ମୁମ୍ବାଇ, ୧୪|୦୬ : ଅଭିନେତା ସୁଶାନ୍ତ ସିଂଙ୍କ ନିଧନରେ ସାରା ବଲିଉଡରେ ଶୋକର ଛାୟା ଖେଳିଯାଇଚି । ଯେଉଁ ଅଭିନେତାଙ୍କୁ ବଲିଉଡର ଜଣେ ଷ୍ଟାର୍ ଭାବେ ଗଣାଯାଉଥିଲା ସେ ନିଜ ଜୀବନ ହାରିଛନ୍ତି । ଚଳିତ ବର୍ଷ ନଭେମ୍ବରରେ ସୁଶାନ୍ତଙ୍କ ବିବାହ ହେବା ନେଇ ସ୍ଥିର ହୋଇଥିବା ଖବର ଆସିଛି ।
ସୁଶାନ୍ତଙ୍କ ଦାଦା ପୁଅ ଭାଇ ପନ୍ନା ସିଂ କହିଛନ୍ତି ଯେ, ଅଭିନେତାଜଣଙ୍କ ଅତିଶୀଘ୍ର ବିବାହ ବନ୍ଧନରେ ବାନ୍ଧି ହୋଇଥାନ୍ତେ । ଘରେ ବିବାହର ପ୍ରସ୍ତୁତି ମଧ୍ୟ ଆରମ୍ଭ ହୋଇଯାଇଥିଲା । ସୁଶାନ୍ତ ବିହାରରେ ଜନ୍ମ ହୋଇଛନ୍ତି । ତାଙ୍କର ଅନେକ ସମ୍ପର୍କୀୟ ମଧ୍ୟ ବିବାହରେ ଯୋଗ ଦେବା ନେଇ ପ୍ରସ୍ତୁତ ହୋଇସାରିଥିଲେ । ଘରେ ଖୁସିର ମାହୋଲ ଥିଲା ।
ତେବେ ସେ କାହାକୁ ବିବାହ କରିଥାନ୍ତେ, କୌଣସୀ ଅଭିନେତ୍ରୀ ନା ମଡେଲ ନା ଆଉ କେହି ତାହା ସ୍ପଷ୍ଟ ହୋଇନାହିଁ । କିନ୍ତୁ ସେ ବିବାହ କରିବା ପାଇଁ ରାଜି ଥିବା ସୂଚନା ମିଳିଛି । ବିବାହ ନଭେମ୍ବରରେ ହେବା ନେଇ ଅଧିକ ସମ୍ବାବନା ଥିଲା । କିନ୍ତୁ ତାଙ୍କ ମୃତ୍ୟୁରେ ପରିବାର ଲୋକେ ଭାଙ୍ଗି ପଡିଛନ୍ତି । ମୁମ୍ବାଇରୁ ବିହାର ଯାଏଁ ଶୋକର ଛାୟା ଖେଳିଯାଇଛି । ସମସ୍ତେ ଏହି ଅଭିନେତାଙ୍କୁ ମନେ ପକାଉଛନ୍ତି ।
ମୁମ୍ବାଇ ପୋଲିସର କହିବାନୁସାରେ, ସୁଶାନ୍ତ ୫ ମାସ ହେଲା ଡିପ୍ରେସନରେ ଥିଲେ । କେଉଁ କାରଣରୁ ସେ ଡିପ୍ରେସନରେ ଥିୱେ ତାହା ଜଣାପଡି ନାହିଁ । ପୋଲିସ ମାମଲାର ତଦନ୍ତ ଜାରି ରଖିଛି ।
