ବେଙ୍ଗାଲୁରୁ୩୧/୧: କର୍ଣ୍ଣାଟକର ଏକ ସ୍କୁଲ ବିରୋଧରେ ଦେଶଦ୍ରୋହ ମାମଲା ରୁଜୁ ହୋଇଛି। କିଛିଦିନ ତଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବା ଭଳି ନାଟକ ମଞ୍ଚସ୍ଥ ହୋଇଥିଲା। ଏହି ଅଭିଯୋଗରେ ସ୍କୁଲର ପ୍ରଧାନ ଶିକ୍ଷୟତ୍ରୀ ଓ ଜଣେ ଛାତ୍ରଙ୍କ ମାଆଙ୍କୁ ପୋଲିସ ଗିରଫ କରିଛି। ଗୁରୁବାରରେ ଶାହୀନ ସ୍କୁଲର କିଛି କର୍ମଚାରୀଙ୍କୁ ପଚରାଉଚାର କରିବା ପରେ ପୋଲିସ୍ ୨ ମହିଳାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ଜାନୁଆରୀ ୨୧ ତାରିଖରେ ଛାତ୍ରଛାତ୍ରୀ ମୋଦିଙ୍କ ଉପରେ ନାଟକ ପରିବେଷଣ କରିଥିଲେ। ଏଥିରେ ସ୍କୁଲର ଚତୁର୍ଥ, ପଞ୍ଚମ ଓ ଷଷ୍ଠ ଶ୍ରେଣୀର ଛାତ୍ରଛାତ୍ରୀ ସାମିଲ ହୋଇଥିଲେ। ଜାନୁଆରୀ ୨୬ ତାରିଖରେ ଭାରତୀୟ ଦଣ୍ଡ ବିଧାନ ଆଧାରରେ ସ୍କୁଲ ବିରୋଧରେ ପୋଲିସ୍ ମାମଲା ରୁଜୁ କରିଥିଲା। ସମାଜସେବୀ ନୀଲେଶଙ୍କ ଅଭିଯୋଗ ଆଧାରରେ ପୋଲିସ୍ ସ୍କୁଲର ପ୍ରଧାନ ଶିକ୍ଷୟତ୍ରୀ ଓ ଜଣେ ଅଭିଭାବକଙ୍କୁ ଗିରଫ କରିଥିଲା। ମୋଦିଙ୍କୁ ନେଇ ମଞ୍ଚରେ ଖରାପ ଚିତ୍ରଣ କରାଯାଇଥିଲା।
ସୋସିଆଲ ମିଡିଆରେ ନାଟକର ଭିଡିଓ ଭାଇରାଲ ହେବା ପରେ ପୋଲିସ୍ ଓ ପ୍ରଶାସନ ତତ୍ପର ହୋଇ ଉଠିଥିଲେ। ପୋଲିସ୍ର କହିବା ଅନୁସାରେ ପିଲାମାନଙ୍କର କିଛି ଭୁଲ ନାହିଁ। ପ୍ରଧାନ ଶିକ୍ଷୟତ୍ରୀ ନାଟକ ପାଇଁ ଅନୁମତି ଦେବା ଏବଂ ଅଭିଭାବକ ଜଣଙ୍କ ପିଲାମାନଙ୍କୁ ହୁସ୍କାଇବା ଯୋଗୁଁ ଏଭଳି ଘଟଣା ଘଟିଛି। ସିଏବି ଓ ଏନ୍ଆର୍ସିକୁ ନେଇ ନାଟକ ମଞ୍ଚସ୍ଥ ହୋଇଥିଲା। ଯେଉଁଥିରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ବିରୋଧ କରି ଗାଳି ଗୁଲଜ ମଧ୍ୟ କରାଯାଇଥିଲା।