ପୁରୀ, ୧୩|୧୧: ପୁରୀ ସମୁଦ୍ରରେ ଏକ ସ୍ପିଡ୍ବୋଟ୍ ଓଲଟି ପଡିଛି। ୱାଟର ସ୍ପୋର୍ଟସ୍ର ଆନନ୍ଦ ନେବା ନିମନ୍ତେ ସ୍ପିଡ୍ ବୋଟ୍ରେ ବସି ବୁଲୁଥିବା ବେଳେ ୫ ଯାତ୍ରୀ ଅଳ୍ପକେ ବର୍ତ୍ତି ଯାଇଛନ୍ତି ।
ସୂଚନାନୁସାରେ, ଜେଟ୍ସ୍କି ଯାତ୍ରୀଙ୍କୁ ବସାଇ ଢ଼େଉ ଭିତରେ ତୀବ୍ର ଗତିରେ ବୁଲୁଥିବା ବେଳେ ହଠାତ୍ ଓଲଟି ପଡ଼ିଥିଲା। ଏକ ଉଚ୍ଚ ଜୁଆର ଏହି ସ୍ପିଡ୍ ବୋଟ୍କୁ ଓଲଟାଇ ଦେଇଥିଲା । ତେବେ କୂଳରେ ଥିବା ଲାଇଫ୍ ଗାର୍ଡମାନେ ସେଠାରେ ପହଞ୍ଚିପରେ ବୁଡ଼ି ଯାଉଥିବା ଯାତ୍ରୀଙ୍କୁ ଉଦ୍ଧାର କରିଥିଲେ। ସମସ୍ତ ଯାତ୍ରୀ ଲାଇଫ୍ସେଭିଂ ଜ୍ୟାକେଟ ପିନ୍ଧିଥିବାରୁ ଏକ ବଡ ଧରଣର ଅଘଟଣ ଟଳି ଯାଇଥିଲା। ଯାତ୍ରୀଙ୍କ ଭିତରେ ଗୋଟିଏ ୫ ବର୍ଷର ଶିଶୁ କନ୍ୟା ରହିଥିବା ସୂଚନା ମିଳିଛି ।
ତେବେ ବୁଡ଼ିଯିବା ଯୋଗୁ ସମୁଦ୍ର ପାଣି ପିଇ ସେମାନେ ସାମାନ୍ୟ ଅସୁସ୍ଥ ହୋଇପଡ଼ିଥିଲେ। ଆହତମାନେ ହେଲେ କୋଲକାତା ଜିଲ୍ଲା ଗରସା ଥାନା ଅନ୍ତର୍ଗତ ଗାଗେନ୍ ରୋଡ ଶରତଘୋଷ ୧୩ ଏ’ ଅଞ୍ଚଳର ରିଆନସିକା ମୁଖାର୍ଜୀ(୫), ସୋମରୂପ ମୁଖାର୍ଜୀ (୩୩) ଓ ପ୍ରିୟାଶୀ ଭୌମିକ୍(୩୩), ଝାଡଖଣ୍ଡ ଜାମସେଦପୁର ଟାଟାନଗରର ଟି. ଶିବା ରାଜୁ(୩୧) ଏବଂ ଟି ରେଖା କାନି(୨୯) ।
ପୋଲିସ ଓ ଲାଇଫ୍ଗାର୍ଡଙ୍କ ସୂତ୍ରରୁ ମିଳିଥିବା ସୂଚନାନୁସାରେ, ଦିଗବାରିଣୀ ସମ୍ମୁଖ ସମୁଦ୍ରରେ ଏହି ଅଘଟଣ ଘଟିଥିଲା। ସି ଫେରର୍ ନାମକ ଏକ ସଂସ୍ଥାର ସ୍ପିଡ୍ ବୋର୍ଟରେ ଏହି ଯାତ୍ରୀମାନେ ସମୁଦ୍ରରେ ଜଳକ୍ରୀଡ଼ାର ଆନନ୍ଦ ନେଉଥିଲେ । ଯାତ୍ରୀଙ୍କୁ ବସାଇ ଜୋର ଗତିରେ ବୁଲୁଥିବା ବେଳେ ଜେଟ୍ସ୍କିଟି ଏକ ଜୁଆର ମାଡରେ ଓଲଟି ପଡ଼ିଥିଲା। ସୌଭାଗ୍ୟକୁ ଏହି ଘଟଣା କୂଳରେ ଥିବା ଲାଇଫ୍ଗାର୍ଡମାନଙ୍କ ନଜର ପଡ଼ିଥିଲା। ୫ ଜଣ ଲାଇଫ୍ଗାର୍ଡ ସମୁଦ୍ର ଭିତରକୁ ଯାଇ କାହାର କିଛି ବଡ ଧରଣର ଅଘଟଣ ହେବା ପୂର୍ବରୁ ସେମାନଙ୍କୁ ଉଦ୍ଧାର କରି କୂଳକୁ ଆଣିଥିଲେ। ପ୍ରାଥମିକ ଚିକିତ୍ସା ପରେ ସମସ୍ତଙ୍କୁ ଛାଡ଼ି ଦିଆଯାଇଥିଲା।
