ରମେ ତାଙ୍କର ମୋବାଇଲ ନମ୍ବର ଆଣି ତାଙ୍କୁ ଅଶ୍ଳୀଳ ଭାଷା ଲେଖିବାରୁ ଯୁବତୀ ଜଣକ ବିରୋଧ କରିଥିଲେ ।
ଯୁବକ ଜଣକ ଏସିଡ୍ ପକାଇ ମାରିଦେବାର ଧମକ ଦେବା ପରେ କଟକ ଦରଘାବଜାର ଥାନାରେ ଯୁବତୀ ଜଣକ ଅଭିଯୋଗ କରିଥିଲେ । ପରେ ୨୯୪, ୫୦୭, ୩୪, ୬୭, ୬୭ (ଏ) ଧାରାରେ ୬୮ ନଂର ମାମଲା ରୁଜୁ ହୋଇ ତଦନ୍ତ ଜାରି ଥିଲା । ଅଭିଯୁକ୍ତକୁ ନୀଳଗିରି ପୁଲିସ ଗିରଫ କରି ଦରଘାବଜାର ପୁଲିସକୁ ହସ୍ତାନ୍ତର କରିଛି ।