ଶ୍ରୀନଗର ୦୭/୧୧: ଜାମ୍ମୁ କାଶ୍ମୀର ରାଜୌରୀକୁ ଥାନାମଣ୍ଡି ସହିତ ସଂଯୋଗ କରୁଥିବା ମୁଖ୍ୟ ରାସ୍ତାକୁ ଶନିବାର ବନ୍ଦ କରାଯାଇଛି । ଏହି ଅଞ୍ଚଳରେ ସକ୍ରିୟ ଥିବା ଆତଙ୍କବାଦୀ ଗୋଷ୍ଠୀକୁ ଖୋଜିବା ପାଇଁ କିଛି ସମୟ ପାଇଁ ସୁରକ୍ଷାକର୍ମୀମାନେ ରାସ୍ତା ବନ୍ଦ କରିଥିବା ଜଣାପଡ଼ିଛି । ତେବେ ସାଧାରଣ ଲୋକଙ୍କ ସୁରକ୍ଷା ଦୃଷ୍ଟିରୁ ଏହି ରାସ୍ତାରେ ଗମନାଗମନ ଉପରେ ରୋକ ଲାଗିଛି ।
ଏନେଇ ସୁରକ୍ଷା କର୍ମୀ ଅଧିକାରୀମାନେ ସୂଚନା ଦେଇଛନ୍ତି । ପୁଞ୍ଚ ଜିଲ୍ଲାର ସୁରନକୋଟ ଓ ମେନ୍ଦର ଜଙ୍ଗଲ ଏବଂ ରାଜୌରୀ ଜିଲ୍ଲାର ଥାନାମାଣ୍ଡିରେ ଆତଙ୍କବାଦୀ ବିରୋଧୀ ଅଭିଯାନ ଶନିବାର ୨୭ ଦିନରେ ପହଞ୍ଚିଛି । ରାସ୍ତା ବନ୍ଦ ନେଇ ସୁରକ୍ଷା ଅଧିକାରୀ କହିଛନ୍ତି ଯେ ପୁଞ୍ଚ- ରାଜୌରୀ ଜଙ୍ଗଲ ଅଞ୍ଚଳରେ ଆତଙ୍କବାଦୀଙ୍କୁ ଧରିବା ପାଇଁ ଅପରେସନ ଚାଲିଥିଲା ।
ଏତିକି ବେଳେ ସକାଳେ ମୋଗଲ ରୋଡରେ ଥିବା ଖବଲାର ଜଙ୍ଗଲ ଅଞ୍ଚଳରେ ଆତଙ୍କବାଦୀଙ୍କ ଗତିବିଧି ସମ୍ପର୍କରେ ସୁରକ୍ଷା ବାହିନୀ ସୂଚନା ପାଇଥିଲେ ।
ଏହାପରେ ଖବଲାର ଜଙ୍ଗଲ ଅଞ୍ଚଳରେ ସେନା ଓ ପୁଲିସ ମିଳିତ ଅପରେସନ ଆରମ୍ଭ କରିଥିଲେ ମଧ୍ୟ ସନ୍ଦିଗ୍ଧ ଆତଙ୍କବାଦୀଙ୍କୁ ଚିହ୍ନଟ କରାଯାଇ ପାରିନାହିଁ ବୋଲି ଅଧିକାରୀଙ୍କ ତରଫରୁ ସୂଚନା ଦିଆଯାଇଛି ।
ଅଧିକାରୀମାନେ କହିଛନ୍ତି ଯେ ଅପରେସନ୍ ସମୟରେ ଯାତ୍ରୀଙ୍କ ସୁରକ୍ଷା ପାଇଁ ସତର୍କତାମୂଳକ ପଦକ୍ଷେପ ଭାବରେ ରାଜୌରୀ-ଥାନାମାଣ୍ଡି ରାସ୍ତାରେ ଯାତାୟାତ ବନ୍ଦ ହୋଇଯାଇଥିଲା । ସୂଚନା ଅନୁସାରେ, ଏହାପୂର୍ବରୁ ଅକ୍ଟୋବର ୧୧ରେ ସୁରାନକୋଟ ଜଙ୍ଗଲରେ ଓ ଅକ୍ଟୋବର ୧୪ରେ ମେଘର ଜଙ୍ଗଲରେ ସର୍ଚ୍ଚ ଅପରେସନର ପ୍ରଥମ ଦିନରେ ଆତଙ୍କବାଦୀଙ୍କ ସହ ଦୁଇଟି ପୃଥକ ଏନକାଉଣ୍ଟରରେ ଦୁଇଜଣ ଜୁନିଅର କମିଶନ ଅଫିସର (ଜେସିଓ) ଙ୍କ ସମେତ ନଅ ଜଣ ସେନା କର୍ମଚାରୀ ସହିଦ ହୋଇଥିଲେ।
