ଭୁବନେଶ୍ୱର ୨୪।୧୦ – ଏମ୍ସରେ ଠିକା କର୍ମଚାରୀଙ୍କ ଆତ୍ମହତ୍ୟା । ଭେସଜ ବିଭାଗର ଏକ ରୁମରେ ଭୁବନେଶ୍ବର ଉପକଣ୍ଠ ମୁଣ୍ଡାମୁହାଣ ହରିଜନ ସାହିର ସନ୍ତୋଷ ନାୟକ ନାମକ ଜଣେ କର୍ମଚାରୀଙ୍କ ଆତ୍ମହତ୍ୟାକୁ ନେଇ ଉତ୍ତେଜନା ପ୍ରକାଶ ପାଇଛି ।

 ତେବେ ଏହା ଆତ୍ମହତ୍ୟା ନୁହେଁ ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ପରିବାର ଲୋକେ ଅଭିଯୋଗ କରିଛନ୍ତି । ଖଣ୍ଡଗିରି ଥାନା ପୋଲିସ ଓ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ତେବେ କେଉଁ କାରଣରୁ ଏହି କର୍ମଚାରୀ ଅତ୍ମହତ୍ୟା କଲେ ତାକୁ ନେଇ ପ୍ରଶ୍ନବାଚୀ ।

ସନ୍ତୋଷ ଯେଉଁଠି ଆତ୍ମହତ୍ୟା କରିଥିବା କୁହାଯାଉଛି ସେଠାରେ କୌଣସି ଟେବୁଲ କି ଚେୟାର ନଥିଲା । ତାଙ୍କ ହାତରେ ସ୍କାଲଭେନ୍ ଲାଗିଥିଲା ।  ଏଥିରୁ ଜଣାପଡୁଛି ସେ ସାଲାଇନ୍ ନେଉଥିଲେ ।  ପ୍ରଶ୍ନ ଉଠୁଛି ସନ୍ତୋଷ ସାଲାଇନ୍ କଣ ପାଇଁ ନେଉଥିଲେ ।  ପାରିପାର୍ଶ୍ବିକ ସ୍ଥିତିକୁ ଦେଖିଲେ ଏହା ଆତ୍ମହତ୍ୟା ନୁହେଁ ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ପରିବାର ଲୋକେ ଅଭିଯୋଗ କରିଛନ୍ତି ।

ଦରମା ମିଳୁନଥିବାରୁ  ୧୦ ଦିନ ହେଲା ସନ୍ତୋଷ କାମକୁ ଆସି ନଥିଲେ । କିନ୍ତୁ ବୁଧବାର ରାତି ୯ଟାରେ ସନ୍ତୋଷ କାମକୁ ଯାଉଛି କହି ଘରୁ ଆସିଥିଲେ ।  ଗୁରୁବାର ତାଙ୍କ ମୃତଦେହ ମିଳିଛି । ସେପଟେ ଏହି ଘଟଣା ପରଠୁ  ଗୋଲ୍ଡେନ୍ ଠିକା ସଂସ୍ଥା ମ୍ୟାନେଜରଙ୍କ ପତ୍ତା ମିଳୁନି ।  ଯାହାକୁ ନେଇ ସନ୍ତୋଷଙ୍କ ସହଯୋଗୀ ସ୍ବର ଉଠାଇଛନ୍ତି ।  ପୋଲିସର କିନ୍ତୁ ଏନେଇ ପ୍ରତିକ୍ରିୟା ମିଳିନି । ..

ଖଣ୍ଡଗିରି ଥାନା ପୋଲିସ  ସାଇଣ୍ଟିଫିକ ଟିମ୍ ସହ ଘଟଣାର ତଦନ୍ତ ଚଳାଇଛି।  ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ପୋଲିସ କହିଛି ।