ପୁରୀ ୯/୮ : ଅଗଷ୍ଟ ୯ କ୍ରାନ୍ତି ଦିବସରେ ଶ୍ରୀଜଗନ୍ନାଥ ସେବାୟତ ସମ୍ମିଳନୀ ପକ୍ଷରୁ ଶ୍ରୀମନ୍ଦିର ସିଂହଦ୍ୱାର ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି। ମହାନ୍ ଶ୍ରୀଜଗନ୍ନାଥ ସଂସ୍କୃତିର ସୁରକ୍ଷା ପାଇଁ ଆଜିଠାରୁ ସଂକଳ୍ପ ନେଇଛି ସେବାୟତ ସମ୍ମିଳନୀ। ମାନ୍ୟବର ସୁପ୍ରିମକୋର୍ଟଙ୍କ ମଧ୍ୟବର୍ତ୍ତୀକାଳୀନ ଆଦେଶକୁ ଅନୁପାଳନ କରିବାକୁ ଯାଇ ରାଜ୍ୟ ସରକାର କିମ୍ୱା ଶ୍ରୀମନ୍ଦିର ପ୍ରଶାସନ କଠୋର ଆଭିମୁଖ୍ୟ ଗ୍ରହଣ କଲେ ସେବାୟତମାନେ ଶ୍ରୀମନ୍ଦିରର ସମସ୍ତ ଚାବି ଆଦ୍ୟ ସେବକ ଗଜପତି ମହାରାଜାଙ୍କୁ ଫେରାଇ ଦେବେ ବୋଲି ଚରମ ବାଣୀ ଶୁଣାଇଛନ୍ତି। ଶ୍ରୀମନ୍ଦିରରେ ସେବାୟତମାନେ ଦାନ, ଦକ୍ଷିଣା ଗ୍ରହଣ ଉପରେ ପ୍ରତିବନ୍ଧକ, ଶ୍ରୀମନ୍ଦିରରେ ଚାଲିଆସୁଥିବା ବଂଶଗତ ପରମ୍ପରା ସେବାରୁ ଉଚ୍ଛେଦ, ଶ୍ରୀମନ୍ଦିରରେ ଚୁଲା ଅଧିକାରରୁ ବଞ୍ଚିତ କରାଯିବାର ଯୋଜନାକୁ ତୀବ୍ର ବିରୋଧ କରିଛି ଶ୍ରୀଜଗନ୍ନାଥ ସେବାୟତ ସମ୍ମିଳନୀ। ଏ ସବୁ ନିଷ୍ପତ୍ତି ସେବାୟତଙ୍କ ଜୀବନ ଓ ଜୀବିକାକୁ ଦୁର୍ବିସହ କରାଇଛି। ଏହା ଶ୍ରୀମନ୍ଦରରେ ବିଧର୍ମୀ ଅଣହିନ୍ଦୁ ପ୍ରବେଶ କରାଇବା ସହ ସେବାୟତଙ୍କ ବିରୋଧରେ ଷଡ଼ଯନ୍ତ୍ର ବୋଲି ସେବାୟତମାନେ ଅଭିଯୋଗ କରିଛନ୍ତି।