ଢେଙ୍କାନାଳ ୨୧।୦୫: କରୋନା ଯୋଗୁଁ ଜଣେ ଅବସର ପ୍ରାପ୍ତ ରାଜସ୍ୱ କର୍ମଚାରୀ ଆତ୍ମହତ୍ୟା ଉଦ୍ୟମ କରିଛନ୍ତି। ଖୋଦ ଢେଙ୍କାନାଳ ଜିଲ୍ଲାପାଳଙ୍କ କାର୍ଯ୍ୟାଳୟ ପାର୍ଶ୍ଵ ଅବକାରୀ ଅଫିସ ଗଳିରେ ଏପରି ଅଭନୀୟ କାଣ୍ଡ ଘଟିଛି । ସେଠାରେ ଥିବା ବିଦ୍ୟୁତ ଟ୍ରାନ୍ସଫର୍ମରରେ ଚଢି ବିଦ୍ୟୁତ ତାର ଧରି ଏହି ବୃଦ୍ଧ ଜଣଙ୍କ ଆତ୍ମହତ୍ୟା ଉଦ୍ୟମ କରିଥିଲେ । ମାତ୍ର ସୌଭଗ୍ୟବଶତଃ ବିଦ୍ୟୁତ ଝଟକା ଲାଗିବାରୁ ସେ ତଳକୁ ଫୋପାଡ଼ି ହୋଇ ପଡିଥିଲେ। ଏଥିରେ ତାଙ୍କ ଜୀବନ ବଞ୍ଚି ଯାଇଥିବା ଜଣାପଡିଛି । ମାତ୍ର ବିଦ୍ୟୁତ ଝଟକାରେ ତାଙ୍କ ଅବସ୍ଥା ଗୁରୁତର ହେବାରୁ କୋଭିଡ୍ ଭ୍ୟାନ ଯୋଗେ ଚିକିତ୍ସା ପାଇଁ ତାଙ୍କୁ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି। ତାଙ୍କର ହାତ , ପିଠି ଓ ପେଟ ଆଦି ପୋଡିଯାଇଥିବା ଜଣାପଡିଛି ।
ଗୁରୁତର ବୃଦ୍ଧ ଜଣଙ୍କ ଢେଙ୍କାନାଳ ସହର ଅମଲା ପଡାର ମୁରଲୀଧର ସ୍ୱାଇଁ। ତାଙ୍କ ବୟସ ପ୍ରାୟ ୬୫ବର୍ଷ ହେବ। ସେ କରୋନାରେ ପୀଡିତ ହୋଇ ପ୍ରଥମେ ଢେଙ୍କାନାଳ କୋଭିଡ ହସ୍ପିଟାଲ ଓ ପରେ ଗୁରୁତର ହୋଇ ଭୁବନେଶ୍ୱରର ଏକ ଘରୋଇ କୋଭିଡ ଡାକ୍ତରଖାନାରେ ଚିକିତ୍ସିତ ହୋଇ ଗତ ଏକ ସପ୍ତାହ ହେଲା ଘରକୁ ଫେରିଥିଲେ । ମାତ୍ର ତାଙ୍କ ଦେହ ଭଲ ଲାଗୁନଥିବା ଓ କରୋନା ଯୋଗୁଁ ବଞ୍ଚିବା ପାଇଁ ଚାହୁଁ ନଥିବାରୁ ଆତ୍ମହତ୍ୟା ଉଦ୍ୟମ କରିଥିଲେ ବୋଲି ପ୍ରକାଶ କରିଛନ୍ତି। ଅପର ପକ୍ଷେ କୋଭିଡ ପୀଡିତ ହୋଇ ସୁସ୍ଥ ହୋଇଥିଲେ ମଧ୍ୟ ସେ ମାନସିକ ବିଷାଦ ଯୋଗୁଁ ଆତ୍ମହତ୍ୟା ଉଦ୍ୟମ କରିଥିବା ସନ୍ଦେହ କରାଯାଇଛି।