ଭୁବନେଶ୍ଵର ୨୦।୦୪: ଦିଲ୍ଲୀ ଲକଡାଉନ୍ ପରେ ସେଠାରୁ ବିଭିନ୍ନ ରାଜ୍ୟକୁ ପ୍ରବାସୀ ଶ୍ରମିକ ଫେରିବା ଆରମ୍ଭ କଲେଣି । ବସଷ୍ଟାଣ୍ଟରେ ଶହ ଶହ ଲୋକ ଭିଡ ଲଗାଇଛନ୍ତି । ସାମାଜିକ ଦୂରତା ନାହିଁ କି ମୁହଁରେ ମାସ୍କ ନାହିଁ । ବସରେ ଲୋକ ଅସମ୍ଭବ ଭାବରେ ଖୁନ୍ଦାଖୁନ୍ଦି ହୋଇ ଯାଉଛନ୍ତି, ଏଥିଯୋଗୁ କିଛି ସ୍ଥାନରେ ଦୁର୍ଘଟଣା ବି ହେଉଛି। ଓଡିଶାକୁ ମଧ୍ୟ ପ୍ରବାସୀମାନେ ଫେରିବା ଆରମ୍ଭ କଲେଣି । ଗତବର୍ଷର ଚିତ୍ର ପୁଣି ତାଜା ହୋଇଛି । ଯାହା ଚିନ୍ତା ବଢାଇଛି ।
ମାହାମାରୀ ଫେରିଛି, ସଙ୍କଟ ଫେରିଛି, ପୁଣି ସେହି ଦୃଶ୍ୟ ସାମ୍ନାକୁ ଆସିଛି ଦିଲ୍ଲୀ ରାଜପଥରେ। ଦିଲ୍ଲୀ ଲକଡାଉନ ଆଜି ପ୍ରଥମ ଦିନ । ବଜାର, ମଲ୍ ସବୁ ବନ୍ଦ । କିନ୍ତୁ ଦିଲ୍ଲୀ ଗାଜିଆବାଦ ସୀମାରେ ଜମିଛି ପ୍ରବାସୀଙ୍କ ଭିଡ଼ । ଗତକାଲି ସଂଧ୍ୟାରୁ ଶ୍ରମିକମାନେ ଦିଲ୍ଲୀ ଛାଡିବା ଆରମ୍ଭ କରିଛନ୍ତି । ମାତ୍ର ୬ଦିନ ପାଇଁ ଲକଡାଉନର କିନ୍ତୁ ଆଉ ମନ ଭରସା ପାଉନି। ଗତବର୍ଷ ଯେଉଁ ଦୁର୍ଦ୍ଦଶା ଦେଖିଛୁ ତାହା ପୁଣି ଯେମିତି ନଆସୁ। ସେହି ଆଶଙ୍କାରେ ପୁଣି ସମସ୍ତେ ରାସ୍ତାକୁ ଓହ୍ଲାଇ ଆସିଛନ୍ତି। ନିଜ ରାଜ୍ୟକୁ ପହଞ୍ଚିବା ଲାଗି ପୁଣି ପ୍ରତିଯୋଗିତା।
{"id":441523,"width":833,"height":626,"sizeSlug":"large","linkDestination":"none"}ନୂଆଦିଲ୍ଲୀ ଷ୍ଟେସନକୁ ପ୍ରବେଶ ବାରଣ କରାଯାଇଛି । ଅନେକ ମେଟ୍ରୋ ଷ୍ଟେସନ ପ୍ରବେଶ ଉପରେ ମଧ୍ୟ କଟକଣା ଲାଗିଛି । ଫଳରେ ଦିଲ୍ଲୀ ସୀମା ସ୍ଥିତ ବସଷ୍ଟାଣ୍ଡରେ ଗହଳି ବଢି ଯାଇଛି । ତେଣୁ କରୋନା ସଂକ୍ରମଣ ବଢିବା ଭୟ ସୃଷ୍ଟି ହୋଇଛି । କିଏ ବସ ଛାତ ଉପରେ ଚଢିଛି, କିଏ ଲଟକିଛି । ସାମାଜିକ ଦୂରତା କଥା ଛାଡନ୍ତୁ ଅନେକଙ୍କ ମୁହଁରେ ମାସ୍କ ବି ନାହିଁ ।
