ପଟ୍ଟାମୁଣ୍ଡାଇ ୩।୧୧: ସରକାରୀ ସ୍କୁଲ ଭିତରେ ଚାଲିଛି ଟିଉସନ୍ । ପୁଣି ସ୍କୁଲ ଭିତରେ ଟିଉସନ କରୁଛନ୍ତି ନିଜେ ପ୍ରଧାନ ଶିକ୍ଷକ । କେବଳ ସେତିକି ନୁହେଁ ସ୍କୁଲ ଭିତରେ ଶିକ୍ଷକଙ୍କ ବେଶ ପୋଷାକ ଦେଖିଲେ ଆଶ୍ଚର୍ଯ୍ୟ ହେବେ । ସବୁଠୁ ବଡ କଥା, ଏବାବଦରେ ପ୍ରଧାନ ଶିକ୍ଷକ ଦେଉଛନ୍ତି ଆହୁରି ବେପରୁଆ ବୟାନ । କେନ୍ଦ୍ରାପଡା ରାଜକନିକା ଗହମପାଳ ପ୍ରକଳ୍ପ ଉନ୍ନିତ ଉଚ୍ଚ ପ୍ରାଥମିକ ବିଦ୍ୟାଳୟର ଏହି ବିଚିତ୍ର ଦୃଶ୍ୟ ଦେଖିବାକୁ ମିଳିଛି ।
ସବୁ ଆଇନ କାନୁନକୁ ମୋଡି ମକଚି ଦେଇଛନ୍ତି ନିଜେ ପ୍ରଧାନ ଶିକ୍ଷକ । ସମୟ ସକାଳ ସାଢେ ୧୦ଟା । ପ୍ରଧାନ ଶିକ୍ଷକ ଦାୟିତ୍ବରେ ଥିବା ସୁକାନ୍ତ ସେଠୀ ଅଛନ୍ତି ଲୁଙ୍ଗି ଗାମୁଛାରେ । ଦୁର୍ଗମ ଇଲାକା ହୋଇଥିବାରୁ ଉପରିସ୍ଥ ଅଧିକାରୀଙ୍କ ପାଦ ପଡେ ନାହିଁ । ମୋଟା ଅଙ୍କର ଦରମା ନେଇ ବି ସ୍କୁଲ ଭିତରେ ପିଲାଙ୍କୁ ଟିଉସନ କରୁଛନ୍ତି । ସରକାରୀ ବେତନ ଭୋଗୀ କର୍ମଚାରୀ ଘରୋଇ ଟିଉସନ କରିପାରିବେ ନାହିଁ ବୋଲି ଥିବା ନିୟମ ଯେମିତି ଏହି ଶିକ୍ଷକଙ୍କ ପାଇଁ ଅଲୋଡା ।
ଏସବୁ ପରେ ପ୍ରଧାନ ଶିକ୍ଷକ ସୁକାନ୍ତ ସେଠୀ ଯାହା କହୁଛନ୍ତି ତାହା ସବୁଠୁ ଆଶ୍ଚର୍ଯ୍ୟଜନକ । ଶିକ୍ଷକଜଣକ କହିଛନ୍ତି, ‘ମୁଁ ଟିଉସନ କରିବା କଥା ବିଇଓଙ୍କଠାରୁ, ସରପଞ୍ଚ ସମସ୍ତେ ଜାଣିଛନ୍ତି । ଆପଣଙ୍କର ଯାହା କରିବା କଥା କରନ୍ତୁ । ସବୁ ଜାଗାରେ ଏମିତି ହେଉଛି, କିଛି ନୂଆ କଥା ନୁହେଁ । ବେଫିକର ଶିକ୍ଷକଙ୍କ ବେପରୁଆ ବୟାନ ହିଁ ସବୁଠୁ ଚକିତ କରିବା ଭଳି ।
wp:html /wp:html