ବେଜିଂ ୨୮।୫: ଯେମିତିକି ଚୀନ୍ ବିଶ୍ବକୁ ଏକ ସମ୍ଭାବ୍ୟ ଯୁଦ୍ଧର ଭୟାନକ ଚେତାବନୀ ଦେଇଛି, ତାଜା ସାଟେଲାଇଟ୍ ଫଟୋଗୁଡିକରୁ ଆକ୍ସାଇ ଚୀନ୍ ଅଞ୍ଚଳରେ ରାସ୍ତା କଡରେ ଚୀନ୍ ସୈନ୍ୟମାନଙ୍କର ଏକ ବଡ ମୁଭମେଣ୍ଟକୁ ସୂଚିତ କରୁଥିବା ସୂଚନା ମିଳୁଛି । ଏହା ଏକ ଗଣମାଧ୍ୟମ ରିପୋର୍ଟରେ ପ୍ରକାଶ ପାଇଛି । ଅକ୍ସାଇ ଚୀନ୍ ଲଦାଖର ସେହି ଅଂଶ ଯାହାକି ୧୯୬୨ ଯୁଦ୍ଧ ପରଠାରୁ ଚୀନ୍ ଦଖଲ କରିଛି ।
ଚୀନ୍ ରାଷ୍ଟ୍ରପତି ସି ଜିନପିଙ୍ଗ ମଙ୍ଗଳବାର ଦିନ ଦେଶର ସଶସ୍ତ୍ର ବାହିନୀକୁ କହିଛନ୍ତି ଯେ, ବର୍ତ୍ତମାନ ମହାମାରୀକୁ ନିୟନ୍ତ୍ରଣ କରିବା ପାଇଁ ଉଦ୍ୟମ ସାଧାରଣ ହୋଇଥିବାରୁ ସଶସ୍ତ୍ର ଯୁଦ୍ଧ ପାଇଁ ତାଲିମ ଏବଂ ପ୍ରସ୍ତୁତି ରାସ୍ତା ମିଳିବା ଆବଶ୍ୟକ। ଚୀନ୍ ରାଷ୍ଟ୍ରପତିଙ୍କ ଏହି ବିବୃତ୍ତି ଏପରି ଏକ ସମୟରେ ଆସିଛି ଯେତେବେଳେ ସାରା ବିଶ୍ବ କରୋନା ଭାଇରସ୍ ମହାମାରୀ ସହ ସଂଘର୍ଷ କରୁଛି ।
ଜିନପିଙ୍ଗ କହିଛନ୍ତି ଯେ, ଏହା ଜରୁରୀ ଯେ ସଶସ୍ତ୍ର ଯୁଦ୍ଧ ପାଇଁ ପ୍ରସ୍ତୁତି ବୃଦ୍ଧି କରାଯିବ । ପ୍ରକୃତ ଯୁଦ୍ଧ ସାମରିକ ତାଲିମ ନମନୀୟ ଭାବରେ କରାଯିବା ଉଚିତ୍ ଏବଂ ସାମରିକ ମିଶନ ପାଇଁ ସୈନ୍ୟବାହିନୀର ଦକ୍ଷତା ବୃଦ୍ଧି ହେବା ଜରୁରୀ ଅଟେ।
ଜିନପିଙ୍ଗଙ୍କ ବିବୃତ୍ତି ପୂର୍ବରୁ ଚୀନ୍ ନିଜର ସେନା ବଜେଟକୁ ୧୭୮ ବିଲିୟନ ଡଲାର ବୃଦ୍ଧି କରିବାକୁ ନିଷ୍ପତ୍ତି ନେଇଛି । ଏହି ବୃଦ୍ଧି ପୂର୍ବ ବର୍ଷ ତୁଳନାରେ ୬.୬ ପ୍ରତିଶତ ଅଧିକ ।
