ଭୁବନେଶ୍ୱର ୧୬।୦୯: ଆଉ ହେବନି ନୂଆ ହୋମ୍ଗାର୍ଡ (ଗୃହରକ୍ଷୀ) ନିଯୁକ୍ତି । ଖାଲି ଥିବା ସମସ୍ତ ହୋମ୍ଗାର୍ଡ ପଦବୀରେ କୌଣସି ନିଯୁକ୍ତି ନ କରିବାକୁ ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ଏ ନେଇ ଖୋଦ୍ ଗୃହ ବିଭାଗ ନିର୍ଦ୍ଦେଶ ଜାରି କରିଛି ।
ରାଜ୍ୟରେ ମୋଟ ୧୭ ହଜାର ୬୭୫ ହୋମଗାର୍ଡ ପଦବୀ ରହିଛି । ଏଥିରୁ ୧୬ ହଜାର ପଦବୀରେ ହୋମଗାର୍ଡ ନିଯୁକ୍ତ ଅଛନ୍ତି। ହୋମଗାର୍ଡଙ୍କ ଦୈନିକ ଭତ୍ତା ୩ଶହ ଟଙ୍କାରୁ ୫୩୩ ଟଙ୍କାକୁ ବୃଦ୍ଧି କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ରାଜ୍ୟ ସରକାର ମଧ୍ୟ ଏ ଦିଗରେ ପଦକ୍ଷେପ ନେଇଥିଲେ । ହେଲେ ଏହା ରାଜ୍ୟ ସରକାରଙ୍କ ଉପରେ ଆର୍ଥିକ ବୋଝ ବଢ଼ାଇଥିଲା। ଅର୍ଥ ବିଭାଗର ପରାମର୍ଶ କ୍ରମେ ଖାଲିଥିବା ହୋମଗାର୍ଡ ପଦବୀରେ କୌଣସି ନିଯୁକ୍ତି ନ କରିବାକୁ ଗୃହ ବିଭାଗ ସ୍ଥିର କରିଛି ।
ଅପରପକ୍ଷରେ ଖାଲି ପଦବୀ ବଦଳରେ ୩ଜଣ ହୋମଗାର୍ଡଙ୍କ ସ୍ଥାନରେ ଜଣେ କନଷ୍ଟେବଳଙ୍କୁ ନିଯୁକ୍ତ କରିବାକୁ ରାଜ୍ୟ ସରକାର ସ୍ଥିର କରିଛନ୍ତି । ୧୫୭୫ ହୋମଗାର୍ଡ ପଦବୀ ଖାଲିଥିବାରୁ ଏହା ବିଶେଷ ପ୍ରଭାବିତ କରିବନି ବୋଲି ସରକାର ଯୁକ୍ତି ଦର୍ଶାଇଛନ୍ତି । ହେଲେ ରାଜ୍ୟ ସରକାରଙ୍କ ନିଷ୍ପତ୍ତିକୁ ନାପସନ୍ଦ କରିଛି ଗୃହରକ୍ଷୀ ସଂଘ । ଏଭଳି କଲେ ଆଇନଶୃଙ୍ଖଳା ଓ ଟ୍ରାଫିକ ବ୍ୟବସ୍ଥାରେ ସମସ୍ୟା ଉପୁଜିବ । ତେଣୁ ରାଜ୍ୟ ସରକାର ନିଜ ନିଷ୍ପତ୍ତିର ପୁନଃ ବିଚାର କରିବାକୁ ସଂଘ ଦାବି କରିଛି ।
