ଅନୁଗୋଳ ୨୭।୯: ଅନୁଗୋଳ ପଣସତଇଳା ରାସ୍ତା କଡରୁ ଜଣେ ଶିକ୍ଷକଙ୍କ ମୃତଦେହ ଉଦ୍ଧାର ହୋଇଛି । ଶିକ୍ଷକ ଜଣଙ୍କ ଶୁକ୍ରବାରଠାରୁ ନିଖୋଜ ଥିଲେ । ନିଜ ଭାଇଙ୍କ ସହ ଅନ୍ତୁଳିଆ ବାଉଁସ କିଣିବାକୁ ଯାଇ ଆଉ ଘରକୁ ଫେରି ନଥିଲେ। ଜରପଡା ପୋଲିସ ଘଟଣାର ତଦନ୍ତ କରୁଛି ।
ସୂଚନାଯୋଗ୍ୟ ଯେ, ଅନୁଗୋଳ ପଣସତଇଳା ରାସ୍ତା କଡରୁ ଜଣଙ୍କର ମୃତଦେହ ଉଦ୍ଧାର ହୋଇଛି। ରାସ୍ତା ତଳକୁ ଏକ ବୁଦା ଭିତରେ ମଟର ସାଇକେଲ ପଡିଥିବା ସହ ନିକଟରେ ବ୍ୟକ୍ତିଙ୍କ ମୃତଦେହ ପଡିଛି । ପ୍ରଥମେ ଗାଇଚରାଳି ମୃତଦେହଟିକୁ ଦେଖିଥିଲେ। ପରେ ଜରପଡା ପୋଲିସକୁ ଏ ନେଇ ଖବର ଦିଆଯାଇଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ଘଟଣା ତଦନ୍ତ ଆରମ୍ଭ କରିଛି।
ତେବେ ମୃତକ ଜଣଙ୍କ ମାଛକୁଟା ଗାଁର ପ୍ରଫୁଲ୍ଲ ଭୋଇ ବୋଲି ଜଣାପଡିଛି । ଶୁକ୍ରବାର ସେ ତାଙ୍କ ଭାଇଙ୍କ ସହ ଅନ୍ତୁଳିଆ ବାଉଁଶ କିଣିବା ପାଇଁ ଯାଇଥିଲେ। ତାଙ୍କ ଭାଇ ବାଉଁଶ ଗାଡିରେ ଘରକୁ ଫେରିଥିବା ବେଳେ ସେ ଆଉ ଫେରିନଥିଲେ। ଫଳରେ ତାଙ୍କୁ ବହୁ ଖୋଜାଖୋଜି କରିଥିଲେ ପରିବାରଲୋକ । ତେବେ ରବିବାର ତାଙ୍କର ମୃତଦେହ ରାସ୍ତା କଡରୁ ମିଳିଛି। ଏହା ଦୁର୍ଘଟଣା ଜନିତ ମୃତ୍ୟୁ ବୋଲି ସନ୍ଦେହ କରାଯାଉଛି । ପ୍ରକୃତ ସତ ତଦନ୍ତ ପରେ ଜଣାପଡିବ। ସେ କନ୍ଧକୋଇଲି ଗ୍ରାମ ବିଦ୍ୟାଳୟରେ ଶିକ୍ଷକତା କରୁଥିଲେ ବୋଲି ସୂଚନା ମିଳିଛି।
