କାହ୍ନାର ସାନ୍ନିଧ୍ୟ ପାଇବାକୁ ସାତକୋଶିଆର କୋର୍ ଏରିଆରେ ବ୍ୟାକୁଳ ସୁନ୍ଦରୀ

Published By : Prameya-News7 Bureau | October 04, 2018 IST

ଅନୁଗୁଳ୪|୧୦: ସାତକୋଶିଆରେ ବାଘୁଣୀ ସୁନ୍ଦରୀକୁ ନେଇ ପୁଣି ଚର୍ଚ୍ଚା । ଏଥର ଚର୍ଚ୍ଚା ସୁନ୍ଦରୀର ହିଂସ୍ର ଅବତାରକୁ ନେଇ ନୁହେଁ, ବରଂ କାହ୍ନା ସହ ପ୍ରେମକୁ ନେଇ । ଆଠମଲ୍ଲିକ ଛାଡି ସୁନ୍ଦରୀ ଏବେ ସାତକୋଶିଆର କୋର୍ ଏରିଆରେ । ସୁନ୍ଦରୀଠାରୁ ମାତ୍ର ଅଳ୍ପ କିଛି ଦୂରରେ ରହିଛି କାହ୍ନା । ଉଭୟଙ୍କ ମଧ୍ୟ‌ରେ ଦୂରତା ଯେତିକି କମୁଛି ସେତିକି ଉତ୍ସାହିତ ହୋଇପଡୁଛନ୍ତି ବନ କର୍ମଚାରୀ ଏବଂ ଓ୍ବାଇଲ୍ଡ ଲାଇଫ୍ ଇନଷ୍ଟିଚ୍ୟୁଟ ଅଫ୍‌ ଇଣ୍ଡିଆର ଟିମ୍ । କାରଣ ଉଭୟଙ୍କ ମିଳନ ହେଲେ ଇତିହାସ ରଚିବ ସାତକୋଶିଆ । କାହ୍ନା ପ୍ରେମରେ ଉବୁଟୁବୁ ସୁନ୍ଦରୀ । କାହ୍ନାର ସାନ୍ନିଧ୍ୟ ପାଇବାକୁ ସାତକୋଶିଆର କୋର୍ ଏରିଆରେ ବ୍ୟାକୁଳ ସୁନ୍ଦରୀ । କାହ୍ନା ମଧ୍ୟ ସୁନ୍ଦରୀ ପ୍ରତି ଆକୃଷ୍ଟ ହେବାରେ ଲାଗିଛି । କାହ୍ନା ସହ ମିଳନ ପରେ ଗର୍ଭବତୀ ହୋଇଥିବା ପୁରୁଣା ବାଘୁଣୀକୁ ଛାଡି ସୁନ୍ଦରୀ ଆଡକୁ ଢଳୁଛି କାହ୍ନା । କାହ୍ନା ଓ ସୁନ୍ଦରୀର ପ୍ରେମକୁ ନେଇ ଉତ୍ସାହିତ ହୋଇପଡିଛନ୍ତି ବନ କର୍ମଚାରୀ ଏବଂ ଓ୍ବାଇଲ୍ଡ ଲାଇଫ୍ ଇନଷ୍ଟିଚ୍ୟୁଟ ଅଫ୍‌ ଇଣ୍ଡିଆର ଟିମ୍ । କାରଣ ପାଞ୍ଚ ୬ ଦିନର ପରିଶ୍ରମ ପରେ ଓ୍ବାଇଲ୍ଡ ଲାଇଫ ଟିମ୍ ବାଘୁଣୀ ସୁନ୍ଦରୀକୁ କୋର୍ ଏରିଆକୁ ନେବାରେ ସଫଳ ହୋଇଛନ୍ତି ଏବଂ କାହ୍ନା ସହ ସୁନ୍ଦରୀର କିପରି ମିଳନ ହେବ ସେଇ ଯୋଜନାରେ ସମସ୍ତେ ଉତ୍କଣ୍ଠିତ ବି ଅଛନ୍ତି। । ଏହାକୁ ଶୁଭସଙ୍କେତ କହିଛନ୍ତି ପରିବେଶ ବିତ୍ । ଜନ ବସତି ନିକଟରେ ସୁନ୍ଦରୀ ବୁଲୁ ନଥିବାରୁ ଆଖପାଖର ଲୋକେ ଆଶ୍ବସ୍ତ ମଧ୍ୟ ହୋଇଛନ୍ତି। ହିଂସ୍ର ଅବତାର ଛାଡି ସୁନ୍ଦରୀ କୋର୍ ଏରିଆରେ ରହୁଥିବାରୁ ତାକୁ ନେଇ ଯେଉଁ ସମସ୍ୟା ଦେଖାଦେଇଥିଲା ତାହା ଦୂର ହୋଇଛି । ସୁନ୍ଦରୀ ଏବେ ଆଠମଲ୍ଲିକ ଛାଡି ପୁରୁଣାକୋଟ ରେଞ୍ଜ୍ ଚୁଆଁରି ନିକଟରେ ଥିବାବେଳେ, ବାଘ କାହ୍ନା ମାତ୍ର ୨ କିଲୋମିଟିର ଦୂର ପମ୍ପାସର ରେଞ୍ଜ୍ ର ଲବଙ୍ଗି ଅଂଚଳରେ ରହିଛି। ତଥାପି ସୁନ୍ଦରୀ ହଟାଅ ଦାବି ହଟିନି । ଏବେବି ସୁନ୍ଦରୀକୁ ଫେରାଇ ନେବାକୁ ଦାବି କରୁଛନ୍ତି ସାତକୋଶିଆ ଆଖପାଖର ଗାଁ ଲୋକ । ତେବେ ଏନେଇ ଆସନ୍ତା ୬ ତାରିଖରେ ପ୍ରଶାସନ ସହ ବୈଠକ ବସିବ ।