ବସରେ ଯାତ୍ରୀ ଖୁନ୍ଦା ଖୁନ୍ଦି ହୋଇ ଯାଉଥିବା ଦେଖିବାକୁ ମିଳୁଛି । ଏମିତି ଏକ ବସ ଦିଲ୍ଲୀରୁ ମଧ୍ୟପ୍ରଦେଶ ଯିବା ବେଳେ ଟିକମଗଡ଼ରେ ଓଲଟି ପଡିଥିଲା। ଫଳରେ ୩ ପ୍ରବାସୀଙ୍କର ମୃତ୍ୟୁ ହୋଇଛି, ୭ ଜଣ ଆହତ ହୋଇଛନ୍ତି। ଏହି ସମୟରେ ବସରେ ଶହେରୁ ଅଧିକ ଲୋକ ଥିଲେ। ଆଉ କିଛି ଶ୍ରମିକ କିଛି ବାଟ ନପାଇ ଚାଲି ଚାଲି ଭିଟାମାଟିକୁ ଫେରୁଛନ୍ତି ।
ଦେଶର ବିଭିନ୍ନ ସ୍ଥାନରେ ଲକଡାଉନ, ସଟଡାଉନ ଲାଗୁ ହୋଇଥିବା ବେଳେ ଓଡିଶାକୁ ମଧ୍ୟ ପ୍ରବାସୀ ଫେରୁଛନ୍ତି। ଯାହା ଚିନ୍ତା ବଢାଇଛି । ଦିଲ୍ଲୀ, ମୁମ୍ବାଇ, ସୁରଟ, ଅହମ୍ମଦାବାଦରୁ ପୁଣି ଘରକୁ ଫେରିଲେଣି ପ୍ରବାସୀ ଶ୍ରମିକ। ଏଥିପାଇଁ ସେସବୁ ସହରରେ ଷ୍ଟେସନରେ ପ୍ରବଳ ଭିଡ଼ ଦେଖାଯାଇଛି। ସେହିପରି ଫେରିବା ପରେ ସେମାନଙ୍କ କିଭଳି ଟେଷ୍ଟ ହେବ । ସେମାନଙ୍କ କ୍ଵାରାଣ୍ଟାଇନ ଏବଂ ଆଇସୋଲେସସନ କିପରି ଠିକ ଭାବରେ ହୋଇପାରିପାରିବ ତାହା ଉପରେ ସରକାର ଗୁରୁତ୍ୱ ଦେବା ଲାଗି ବିଜେପି ଦାବି କରିଛି ।
{"id":441524,"width":835,"height":470,"sizeSlug":"large","linkDestination":"none"}ବିଜେଡି କହିଛି, ସରକାର ତତ୍ପର ଅଛନ୍ତି । ରାଜ୍ୟକୁ ଫେରୁଥିବା ପ୍ରବାସୀମାନଙ୍କର ଟେଷ୍ଟିଂ କରାଯାଉଛି, । ସ୍ଥିତି ପରିଚାଳନା କରିବାକୁ ସରକାର ଓ ପ୍ରଶାସନିକ କଳର ଅଭିଜ୍ଞତା ରହିଥିବା କହିଛି ବିଜେଡି । ତେବେ କଂଗ୍ରେସ ଏହି ସ୍ଥିତି ଲାଗି ଉଭଯ ରାଜ୍ଯ ଏବଂ କେନ୍ଦ୍ର ସରକାରଙ୍କୁ ଟାର୍ଗେଟ କରିଛି ।
ବର୍ଷେ ତଳର ପ୍ରବାସୀ ପଳାୟନ ଚିତ୍ର ପୁଣି ତାଜା ହୋଇ ଯାଇଛି । ଏବେ ପ୍ରବାସୀ ସୁରକ୍ଷିତ ଫେରିବା ସବୁଠୁ ବଡ଼ ଚାଲେଞ୍ଜ । ଆଉ ବଡ଼ ଚ୍ୟାଲେଞ୍ଜ ସେମାନେ ରାଜ୍ୟରେ ପହଞ୍ଚିବା ପରେ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରିବା ଉପରେ ଏବେ ଧ୍ୟାନ ଦିଆଯାଉଛି।