ବୌଦ୍ଧ, ୦୬।୦୯: ରବିବାର ଅପରାହ୍ନରେ ବୌଦ୍ଧ ଜିଲ୍ଲା କଣ୍ଟାମାଳ ତହସିଲଦାର ଅର୍ଜୁନ ପ୍ରଧାନ ପ୍ରାୟ ୩୦୦ ବସ୍ତା ସାର ସହ ଗୋଟିଏ ଟ୍ରକକୁ ଅଟକ ରଖିଛନ୍ତି । ଟ୍ରକକୁ ଅଟକ ରଖାଯାଇ ମନମୁଣ୍ଡା ଥାନାକୁ ଜିମା ଦିଆଯାଇଥିବା ଜଣାପଡିଛି ।
ମିଳିଥିବା ସୂଚନା ଅନୁଯାୟୀ, କଣ୍ଟାମାଳ ବ୍ଲକ୍ ବିଲାସପୁର ଗ୍ରାମ ପଂଚାୟତ ଅନ୍ତର୍ଗତ ପଦରପଡା ଗ୍ରାମରେ ସାର ବ୍ୟବସାୟୀଙ୍କ ଦୋକାନ ଆଗରେ ଏକ ସାର ବୋଝେଇ ଟ୍ରକ୍ ଥିବା ଖବର ମିଳିଥିଲା । ଏହାପରେ କଣ୍ଟାମାଳ ତହସିଲଦାର ଅର୍ଜୁନ ପ୍ରଧାନ ସଦଲବଳେ ଚଢାଉ କରିଥିଲେ । ସାର ସହ ଟ୍ରକକୁ ଆଣି ମନମୁଣ୍ଡା ପୋଲିସକୁ ଜିମା ଦେଇଥିଲେ ।
ସ୍ଥାନୀୟ ଲୋକେ ଟ୍ରକରେ ୟୁରିଆ ସାର ଥିବା କହୁଥିବା ବେଳେ ମନମୁଣ୍ଡା ସହକାରୀ କୃଷି ଅଧିକାରୀ ଦେବାଶିଷ ଦେଶୀ ନାଏକ ପ୍ରାୟ ୩୦୦ ବସ୍ତା ପଟାସ୍ ସାର ଥିବା କହିଛନ୍ତି । ସାର କେଉଁ ସ୍ଥାନରୁ ଆସିଥିଲା ଓ କେମିତି ଆସିଥିଲା ତଦନ୍ତ ପରେ ଜଣାପଡିବ ବୋଲି ଶ୍ରୀ ଦେଶୀ ନାଏକ ସୂଚନା ଦେଇଛନ୍ତି ।