ବିଶ୍ବକୁ ଚୀନ୍ ର ସାର୍ବଜନିକ ସ୍ତରରେ ଧମକ ଏପରି ଏକ ସମୟରେ ଆସିଛି ଯେତେବେଳେ ଲଦାଖ ଏବଂ ସିକ୍କିମ୍ ସେକ୍ଟରରେ ଲାଇନ୍ ଅଫ୍ ଆକ୍ଟୁଆଲ୍ କଣ୍ଟ୍ରୋଲ୍ (LAC) ଉପରେ ଚୀନ୍ ଏବଂ ଭାରତ ମଧ୍ୟରେ ତିକ୍ତତା ବୃଦ୍ଧି ପାଇଛି । ପିଥୋରାଗଡର ଲିପୁଲେଖ, କାଲାପାନି ଏବଂ ଲିପିଆଡୁରା ଅଞ୍ଚଳରେ ନେପାଳ ନିକଟରେ କରିଥିବା ଦାବି ପଛରେ ବେଜିଂର ହାତ ରହିଥିବା ଜଣାପଡିଛି ।
ୟୁରୋପୀୟ ସ୍ପେସ୍ ଏଜେନ୍ସିର ସାମ୍ପ୍ରତିକ ଚିତ୍ରଗୁଡିକ ଏହି ମାସର ତୃତୀୟ ସପ୍ତାହରେ ଆକ୍ସାଇ ଚୀନ୍ ଅଞ୍ଚଳରେ ଗତିବିଧିକୁ ସୂଚିତ କରୁଛି । ଏହି ଫଟୋଗ୍ରାଫର ବିଶ୍ଳେଷଣରୁ ଜଣାପଡିଛି ଯେ, ଚଳପ୍ରଚଳ ଢାଞ୍ଚା ୩୦-୫୦ ମିଟର ଉଚ୍ଚ ହୋଇପାରେ । ଫଟୋଗୁଡିକ ଭୂପୃଷ୍ଠରେ ପରିବର୍ତ୍ତନ ଦେଖାଉଛି, ଯାହା ବୋଧହୁଏ ବଡ ଧରଣର ମୁଭମେଣ୍ଟ ହେତୁ ହୋଇଥାଏ । ଐତିହାସିକ ଫଟୋଗ୍ରାଫ୍ ଦର୍ଶାଏ ଯେ LAC ର ନିକଟତମ ସ୍ଥାନଠାରୁ ଦୁଇ କିଲୋମିଟର ଦୂରରେ ଅବସ୍ଥିତ ଏହି ରାସ୍ତା ୨୦୧୮-୧୯ରେ ନିର୍ମିତ ହୋଇଥିଲା ।
ଏକ ନିକଟତର ପରୀକ୍ଷଣରୁ ଜଣାପଡିଛି ଯେ, ମେ’ ୨୪ରେ ଭୂମିରେ ଦେଖାଯାଉଥିବା ଚିହ୍ନଗୁଡିକ ୧୪ ମେ’ରେ ଦେଖାଯାଇ ନଥିଲା । ଚିତ୍ରରେ ଦେଖାଯାଇଥିବା ଏହି ନୂତନ ଗଠନଗୁଡିକ ଚୀନ୍ ପିପୁଲ୍ସ ଲିବରେସନ୍ ଆର୍ମିର ବହୁ ସଂଖ୍ୟକ ସୈନିକଙ୍କ ଗତିବିଧି କିମ୍ବା ସାମଗ୍ରୀ ପରିବହନ ଗତିବିଧି ସହିତ ଜଡିତ ହୋଇପାରେ ।
ଏହି ଘଟଣା ପ୍ରାୟ ମେ’ ୫ରେ ଭାରତୀୟ ଏବଂ ଚୀନ୍ ସୈନିକଙ୍କ ମଧ୍ୟରେ ହୋଇଥିବା ମୁହାଁମୁହିଁର ଅନୁରୂପ ଅଟେ । ଫଟୋଗ୍ରାଫର ବିଶ୍ଳେଷଣରେ ପାଙ୍ଗୋଗ ହ୍ରଦ ଏବଂ ଗାଲଭାନ ଭ୍ୟାଲି ଅଞ୍ଚଳରେ ଉଭୟ ପାର୍ଶରେ ନିର୍ମାଣ କାର୍ଯ୍ୟ ଦେଖାଯାଇଥିଲା ।