ଅଯୋଧ୍ୟା ୧୭/୦୬ : ଭାରତୀୟ ଜନତା ପାର୍ଟି ସାଂସଦ ସାକ୍ଷୀ ମହାରାଜ କହିଛନ୍ତି ଯେ ଯେଉଁମାନେ ରାମ ମନ୍ଦିର ନିର୍ମାଣରେ ଦୁର୍ନୀତି ଅଭିଯୋଗ ଆଣିଛନ୍ତି, ସେମାନେ ରସିଦ ଦେଖାଇ ସେମାନଙ୍କ ଦାନ ଫେରସ୍ତ କରିନେବା ଉଚିତ୍। ବୁଧବାର ଦିନ ସେ କହିଛନ୍ତି ଯେ ବର୍ତ୍ତମାନ ଯେଉଁ ନେତାମାନେ ଅଭିଯୋଗ କରୁଛନ୍ତି ସେମାନେ ସେହିମାନେ ହିଁ ଅତୀତରେ ରାମ ଭକ୍ତଙ୍କ ଉପରେ ଗୁଳି ଚଳାଇଥିଲେ।
ସାକ୍ଷୀ ମହାରାଜ କହିଛନ୍ତି, "ସେମାନେ କହିଥିଲେ ଯେ ସେମାନେ ବାବ୍ରି ମସଜିଦ ନିକଟରେ ଏକ ପକ୍ଷୀକୁ ମଧ୍ୟ ଯିବାକୁ ଦେବେ ନାହିଁ। ସେମାନଙ୍କର ଗର୍ବ, ଅହଂକାରକୁ ଉପଯୁକ୍ତ ଉତ୍ତର ଦିଆଯାଇଛି ଏବଂ ରାମ ଜନ୍ମଭୂମି ସ୍ଥାନରେ ଏକ ବିଶାଳ ଭବ୍ୟ ମନ୍ଦିର ନିର୍ମାଣ କରାଯାଉଛି। ଏହିଭଳି ଲୋକଙ୍କ ପାଖରେ ଭିତ୍ତିହୀନ ଆରୋପ ଲଗାଇବା ଛଡା କିଛି କାମ ନାହିଁ। ସେ କହିଛନ୍ତି ଚମ୍ପତ ରାୟଙ୍କ ବିଷୟରେ ଯଦି କୁହାଯାଏ ତାହେଲେ ସେ ସାରା ଜୀବନକୁ ଭଗବାନ ରାମଙ୍କୁ ସମର୍ପିତ କରିଛନ୍ତି।
ବିଜେପି ସାଂସଦ କହିଛନ୍ତି, "ଏଭଳି ବ୍ୟକ୍ତିଙ୍କ ଉପରେ ଆରୋପ ଲଗାଇବା ଠିକ୍ ନୁହେଁ। ତଥାପି, ଯଦି ଆମ ଆଦମୀ ପାର୍ଟିର ସଞ୍ଜୟ ସିଂହ ରାମ ମନ୍ଦିର ପାଇଁ କିଛି ଦାନ କରିଛନ୍ତି, ତେବେ ସେ ରସିଦ ଦେଖାଇ ନିଜର ଦାନ ପ୍ରତ୍ୟାହାର କରିପାରିବେ। ଅଖିଳେଶ ଯାଦବ ଦାନ କରିଛନ୍ତି, ସେ ବି ନିଜ ଦାନ ଅର୍ଥ ପ୍ରତ୍ୟାହାର କରିପାରିବେ। ଏହି ଲୋକମାନେ ହିଁ ରାମ ମନ୍ଦିରକୁ ଦୃଢ ବିରୋଧ କରିଥିଲେ।"
ସୂଚନାଯୋଗ୍ୟ ଯେ, ଆମ୍ ଆଦମୀ ପାର୍ଟିର ରାଜ୍ୟସଭା ସାଂସଦ ସଞ୍ଜୟ ସିଂହ ଶ୍ରୀ ରାମ ଜନ୍ମଭୂମି ତିର୍ଥ କ୍ଷେତର ଟ୍ରଷ୍ଟ ବିରୋଧରେ ଦୁର୍ନୀତି ଅଭିଯୋଗ ଆଣି ସିବିଆଇ ଏବଂ ଇଡି ତଦନ୍ତ ଦାବି କରିଥିଲେ। ସେ ଲକ୍ଷ୍ନୌରେ ଦାବି କରିଥିଲେ ଯେ ଟ୍ରଷ୍ଟର ମହାସଚିବ ଚମ୍ପତ ରାୟ ସଂଗଠନର ସଦସ୍ୟ ଅନୀଲ ମିଶ୍ରଙ୍କ ସହାୟତାରେ ୨ କୋଟି ଟଙ୍କାର ଜମି ୧୮ କୋଟି ଟଙ୍କାରେ କିଣିଛନ୍ତି। ସେ କହିଥିଲେ ଯେ ଏହା ଏକ ପ୍ରତ୍ୟକ୍ଷ ଅର୍ଥ ହେରଫେର ମାମଲା ଏବଂ ସରକାର ଏହାର ସିବିଆଇ ଓ ଇଡି ଯାଞ୍ଚ କରାଇବା ଉଚିତ।