ହିସାର ୧୧|୧୦: ହରିଆଣାର ସତଲୋକ ଆଶ୍ରମର ମୁଖ୍ୟ ରାମପାଲଙ୍କୁ ଦୀର୍ଘ ୪ବର୍ଷ ପରେ ହିସାରର ସ୍ବତନ୍ତ୍ର ଅଦାତଲ ୨ଟି ହତ୍ୟା ସଂପର୍କୀତ ମାମଲାତରେ ଦୋଷୀ ସାବ୍ୟସ୍ତ କରିଛନ୍ତି । ଆସନ୍ତା ଅକ୍ଟୋବର ୧୬ ଏବଂ ୧୭ତାରିଖରେ ଅଦାଲତ ଏହି ମାମଲାର ଦଣ୍ଡ ପ୍ରକାଶ କରିବେ । ହିସାରର ନିମ୍ନ ଅଦାଲତ ଏହି ଦୁଇଟିଯାକ ମାମଲାରେ ରାମପାଲକୁ ଦୋଷୀ ସାବ୍ୟସ୍ତ କରିଥିଲେ ।

ସୂଚନାଯୋଗ୍ୟ ଯେ, ଆଜି ରାମପାଲ ମାମଲାର ରାୟ ପ୍ରକାଶ ପାଇବାକୁ ଥିବାରୁ ସମଗ୍ର ହିସାରରେ ୧୪୪ଧାରା ଜାରି କରାଯିବା ସହ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା । ରାମପାଲଙ୍କର ୨୦ହଜାର ସମର୍ଥକ ହିସାରରେ ଏକାଠି ହେବେ ବୋଲି ପ୍ରଶାସନ ଅନୁମାନ କରୁଥିଲା । ତେଣୁ ଆଗୁଆ ସତର୍କତା ହିସାବରେ ପୋଲିସ ଓ ପାରା ମିଲିଟାରୀ ଫୋର୍ସ ମୁତୟନ କରାଯାଇଥିଲା । ସଚ୍ଚସୌଦା ସଂପ୍ରଦାୟର ବାବା ରାମ ରହିମ ସଂପର୍କରେ ରାୟ ପ୍ରକାଶ ବେଳେ ପଞ୍ଚକୁଲାରେ ବ୍ୟାପକ ହିଂସା ହୋଇଥିଲା । ଏହାକୁ ନଜରରେ ରଖି ଏହି ସୁରକ୍ଷା ବ୍ୟବସ୍ଥା କରାଯାଇଥିଲା ।

୨୦୧୪ମସିହା ନଭେମ୍ବର ୧୮ତାରିଖରେ ବରଓ୍ବାଲଠାରେ ଥିବା ସତଲୋକ ଆଶ୍ରମ ମଧ୍ୟରୁ ରାମପାଲକୁ ବାହାର କରିବା ପାଇଁ ପୋଲିସ ଅଭିଯାନ ଆରମ୍ଭ କରିଥିଲା । ରାମପାଲର ସୁରକ୍ଷାକର୍ମୀ, ଅନୁଗାମୀ ଓ ଶ୍ରଦ୍ଧାଳୁ ପୋଲିସକୁ ବିରୋଧ କରିବା ସହ ଆକ୍ରମଣ କରିଥିଲେ ।  ପୋଲିସ ପକ୍ଷରୁ ମଧ୍ୟ ବ୍ୟାପକ ଚଢାଉ ହୋଇଥିଲା । ଅଭିଯାନର ପ୍ରଥମ ଦିନ ବହୁଲୋକ ଆହତ ହୋଇଥିଲେ । ତେବେ ଦ୍ବିତୀୟ ଦିନ ନିଜେ ରାମପାଲ ଆଶ୍ରମ ମଧ୍ୟରୁ ବାହାରକୁ ବାହାରିଥିଲା । ତେବେ ଇତିମଧ୍ୟରେ ୫ଜଣ ମହିଳା ଭକ୍ତ ଓ ଜଣେ ଛୋଟପିଲାର ମୃତ୍ୟୁ ହୋଇସାରିଥିଲା । ଏହି ଘଟଣାକୁ ନେଇ ପୋଲିସ ନିଜ ପକ୍ଷରୁ ୨ଟି ଏଫଆଇଆର ଦାଖଲ କରିଥିଲା । ରାମପାଲ ସମେତ ୧୫ଜଣଙ୍କୁ ପ୍ରଥମ ଏଫଆଇଆରରେ ଅଭିଯୁକ୍ତ କରାଯାଇଥିବାବେଳେ ଦ୍ବିତୀୟ ଏଫଆଇଆରରେ ରାମପାଲ ସମେତ ୧୪ଜଣଙ୍କୁ ଅଭିଯୁକ୍ତ କରାଯାଇଥିଲା । ୨୦୧୪ ମସିହା ନମ୍ଭେମ୍ବର ମାସରେ ପୋଲିସ ଅଧିକ ଅନୁସନ୍ଧାନ କରି ରାମପାଲ ବିରୋଧରେ ହତ୍ୟା, ଦେଶଦ୍ରୋହ ଏବଂ ବେଆଇନ ଭାବେ ସିଲିଣ୍ଡର ଗଚ୍ଛିତ ରଖିବା ଭଳି ଆହୁରି ୭ଟି ମାମଲା ଦାୟର କରିଥିଲା । ଏଥିରୁ ୨ଟି ମାମଲାରେ ରାମପାଲ ଦୋଷମୁକ୍ତ ହୋଇସାରିଛି ।