ଦ୍ବିତୀୟ ଥର ପାଇଁ ଆଜି ପୁଣି ଖୋଲୁଛି କେରଳର ସାବରିମାଳା ମନ୍ଦିର ; ସୁରକ୍ଷା ବ୍ୟବସ୍ଥା କଡ଼ାକଡ଼ି
Published By : Prameya-News7 Bureau | November 05, 2018 IST
କେରଳ ୫|୧୧: ଦ୍ବିତୀୟ ଥର ପାଇଁ ଆଜି ପୁଣି ଖୋଲୁଛି କେରଳର ସାବରିମାଳା ମନ୍ଦିର । ତେବେ ସମ୍ଭାବ୍ୟ ହିଂସା ଏଡ଼ାଇବା ପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ମନ୍ଦିର ସହ ସଂଯୁକ୍ତ ବିଭିନ୍ନ ସଡ଼କ ଓ ପ୍ରମୁଖ ସ୍ଥାନଗୁଡ଼ିକରେ ପୁଲିସ ଛାଉଣୀ କରାଯାଇଛି। ସେହିଭଳି ଅଧିକାଂଶ ସ୍ଥାନରେ ୧୪୪ ଧାରା ଲାଗୁ କରାଯାଇଛି । ପମ୍ବାଠାରୁ ସନ୍ନିଧନମ୍ ମଧ୍ୟରେ ପ୍ରାୟ ୧୫୦୦ ପୁଲିସ ମୁତୟନ କରାଯାଇଛି। ସାବରିମାଳା ମନ୍ଦିରରେ ସବୁ ବୟସର ମହିଳା ପ୍ରବେଶ କରିପାରିବେ ବୋଲି ସୁପ୍ରିମକୋର୍ଟଙ୍କ ଆଦେଶ ସତ୍ତ୍ବେ ତାକୁ ବିରୋଧ କରାଯାଉଛି । ୧୦ରୁ ୫୨ ବର୍ଷ ବୟସର ମହିଳାମାନେ ମନ୍ଦିରରେ ପଶିପାରିବେ ନାହିଁ ବୋଲି ସ୍ଥାନୀୟ ଲୋକ ଏବଂ ମନ୍ଦିର ଟ୍ରଷ୍ଟ ଜିଦରେ ଅଡ଼ିବସିଛନ୍ତି । ତେଣୁ ଏଠାରେ ହିଂସା ଘଟିପାରେ ବୋଲି ଆଶଙ୍କା କରାଯାଉଛି । ସୁପ୍ରିମକୋର୍ଟଙ୍କ ରାୟ ପରେ କିଛି ମହିଳା ସମାଜସେବୀ ମନ୍ଦିରରେ ପ୍ରବେଶ ପାଇଁ ଉଦ୍ୟମ କରି ବିଫଳ ହୋଇଛନ୍ତି । ସେମାନଙ୍କୁ ମନ୍ଦିର ଦ୍ବାରରୁ ନିରାଶ ହୋଇ ଫେରିବାକୁ ପଡ଼ିଛି। ଯଦିଓ ରାଜ୍ୟ ସରକାର ସୁପ୍ରିମକୋର୍ଟଙ୍କ ନିର୍ଦ୍ଦେଶ ପାଳନ କରି ମହିଳାମାନଙ୍କୁ ଅନୁମତି ଦେଇଛନ୍ତି, କିନ୍ତୁ ଭୀଷଣ ବିରୋଧ ଯୋଗୁ ଏହା ଆଜି ପର୍ଯ୍ୟନ୍ତ ସମ୍ଭବ ହୋଇପାରିନାହିଁ । ଜଣେ ହେଲେ ବି ମହିଳା ମନ୍ଦିରରେ ପଶିବାକୁ ସୁଯୋଗ ପାଇନାହାନ୍ତି । ଅନ୍ୟପକ୍ଷରେ ସମ୍ଭାବ୍ୟ ଅଘଟଣକୁ ଏଡ଼ାଇବା ସକାଶେ ହିନ୍ଦୁ ଗୋଷ୍ଠୀମାନଙ୍କ ପକ୍ଷରୁ ଗଣମାଧ୍ୟମ ସଂସ୍ଥାଗୁଡ଼ିକୁ ଏକ ସ୍ବତନ୍ତ୍ର ପରାମର୍ଶ ଦିଆଯାଇଛି। ଆଜି ମନ୍ଦିର ନିକଟକୁ କୌଣସି ମହିଳା ସାମ୍ବାଦିକା ନଯିବା ପାଇଁ ପରାମର୍ଶ ଦିଆଯାଇଛି।