ଭୁବନେଶ୍ବର ୨୬।୫:  ଲଗାତାର ପଞ୍ଚମବାର ରାଜ୍ୟର ଶାସନଡୋରୀ ସମ୍ଭାଳିବାକୁ ଯାଉଛନ୍ତି ନବୀନ। ଏଥିପାଇଁ ରାଜ୍ୟପାଳଙ୍କୁ ଭେଟି ସରକାର ଗଢିବାକୁ ରବିବାର ନବୀନ ଦାବି ଉପସ୍ଥାପନ କରିଛନ୍ତି । ଆସନ୍ତା ୨୯ ତାରିଖରେ ନବୀନ ପଦ ଓ ଗୋପନୀୟତାର ଶପଥ ପାଠ କରିବେ। ସବୁଥର ଭଳି ଏଥର ରାଜଭବନରେ ନୁହେଁ ଜନତାଙ୍କ ଗହଣରେ ବିଜୁଜନତା ଦଳ ସୁପ୍ରିମୋ  ନୂଆ ସରକାରର ଦାୟିତ୍ବ ଗ୍ରହଣ କରିବାକୁ ଆଗ୍ରହ ପ୍ରକାଶ କରିଛନ୍ତି । ଏଥିପାଇଁ ରାଜଧାନୀର କେନ୍ଦ୍ରସ୍ଥଳରେ ଥିବା ପ୍ରଦର୍ଶନୀ ପଡିଆକୁ ମନୋନୀତ କରାଯାଇଛି। ଏଣୁ ଶପଥ ଗ୍ରହଣ ଉତ୍ସବର ଶାନ୍ତି ଶୃଙ୍ଖଳା ଓ ସୁରକ୍ଷା ତଦାରଖ ପାଇଁ ରାଜ୍ୟ ପୋଲିସ ମହାନିର୍ଦେଶକ ଡା. ରାଜେନ୍ଦ୍ର ପ୍ରସାଦ ଶର୍ମା ରବିବାର ନିଜେ ପ୍ରଦର୍ଶନୀ ପଡିଆ ବୁଲି ଦେଖିବା ସହ ସୁରକ୍ଷା ସମୀକ୍ଷା କରିଛନ୍ତି ।

{"id":116340}

ଡିଜିଙ୍କ ସୁରକ୍ଷା ସମୀକ୍ଷା ବୈଠକରେ ପୋଲିସ କମିଶନର ସତ୍ୟଜିତ ମହାନ୍ତି, ଡିସିପି ଅନୁପ ସାହୁ ଓ ବରିଷ୍ଠ ସୁରକ୍ଷା ଅଧିକାରୀମାନେ ଯୋଗଦେଇଥିବା ବେଳେ ନବୀନଙ୍କ ଶପଥଗ୍ରହଣ ଉତ୍ସବକୁ ଆସିବାକୁ ଥିବା ଲେକେ, ସେମାନଙ୍କ ସଂଖ୍ୟା ଓ ସେମାନଙ୍କ ସୁରକ୍ଷା ଆଦି ପ୍ରସଙ୍ଗରେ ବିସ୍ତୃତ ଆଲୋଚନା କରିଛନ୍ତି । ଏଥିରେ ଉତ୍ସବକୁ ୫ ହଜାରରୁ ଊର୍ଦ୍ଧ୍ବ ଦଳୀୟ କର୍ମୀ ଓ ସମର୍ଥକ ଆସିବାକୁ ଥିବା ବେଳେ ସମଗ୍ର ପଡିଆକୁ ସିସିଟିଭି ସର୍ଭିଲିଆନ୍ସରେ ରଖିବା ପାଇଁ ନିଷ୍ପତି ହୋଇଛି। ଏହା ଛଡା  ମେଟାଲ ଡିଟେକ୍ଟର ଓ ପ୍ରଦର୍ଶନୀ ପଡିଆ ନିକଟସ୍ଥ ଉଚ୍ଚ ବିଲ୍ଡିଂ ମାନଙ୍କରେ ମଧ୍ୟ ପୋଲିସ ମୁତନ  ପାଇଁ ଆଲୋଚନା ହୋଇଥିବା ଜଣାପଡିଛି।

{"id":116341}

ସେହିପରି ଉତ୍ସବକୁ ଆସିବାକୁ ଥିବା ଯାନବାହନର ସ୍ବତନ୍ତ୍ର ପାର୍କିଂ, ଟ୍ରାଫିକ ନିୟନ୍ତ୍ରଣ ଉପରେ ମଧ୍ୟ ଯଥେଷ୍ଠ ଗୁରୁତ୍ବ ଦିଆଯାଇଛି। ଏହା ଛଡା ୨୪ ଘଣ୍ଟା ପୂର୍ବରୁ ପ୍ରମୁଖ ସ୍ଥାନ ଯେପରିକି ରେଳ ଷ୍ଟେସନ, ବସଷ୍ଟାଣ୍ଡ, ବସଷ୍ଟପ୍ ଗୁଡିକରେ ସମସ୍ତ ଗାଡି ଓ ବ୍ୟକ୍ତିଙ୍କୁ  କଡାକଡି ଯାଞ୍ଚ ପାଇଁ ପୋଲିସ ଡିଜି ନିର୍ଦ୍ଦେଶ ଦେଇଛନ୍ତି।