ଭୁବନେଶ୍ୱର ୧୦।୦୩ : ଏଣିକି ରାଜ୍ୟରେ ଦିନ ତାପମାତ୍ରା ବଢ଼ିବ । ୧୨ ତାରିଖରୁ ତାତି ପ୍ରାୟ ୪ରୁ ୬ ଡିଗ୍ରୀ ବଢ଼ିଯିବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ଆଭ୍ୟନ୍ତରୀଣ ଓଡ଼ିଶାର କିଛି ସ୍ଥାନରେ ତାତି ୪୦ ଡିଗ୍ରୀ ଛୁଇଁପାରେ ବୋଲି ପାଣିପାଗ ବିଶେଷଜ୍ଞ ଆକଳନ କରିଛନ୍ତି । ଖାଲି ଦିନ ନୁହଁ, ରାତି ତାପମାତ୍ରା ବି ୨ରୁ ୩ ଡିଗ୍ରୀ ଯାଏ ବଢ଼ିବ ବୋଲି ପୂର୍ବାନୁମାନ ଦିଆଯାଇଛି ।
ଆଞ୍ଚଳିକ ପାଣିପାଗ କେନ୍ଦ୍ରର ବୈଜ୍ଞାନିକ ଡ. ଉମାଶଙ୍କର ଦାସ କହିଛନ୍ତି, ପୁରା ରାଜ୍ୟରେ ଦିନ ତାପମାତ୍ରା ବଢ଼ିବ । ଅଧିକାଂଶ ସ୍ଥାନରେ ଦିନ ତାପମାତ୍ରା ୪ରୁ ୬ ଡିଗ୍ରୀ ଯାଏ ବଢ଼ିବ । ୧୨ ଓ ୧୩ ତାରିଖରେ କିଛି ସ୍ଥାନରେ ତାପମାତ୍ରା ୩୯ ଡିଗ୍ରୀ ଛୁଇଁପାରେ । ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ କହିଛନ୍ତି, ୧୨ରୁ ୧୪ ଭିତରେ ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରା ବହୁତ ବଢ଼ିଯିବ । କିଛି ସ୍ଥାନରେ ତାପମାତ୍ରା ୪୦ଡିଗ୍ରୀ ଛୁଇଁପାରେ ।
ଦକ୍ଷିଣ ପଶ୍ଚିମରୁ ଶୁଷ୍କ ବାୟୁ ପ୍ରବାହିତ ହେବ । ୧୪ ପରଠାରୁ ପୂରା ରାଜ୍ୟରେ ତାପମାତ୍ରା ବଢ଼ିଚାଲିବ । ୧୨ରୁ ୧୪ ତାରିଖ ଭିତରେ ଉପକୂଳରେ ତାପମାତ୍ରା ୩୫ ବା ୩୬ ଡିଗ୍ରୀ ରହିବ ବୋଲି ସେ ପୂର୍ବାନୁମାନ କରିଛନ୍ତି । ସେପଟେ୧୪ ତାରିଖରେ ସୁନ୍ଦରଗଡ଼, ଝାରସୁଗୁଡ଼ା, କେନ୍ଦୁଝର, ମୟୂରଭଞ୍ଜ ଓ ବାଲେଶ୍ୱର ଜିଲ୍ଲାର କିଛି ସ୍ଥାନରେ ସ୍ୱଳ୍ପ ବର୍ଷା ହୋଇପାରେ। ୧୫ରେ ସୁନ୍ଦରଗଡ଼, ଝାରସୁଗୁଡ଼ା, କେନ୍ଦୁଝର, ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର ଓ ଢେଙ୍କାନାଳ ଜିଲ୍ଲାରେ ହାଲୁକା ବର୍ଷା ସମ୍ଭାବନା ଅଛି ।
ଶନିବାର ମାଲକାନଗିରିରେ ଦିନ ତାପମାତ୍ରା ସର୍ବାଧିକ ୩୭.୪ ଡିଗ୍ରୀ ରେକର୍ଡ ହୋଇଛି । ବୌଦ୍ଧରେ ୩୭ ଡିଗ୍ରୀ, ସୋନପୁରରେ ୩୬.୧, ବଲାଙ୍ଗୀରରେ ୩୫.୮, ଟିଟିଲାଗଡ଼ରେ ୩୫.୫, ଭବାନୀପାଟଣାରେ ୩୫.୨, ପାରଳାଖେମୁଣ୍ଡିରେ ୩୫, ରାୟଗଡ଼ାରେ ୩୪.୮, ସମ୍ବଲପୁରରେ ୩୪.୬, ଝାରସୁଗୁଡ଼ାରେ ୩୪.୩ ଓ ନୟାଗଡ଼ରେ ୩୪ଡିଗ୍ରୀ ରେକର୍ଡ ହୋଇଛି ।